Read lambya YOHANI 19 Bible Online

YOHANI 19 - lambya bible

YOHANI 19

¹U Pilati akalamula ukuti u Yesu bamusyempe.

²Abasikali abankondo bakaluka impumpu iya mivwa nukumuvwika kumutu, bakamuvwika inkazo inchesamu.

³Bakiza kukwache nukuti, “Mwaghona we Mwene uwa ba Yuda.” Po bakamukoma na mapi.

⁴U Pilati akafuma sona kuzi nukubabuzya aba Yuda ukuti, “Ennya, inkumufumya kuzi ukuti namwe bulo mumanye ukuti intamwaghitepo ni nongwa nayimo-yimo.”

⁵Po u Yesu akafuma kuzi bo avwalite impumpu iya mivwa ni nkazo inchesamu. U Pilati akababuzya akati, “Ennya, umuntu yula we uyu!”

⁶Bo abaputi abasongo na balindilili aba Nyumba iya Chala bamwennya u Yesu, bakakolomoka nkani bakati, “Umukomele pachipinjika! Umukomele pachipinjika!” Pilati akababuzya akati, “Mumusende mwebene nukumukomela pachipinjika pakuti ane intakumwagha ni nongwa nayimo-yimo.”

⁷Aba Yuda bakamwamula bakati, “Ukuyana nu lulaghilo lwitu, aghoghiwanje pakuti akinena mwene ukuti, ‘Ane ne Mwana uwa Chala.’ ”

⁸Bo u Pilati ivwa zinizi, ubogha bukamulema nkani.

⁹Akinjila sona munyumba mula nukumulaluzya u Yesu ukuti, “Nkimba kukwinyu ko kwiyi?” Loli u Yesu atakamulapo nachimo.

¹⁰U Pilati akamulaluzya akati, “Utakulonda pakunyamula? Nkimba utazimenye ukuti indi nu bulaghili ubwakukwabulila nu bwakukukomelela bulo pachipinjika?”

¹¹U Yesu akamwamula akati, “Uli nu bulaghili papane pakuti we Chala yuyo akakupa ubulaghili bunubu. Po umuntu yuyo akambika munyobe zyinyu anangite nkani.”

¹²Bo u Pilati ivwa zinizi, akalondagha pakumusatula u Yesu, loli aba Yuda bakanda pakukolomoka ukuti, “Nanti ukumusatula kokuti ute we mumanyani uwa Kesale. Umuntu wesi yuyo akwinena mwene ukuti we Mwene, akumusambukila u Kesale.”

¹³Bo u Pilati ivwa amazyu ghanagha, akafuma kuzi nu Yesu, akikala pachitengo ichakulongelapo inongwa pabuyo bubo bukwitiziwa, “Ulwalo ulwa mabwe.” (Mu Chihebeli kokuti, “Gabata.”)

¹⁴Likaba lisiku ilya ba Yuda ilyakwiyanizizya Ulusekelo ulwa Pasa, sona kakaba kabalilo aka pamusanya. U Pilati akababuzya aba Yuda akati, “U mwene winyu we uyu!”

¹⁵Bakakolomoka nkani bakati, “Mughoghe! Mughoghe! Umukomele pachipinjika!” U Pilati akabalaluzya akati, “Nkimba mukulonda ukuti ane imukomele u mwene winyu pachipinjika?” Abaputi abasongo bakamwamula bakati, “Tute nu mwene uyunji, loli u Kesale mwene.”

¹⁶Po u Pilati akamubika u Yesu munyobe zyabo ukuti bamukomele pachipinjika. Abasikali bakamusenda u Yesu.

¹⁷Bo anyamuye ichipinjika chache, bakafuma nawe kuzi ukwa kaya akakulu nkani kala nukufika pabuyo bubo bukwitiziwa ukuti, “Ifupa ilya kumutu.” (Mu Chihebeli kokuti, “Gologota.”)

¹⁸Kula-kula bakamukomela pachipinjika. Bakakomela poka sona na bantu abanji babili, weka kunyobe indilo, uyunji iya kumongo, u Yesu pakasi.

¹⁹U Pilati akasimba ubusimbe nukubika pamwanya pachipinjika icha Yesu ubwakuti, “U Yesu uwa mu Nazaleti, u Mwene uwa ba Yuda.”

²⁰Aba Yuda abinji bakabelenga ubusimbe bula pakuti ubuyo bubo bakamukomelapo u Yesu bukaba papipi na kaya akakulu nkani. Amasimbo ghakasimbiwa mu Chihebeli, Chiloma na mu Chigiliki.

²¹Abaputi abasongo bakanena kwa Pilati bakati, “Utakasimbaye ukuti, ‘U Mwene uwa ba Yuda.’ Loli utinji, ‘Umuntu uyu akinena mwene ukuti ne Mwene uwa ba Yuda.’ ”

²²U Pilati akamula akati, “Chicho nasimba, nasimba mpela.”

