Read lambya IMBOMBO IZYA BATUMIWA 16 Bible Online

IMBOMBO IZYA BATUMIWA 16 - lambya bible

IMBOMBO IZYA BATUMIWA 16

¹U Pabuli akenda mupaka kukaya akakulu nkani aka Delibe nu Lisitila. Mula-mula mu Lisitila mukikalagha umumanyili yumo, yuyo akaba we Timoti. Unyina akaba mu Yuda mwitiki, loli uwise akaba mu Giliki.

²Abitiki bosi aba mu Lisitila na mu Ikoniya bakamupala u Timoti.

³U Pabuli akalondagha ukuti u Timoti abuke poka nawe pa bulendo bwache, po akamusilimula. Akabomba zinizi ichifukwa aba Yuda bosi babo bakikala mubuyo bula bakamanya ukuti uwise akaba mu Giliki.

⁴Bo bakudumusannya mutwaya, bakabapa abitiki amalamulo, ghagho ghakapangiwa na batumiwa na basongo aba chipanga mu Yelusalemu nukubabuzya ukuti bendelele pakughakonka.

⁵Po bunubu ivipanga vikaba na maka mulwitiko nukukula, po isiku ni siku akabukatila kakonjelelagha-konjelelagha.

⁶U Pabuli na bamanyani bache bakadumusannya muchigaba icha Filigiya na muchigaba icha Galatiya ichifukwa u Muzimu Umuzelu atakabitikizya ukuti balumbilile amazyu muchigaba icha Asiya.

⁷Bo bafika pampaka iya Misiya, bakayezya pakwinjila muchigaba icha Bitiniya, loli u Muzimu uwa Yesu atakabitikizya.

⁸Po bakadumusannya muchigaba icha Misiya nukubuka mu Tulowa.

⁹Pabusiku u Pabuli akennya ichisetuka mumo akennya umuntu uwa muchigaba icha Makedoniya imiliye nukumulaba ukuti, “Wize kuno ku Makedoniya ukuti utwavwe!”

¹⁰Bo u Pabuli achennya bulo ichisetuka chila, panapo na panapo tukiyannya pakubuka ku Makedoniya pakuti tukinong'ona ukuti u Chala atwitizya ukuti tulumbilile Amazyu Amiza pakasi pa bantu kula-kula.

¹¹Tukanyamuka nu bwato ubukulu mu Tulowa, tukagholoka bulo nukubuka mu Samotilaki, po indabi yache tukafika mu Neyapoli.

¹²Ukufuma kula-kula tukabuka mu Filipi, akaya akakulu nkani muchigaba icha Makedoniya; sona abantu aba mukaya kala-kala bakaba aba Chiloma. Tukikala amasiku aminji nkani mula-mula.

¹³Pisiku Ilyakutuzya tukepamo mukaya akakulu nkani kala nukubuka mulubazu ulwa lusoko, kuko tukinong'onagha ukuti kukabako ubuyo ubwakwiputilako. Tukikala pasi nukunena na bakolo babo bakabungana kula-kula.

¹⁴Weka uwa babo bakateghelezyanga akaba we Lidiya uwa mukaya aka Tiyatila. Akaghulizyanga amenda amachesamile, sona akaba mukolo yuyo akamwiputagha u Chala. U Mwene akamwighula umoyo wache ukuti ateghelezye zizyo u Pabuli akanenagha.

¹⁵Pisinda pache bo yuyo na bantu aba munyumba yache boziwa, akatwitizya aswe akati, “Nanti naloli mwanyennya ukuti ne mwitiki mwa Mwene, zagha mwikale munyumba yane.” Akatupepeka ukuti tubuke.

¹⁶Isiku limo bo tukubuka kubuyo ubwakwiputilako, tukakomana nu mulindu umuzya yuyo akaba nu muzimu umubibi ghugho ghukamupelagha ukuti anene ivya muntazi. Akamukabilagha umwene wache indalama inyinji nkani nu bulaghuzi bwache.

¹⁷Akamukonka u Pabuli naswe, akukolomoka akati, “Abantu aba babombi aba Chala uwa Kumwanya nkani! Bakubabuzya mumo mungapokeliwa!”

¹⁸Akabomba zinizi amasiku aminji, mupaka u Pabuli akakalala nkani, umwakuti akaghalabuka nukughubuzya muzimu umubibi ghula ukuti, “Mwitabwa ilya Yesu Kilisitu inkukulamula ukuti ufumemo mumwache!” Panapo na panapo umuzimu umubibi ghula ghukepamo mumwache.

