Read lambya LOMA 1 Bible Online

LOMA 1 - lambya bible

LOMA 1

¹Ane ne Pabuli, umubombi uwa Kilisitu u Yesu, nene inkitiziwa nu Chala pakuba mutumiwa, sona nukupaghuliwa pakulumbilila Amazyu Amiza.

²Amazyu Amiza ghanagha ghakalayiziwa kale nu Chala ukwendela mu balaghuzi bache ukuyana na Masimbo Amazelu.

³Ghakunena nizya Mwana wache, u Mwene witu u Yesu Kilisitu. Ukuyana nu buntu bwache, akapapiwa mu luko ulwa Devedi.

⁴Loli ukuyana nu buzelu sona nu bwachala bwache, akalanjiziwa na maka amakulu nkani pakuba Mwana uwa Chala pakumuzyusya kubufwe.

⁵Ukwendela mwa Kilisitu, u Chala akatupa ulusako ulwakuti tubanje batumiwa, umwakuti tubalongozye abantu aba inko zyosi pakumusubila nu kumwivwila, ukuti bunubu itabwa lyache lichindikiwanje.

⁶Ichi chikubongannya namwe bulo, mwe mwitiziwe pakuba bantu aba Yesu Kilisitu.

⁷Inkubasimbila abantu bosi babo bali mu Loma, babo u Chala abaghanite nukubitizya ukuti babanje bantu bache abazelu. Ichisa nu mutende ivyakufuma kwa Chala u Tata witu, sona ni vyakufuma kwa Mwene u Yesu Kilisitu vibanje namwe.

⁸Ichakwanda, inkumupalizya u Chala wane ukwendela mwa Yesu Kilisitu pachifukwa icha mwemwe mwebosi pakuti ichisu chosi ichapasi chikwivwa nizya lwitiko lwinyu.

⁹U Chala, yuyo inkumubombela nu moyo wane ghosi pakulumbilila Amazyu Amiza aghakunena nizya Mwana wache, we kaboni wane ukuti akabalilo kosi inkubakumbuka munyiputo zyane.

¹⁰Akabalilo kosi kako inkwiputa, inkumulaba u Chala ukuti mubwighane bwache anyitikizye ukuti pabumalilo imbendele.

¹¹Pakuti inkulonda nkani pakubennya ukuti ingabane namwe ulusayo ulwa buzimu ukuti lubape amaka.

¹²Chicho inkung'anamula chakuti twebosi, amwe nane, tukwiza pakukazannya, ane nu lwitiko lwinyu, sona amwe nu lwitiko lwane.

¹³Mwee bakamu bane, inkulonda ukuti muzimanye ukuti utubalilo utwinji ninong'onagha ukuti imbendele, loli mupaka nilelo bulo chilipo chimo chicho chikunkanizya. Chicho inkulonda chakuti impindule bamo mumwinyu pakuba bitiki ukuyana na mumo inkababombela abantu babo bate ba Yuda.

¹⁴Pakuti indi ni nkongole iya bulumbilili pakasi pa bantu bosi, abamahala na basita mahala, sona abamanyi na babo batamanyiye.

¹⁵Ichi cho chifukwa inkunyonywa nkani pakulumbilila Amazyu Amiza na kukwinyu bulo, mwe mukwikala mu Loma.

¹⁶Pakuti inte ni soni pakulumbilila Amazyu Amiza, ichifukwa gho maka agha Chala ghagho ghakubapoka abantu bosi babo bakusubila, ukwandila na ba Yuda, pisinda pache na bantu babo bate ba Yuda bulo.

¹⁷Pakuti Amazyu Amiza ghakuvumbula namumo u Chala akubanenela abantu pakuba bagholosu pamaso papache: Ko kwendela mulwitiko ukwandila ko kubwandilo mupaka kubumalilo. Amasimbo ghakuti, “Abantu babo u Chala akubanena pakuba bagholosu ukwendela mu lwitiko, bakwiza pakuba nu bumi.”

¹⁸Ubukali ubwa Chala bwavumbuliwa kumwanya pambombo imbibi, sona ni vintu vyosi ivibibi ivya bantu, babo ni nkalo zyabo imbibi bakukanyilila ubwanaloli.

¹⁹U Chala akubafunda, ichifukwa ivintu vivyo vingabapela abantu ukuti bamumanye u Chala vili pabuzelu kukwabo, pakuti u Chala umwenecho we yuyo akabavumbulila.

²⁰Ukwandila pakabalilo kako u Chala akapelela ichisu ichapasi, abantu bavyennya ivintu ivisita kuboneka ivya Chala, gho maka ghache agha bwila na bwila nu bwa Chala bwache. Abantu bakwivwisya bo bakuvyennya ivintu vivyo u Chala apelite. Po abantu bate na pakulyeghelapo!

²¹Napapo bakamumanya u Chala, loli batakamuchindika, pamo ukumupalizya. Loli inyinong'ono zyabo zikaba zyamwalwe, sona amoyo ghabo ghakizula ni chisi.

²²Bakwinena bene ukuti bantu bamahala, loli bapunganu.

²³Mubuyo ubwa kumuchindika u Chala yuyo atakufwa, bakuvichindika ivifwani vivyo vikuboneka ngati po muntu yuyo akufwa, pamo ngati po viyuni, pamo ivinyamana ivya vinama folo, pamo ngati po vinyamana ivyakwavula.

²⁴Polelo u Chala akabaleka abantu ukuti babombaye bulo ivinyonywa ivibibi, vivyo amoyo ghabo ghanyonywa, mupaka nu kughanyazya amabili ghabo.

²⁵Bakutanana ubwanaloli ubwa Chala nu bumyasi. Bakuvichindika nu kuvibombela ivipeliwa mubuyo ubwa Chala, Umupeli umwenecho apaliwanje bwila na bwila! Ameni.

²⁶Pachifukwa chinichi u Chala akabaleka abantu ukuti babombaye bulo ivinyonywa ivyakukozya isoni. Na bakolo bulo bakutanana inkalo iyakupapiwa nayo iyakughonana na banavuli, ni nkalo yiyo yitakwitikiziwa.

²⁷Umwakuyana bulo, abanavuli batakubabombela abakolo inkalo iyakupapiwa nukwanda pakunyonywana bene-bene. Bakubombelana bene-bene ivyakukozya isoni, polelo ulufundo lulo luli papabo lukuyana ni mbombo zyabo imbibi.

²⁸Pachifukwa ichakuti abantu bala bakamusula u Chala, po akabaleka ukuti bakonke inyinong'ono zyabo imbibi ukuti babombaye ivintu vivyo batabaghiye pakuvibomba.

²⁹Amoyo ghagho ghizuye ni vintu ivibibi ivyakulekana-lekana, ni vinyazu, nu bupavu, nu kubombelana ivibibi; bizuye na kabini, nu bughoghi, nu lombwa, nu bumyasi, nu kwinong'onelana ivibibi. Bakuyebana

³⁰nukobezannya bene-bene, balwani aba Chala, sona bali na madinko, bamituvyo na bakwikwezya, bakwata ivibibi; batakwivwila abapapi babo;

³¹bapunganu, abasita ulwitiko, abasita ulughano, sona abasita ichisa.

³²Abantu banaba bazimenye indaghilo izya Chala zizyo zikunena ukuti abantu babo bakubomba bunubu bafwanje. Loli bakwendelela pakubomba bunubu, mupaka nukwivwana na bantu babo bakuvibomba.