Read lambya LUKA 8 Bible Online

LUKA 8 - lambya bible

LUKA 8

¹Pisinda pache u Yesu akenda mutwaya na mutwaya utukulu nkani, pakulumbilila Amazyu Amiza nizya Bumwene ubwa Chala. Abamanyili 12 bala bakabuka nawe,

²pakaba sona abakolo bamo babo u Yesu akabefya imizimu imibibi nu kupozya ububine bwabo. Abakolo bala bo aba: U Maliya, yuyo bakatinji u Magadalena, yuyo akamwefya imizimu imibibi seveni,

³nu Yohana, yuyo umulume u Chuza akaba we songo kunyumba iya Helodi, nu Suzana, sona na bakolo abanji abinji babo bakabombezyanga ivintu vyabo pakumwavwa u Yesu poka na bamanyili bache.

⁴Abantu abinji abakufuma mutwaya utwakulekana-leka bakabungana pabuyo papo pakaba u Yesu, po u Yesu akababuzya ichili ichi akati,

⁵“Kukabako umuntu yumo yuyo akabuka pakupesa imbeyu mumughunda wache. Bo ali pakupesa, imbeyu zimo zikawila muzila, mumo zikakanyiwa, sona iviyuni vikiza nukuzizompola.

⁶Zimo zikawila pilyalabwe, bo imbeyu zyamela, zikuma pakuti itope litakaba ni ching'wezi.

⁷Imbeyu zimo zikawila pakasi pamivwa ghagho ghakakula nukufyululusya imbeyu zila.

⁸Sona imbeyu zimo zikawila pitope ilyiza; imbeyu zikakula nukwela iseke 100.” Pabumalilo u Yesu akati, “Yuyo ali na makutu aghakwivwila, ivwe!”

⁹Abamanyili bache bakamulaluzya u Yesu iching'anamulo icha chili ichi.

¹⁰Po u Yesu akabamula akati, “U Chala abavumbulila vivyo vifisiwe ivya Bumwene bwache. Loli abantu babo bali kuzi bakwivwa vyosi muvyili, ukuti bangennya nukwennya, loli bate bavyennyanje, sona nukuti bangivwa nukwivwa, loli batangavyivwisya.

¹¹“Iching'anamulo icha chili chila cho ichi: Imbeyu zila gho amazyu agha Chala.

¹²Imbeyu zizyo zikawila muzila zikwimilila abantu babo bakwivwa amazyu agha Chala. Loli u Satana akwiza nukwefyamo amazyu ghala mumoyo ghabo ukuti baleke pakusubila nu kupokiwa.

¹³Imbeyu zizyo zikawila pilyalabwe zikwimilila abantu babo bakwivwa amazyu nukughapokela nu buhobosu. Loli ghatakwinjila nkani mumwabo. Bakusubila pakabalilo akanandi bulo, sona nanti akabalilo akakuyeliwa kakwana bakuwa umwalubilo-lubilo.

¹⁴Imbeyu zizyo zikawila pakasi pamivwa zikwimilila abantu babo bakwivwa amazyu agha Chala. Loli ukwikolezannya nivya muchisu ichapasi pano, ukuchighana ichuma, sona ni vinyonywa vyosi ivyakulekana-lekana vikwinjila nukufyululusya amazyu ghala, po iseke zyabo zitakutona nalumo.

¹⁵Imbeyu zizyo zikawila pitope ilyiza zikwimilila abantu babo bakwivwa amazyu nukughasunga mumoyo umwiza nu bwanaloli. Sona bakujimba mupaka bape iseke.”

¹⁶“Nayumo umuntu yuyo akukozya inyale nukuyikupikila ni sonta pamo ukuyibika kusi kuchitala. Loli akuyibika pabuzelu, umwakuti yibalamilaye abantu bosi munyumba mula.

¹⁷Chosi chicho chifisiwe chikwiza pakuboneka pabuzelu. Chosi chicho chivwamite chikwiza pakuvumbuliwa.

¹⁸“Polelo muchebaye na zizyo mukwivwa. Umuntu wesi yuyo ali nako kale kamo, akwiza pakumonjelezyapo ivyinji ukuchila. Loli umuntu wesi yuyo ate nako kamo akwiza pakufyuliwa na kanandi bulo kako ali nako kale, napapo akwinong'ona ukuti ali nako kamo.”