²³Bo abasikali abankondo bamukomela u Yesu pachipinjika, bakasenda amenda ghache nukughagabannya muvigaba folo, umusikali wesi akasenda ichigaba chache. Sona bakasenda ni nkazo yache, yiyo yitakaba nu busone nabumo-bumo.

²⁴Abasikali abankondo bakanenezannya bene-bene bakati, “Tutakaghuzepule, loli tupange amayele, umwakuti tumwaghe yuyo akwiza pakughusenda.” Zinizi zikabombiwa ukuti Amasimbo ghakwanilisiwe aghakuti, “Bakagabana amenda ghane, pankazo yane bakabikilapo ubulaghuzi.” Po izi zyo zizyo bakabomba abasikali abankondo.

²⁵Papipi ni chipinjika icha Yesu pakimilila unyina, umuzuna uwa nyina, nu Maliya umuchi uwa Kiliyopa nu Maliya Magadalena.

²⁶Bo u Yesu amwennya unyina nu mumanyili wache yuyo akamughana nkani, imiliye papipi akamubuzya unyina akati, “Mayi, uyu mwana wako.”

²⁷Po akamubuzya sona umumanyili wache yula akati, “Uyu we nyoko.” Ukwandila pakabalilo kala-kala umumanyili yula akamusenda unyina nukubuka nawe kukaya kache.

²⁸U Yesu akazimanya ukuti imbombo yiyo akizila yamala, sona ukuti Amasimbo ghakwanilisiwe akanena ukuti, “Numilwe.”

²⁹Pakabapo isonta inyizule nu vinyo uwakusapa, bakasenda isipanji nukuyidwibika mu vinyo uwakusapa yula. Akayisomeka kulutete nukuyibika ku mulomo wache.

³⁰Bo u Yesu ang'wela uvinyo yula akati, “Kwamala.” Po akakotamila pasi nukuzililika.

³¹Likaba lisiku ilya ba Yuda ilyakwiyanizizya Ulusekelo ulwa Pasa. Abalaghili aba Chiyuda batakalondagha ukuti imivimba yibanje pavipinjika Pisiku Ilyakutuzya pakuti Isiku Ilyakutuzya lila likaba ilya pamwanya nkani. Po bakamulaba u Pilati ukuti itikizye ukuti ivinama ivya bantu babo bakakomeliwa vipyoliwe nukuti imivimba yabo yefiwepo.

³²Po abasikali abankondo bakabuka nukupyola ivinama ivya babo bakakomeliwa poka nu Yesu, nukwandila ivya umuntu uwabwandilo nukubomba bunubu ku wabubili.

³³Loli bo bafika pa Yesu, bakagha ukuti afuye kale, po batakapyola ivinama vyache.

³⁴Loli weka uwa basikali abankondo bala akamulasa u Yesu ni mpalala mumbazu, po umwalubilo-lubilo ibanda na mizi vikanda pakufuma.

³⁵Umuntu yuyo akennya izi zikubombiwa we yuyo akusimikizya ukuti namwe musubile.[27] Ulusimikizyo lwache lwanaloli, sona azimenye ukuti zizyo akunena zyanaloli.

³⁶Zinizi zikabombiwa ukuti Amasimbo ghakwanilisiwe aghakuti, “Nalimo-limo ifupa lyache lilyo likwiza pakupyoliwa.”

³⁷Sona pali Amasimbo aghanji ghagho ghakuti, “Abantu bakwiza pakumwenelezya yuyo bakamulasa.”

³⁸Pisinda pache u Jozefu uwa mukaya aka Alimatiya, yuyo akaba mumanyili uwa Yesu uwakubusyefu pakuti akanyilagha abalaghili aba Chiyuda, akamulaba u Pilati ukuti awefyepo umuvimba uwa Yesu. U Pilati akamwitikizya, po u Jozefu akabuka nukuwisyapo umuvimba ghula.

³⁹U Nikodemu wepe akiza, yuyo pabwandilo akabuka kwa Yesu pabusiku. Akasenda amafuta aghakununkila ghagho ghakaba mongannye umila nu aloyi, ubung'wamu bwache bukaba amakilogalamu 30.

⁴⁰Abanavuli babili bala bakasenda umuvimba uwa Yesu nukughunnyembetelela ni sanda poka na mafuta aghakununkila ghala, ukuyana nu lwiho ulwa pafwa izya Chiyuda.

⁴¹Ubuyo bubo bakamukomelapo u Yesu pachipinjika bukaba mughunda, sona mumughunda ghula mukaba ipumpa ipya bulo, lilyo ukwanda kale nayumo umuntu yuyo akasyiliwamo.

⁴²Pakuti likaba lisiku ilya ba Yuda ilyakwiyanizizya Ulusekelo ulwa Pasa, sona ukuti ni pumpa lyope likaba papipi, bakabika umuvimba uwa Yesu mula-mula.