¹⁹Bo abenecho aba mulindu yula bazyaghannya ukuti ulusako lwabo lulo bakakabilagha nalo indalama lwabuka, bakamulema u Pabuli nu Sila nukubawesela ku munalo ukuti bakomane na balaghili.

²⁰Bakiza nabo pamaso pa balongi aba Chiloma nukuti, “Abantu aba ba Chiyuda, sona bali pakuvulungannya akaya kitu aka.

²¹Bakumanyizya inyiho zizyo tutakwitikizya pamo ukuyezya pakuzikonka pakuti aswe twe ba Chiloma.”

²²Ichilundilo chope chikinjililapo pakubakoma u Pabuli nu Sila. Po abalongi bakazepulannya amenda agha Pabuli nu Sila nukubalamula ukuti basyempiwe.

²³Bo babasyempa nkani bakabataghila mujele, po bakamulamula umulindilili uwa jele yula ukuti ighalile nkani.

²⁴Pachifukwa icha lulaghilo lunulu, umulindilili yula akabinjizya muchipinda icha mukasi nkani nukupinyilila ivinama vyabo mu vipimpi.

²⁵Pakasi pabusiku u Pabuli nu Sila bakiputagha nukwimba inyimbo izya Chala, po abakayidi abamwabo bakabateghelezyanga.

²⁶Umwakuchenusya bulo kukaba akasenyenta akakulu nkani, umwakuti kakaneng'ennya ulwalo ulwa jele yila. Panapo na panapo inyiyi zikighuka, sona zyope ni mpingu izya bakayidi bosi zikasatuka.

²⁷Umulindilili yula akanyamuka. Bo ennya ukuti inyiyi izya jele zyighukite, akinong'ona ukuti abakayidi bachimbilamo. Po akawesa upanga wache nukulonda ukwighogha mwene.

²⁸Loli u Pabuli akakolomoka nkani akati, “Utakivulazye! Twebosi tuli munumu!”

²⁹Bo umulindilili uwa jele akitizya ukuti bamupe inyale, akachimbilila mukasi nukuwila munyayo izya Pabuli nu Sila bo akutetema.

³⁰Po akabafumya kuzi nukubalaluzya ukuti, “Mwe basongo, nkimba ningabomba choni ukuti impokiwe?”

³¹Bakamwamula bakati, “Usubile mwa Mwene u Yesu Kilisitu, po awe poka ni mbumba yako mukwiza pakupokiwa.”

³²Po bakalumbilila amazyu agha Mwene kukwache, sona na ku bantu bosi abanji aba munyumba yache.

³³Pakabalilo kala-kala, umulindilili uwa jele akabasenda nukubasuka ivilonda vyabo. Panapo na panapo yuyo poka ni mbumba yache yosi bakoziwa.

³⁴Po akamusenda u Pabuli nu Sila pakubuka nabo kunyumba yache nukubapa ichakulya. Yuyo poka ni mbumba yache bakahoboka nkani, ichifukwa bakasubila mwa Chala.

³⁵Abalongi bala bakatuma abasikali abasongo nu lulaghilo ulwakuti, “Basatule abantu aba ukuti babukaye.”

³⁶Po umulindilili uwa jele yula akamubuzya u Pabuli akati, “Abalongi balamula ukuti awe nu Sila musatuliwe. Munganyamuka nukubuka mumutende.”

³⁷Loli u Pabuli akababuzya abasongo aba basikali akati, “Abene bakatusyempela pachilundilo icha bantu loli ukusita ni nongwa nayimo-yimo, aswe twe ba Chiloma! Po bakatutaghila mujele. Po ilelo bakulonda ukutwefyamo chimyemye bulo? Awe, twakana! Baleke bize batwefye bene.”

³⁸Abasikali bababuzya zinizi abalongi. Po bo bivwa ukuti u Pabuli nu Sila bakaba ba Chiloma bakanyila

³⁹Abene bakabuka nukulambilizya kukwabo, po bakabefyamo mujele nukubabuzya ukuti babukaye.

⁴⁰U Pabuli nu Sila bakepamo mujele nukubuka kunyumba iya Lidiya. Kula-kula bakakomana na bitiki, bakanena amazyu aghakubakazya, po pabumalilo bakanyamuka nukubuka.