¹⁹Unyina uwa Yesu na bawamwabo bakafika kunyumba kula, loli bakapotwa pakukomana nawe pachifukwa icha chilundilo icha bantu.

²⁰Umuntu yumo akamubuzya u Yesu akati, “Unyoko na bawamwinyu bali kuzi bakulonda bakomane nawe.”

²¹U Yesu akati, “Umayi na bawamwitu bo bantu babo bakwivwa amazyu agha Chala nukughabombezya.”

²²Isiku limo u Yesu akakwela mubwato poka na bamanyili bache, po akati, “Twende tulobokele kwisila ilinji ilya nyanja.” Po bakabuka.

²³Bo bakuloboka, u Yesu akaghona utulo. Umwakuchenusya bulo impepo iyakoghofya yikanda pakukuka, po ubwato bukanda pakwizula na mizi, umwakuti bosi bakaba muntamyo impala-pala nkani.

²⁴Abamanyili bala bakabuka kwa Yesu pakumulamusya ukuti, “Wee Mwene, wee Mwene! Tuli pakudwiba!” U Yesu akanyamuka nukuyilamula impepo na mayigha ghala ukuti vileke. Po vyosi vikaleka, umwakuti panyanja pakaba myee nkani.

²⁵Po u Yesu akabalaluzya abamanyili bache akati, “Ulwitiko lwinyu luli ko kwiyi?” Loli bosi bakaswigha nukunyila nkani. Bakanenezannya bene-bene bakati, “Nkimba muntu wenu yunuyu, umwakuti impepo na mayigha ghope vikumwivwila!”

²⁶U Yesu na bamanyili bache bakalobokela kuchigaba icha Gelasa,[6] chicho chikenannya ni chigaba icha Galileya.

²⁷Bo u Yesu afika pisila, akakomana nu muntu uwa mukaya kala-kala, yuyo akaba ni mizimu imibibi. Pakuti akabalilo akatali nkani umuntu uyu akendagha nkule, sona atakikalagha panyumba, loli akalindagha mumapumpa.

²⁸Bo amwennya u Yesu, akakolomoka nkani, nukwisumba munyayo zyache. Akati, “Wee Yesu Mwana uwa Chala uwa Kumwanya nkani! Nkimba ukulonda ichoni nane? Inkukulaba ukuti utakanfunde!”

²⁹Akanena bunubu pachifukwa ichakuti u Yesu akaghulamula umuzimu umubibi ghula ukuti wepemo mumwache. Akabalilo akinji umuzimu umubibi ghukamulemagha, napapo abantu bakamupinyagha inyobe ni vinama vyache ni mpingu, loli akadumulannyanga impingu zila, sona umuzimu umubibi ghukamuchimbizizyanga munkolongo.

³⁰Po u Yesu akamulaluzya akati, “Itabwa lyako we wenu?” Umuntu yula akamula akati, “Itabwa lyane ne Chilundilo,” ichifukwa imizimu imibibi imyinji yikinjila mumwache.

³¹Imizimu imibibi yikamulaba u Yesu ukuti atakayitume mu chibanka ichikulu ichibizu nkani chicho abantu ababibi bakufundiliwako.[7]

³²Pakabapo umudimo uwa ngulube, zizyo zikalyanga pighamba. Po imizimu imibibi yikamulaba u Yesu ukuti ayitikizye ukuti yinjile mu ngulube zila, po akayitikizya.

³³Po imizimu imibibi yikepamo mu muntu yula nukwinjila mu ngulube. Umudimo ghosi ghula ghukachimbila nukwinjila munyanja, sona nukufwila mula-mula.

³⁴Abadimi aba ngulube zila bakennya chicho chikabombiwa, po bakachimbila nukubabuzya abantu mutwaya, sona na mumaghunda.

³⁵Abantu bakabuka pakwennya chicho chikabombiwa, po bo biza kwa Yesu, bakamwagha umuntu yuyo imizimu imibibi yikepamo mumwache ikaye munyayo izya Yesu, bo avwalite, sona inyinong'ono zyache zikanyokelamo, po ubogha bukabalema bosi.

³⁶Abantu babo bakazyennya zizyo zikabombiwa bakababuzya abantu namumo umuntu yula akapolela.

³⁷Po abantu bosi aba muchigaba icha Gelasa bakamulaba u Yesu pakwepako pakuti bakanyila nkani. Po u Yesu akakwela mubwato nukunyokela kuko akafuma.

³⁸Umuntu yuyo imizimu imibibi yikepamo mumwache akamulaba u Yesu ukuti amwitikizye pakubuka poka nawe. Loli u Yesu akamunyosya nukumubuzya ukuti,

³⁹“Nyokela kunyumba nukubabuzya zizyo u Chala akubombela.” Umuntu yula akanyokela nukufumuzya mukaya kosi zizyo u Yesu akamubombela.

⁴⁰Bo u Yesu anyokela kwisila ilinji ilya nyanja, abantu bakamupokela, ichifukwa bosi bakamulindilagha we yuyo.

⁴¹Po u Yayili, usongo yumo uwa kunyumba iyakwiputilamo wepe akiza pala-pala. Akisumba munyayo izya Yesu nukwanda pakumulambilizya ukuti abuke kunyumba yache,

⁴²pachifukwa ichakuti umwana wache weka yuyo akaba na maka 12 akaba papipi pakufwa. Bo u Yesu achili akwenda, abantu bakafyenyana nawe.

⁴³Pakasi pa bantu bala mukaba umukolo, yuyo akayimba nkani nu bubine ubwa chakumwezi amaka 12. Akatagha vyosi vivyo akaba navyo mu baghanga;[8] loli atakabapo nayumo umuntu yuyo akamupozya.

⁴⁴Umukolo yula akiza muchilundilo icha bantu kwisinda ukwa Yesu nukupalamasya mulubazu ulwa mwenda wache, panapo na panapo ibanda likaleka pakutonya.

⁴⁵U Yesu akalaluzya akati, “Nkimba we wenu ampalamasya?” Umuntu wesi akakana, po u Pitala akati, “Mwene, abantu bosi bakubunganiye, sona bakukufyenya.”

⁴⁶Loli u Yesu akati, “Umuntu weka ampalamasya pakuti nazimanya ukuti amaka ghepamo mumwane.”

⁴⁷Po umukolo yula bo ennya ukuti aghiwa, akiza akutetema, akisumba munyayo izya Yesu. Pala-pala pamaso pa bantu bosi akanena ichifukwa chicho akamupalamasizya, sona na mumo akapolela umwalubilo-lubilo.

⁴⁸U Yesu akamubuzya umukolo yula akati, “Wee mwana wane ulwitiko lwako lwakupozya. Wende akiza.”

⁴⁹Bo u Yesu achili akunena, intumi iya kunyumba iya songo uwa nyumba iyakwiputilamo yikiza nukumubuzya u Yayili ukuti, “Umwana wako atuleka. Choni chicho ukumutamya umumanyisi.”

⁵⁰Loli u Yesu akivwa zinizi nukunena kwa Yayili ukuti, “Utakanyilaye, subila bulo, po akwiza pakupola.”

⁵¹Bo u Yesu afika panyumba pala, atakamwitikizya nayumo umuntu ukwinjila nawe munyumba mula, loli u Pitala mwene, nu Yakobo, nu Yohani, nu wise, sona nu nyina uwa mwana yula.

⁵²Abantu bosi bakalilagha, sona bakaba ni chitima. Po u Yesu akababuzya akati, “Mutakalilaye, umwana atafuye, loli aghonite bulo utulo!”

⁵³Bosi bakamuseka, ichifukwa bakazimanya ukuti naloli umwana yula afuye.

⁵⁴Loli u Yesu akamulema panyobe nukwitizya ukuti, “Mwana wane, nyamuka!”

⁵⁵Ubumi bwache bukanyokelamo, umwalubilo-lubilo akanyamuka. Po u Yesu akabalamula ukuti bamupe umulindu yula ivyakulya.

⁵⁶Abapapi bache bakaswigha nkani, loli u Yesu akabalamula ukuti batakamubuzyepo nayumo umuntu vivyo vyabombiwa.