Read lambya LOMA 14 Bible Online

LOMA 14 - lambya bible

LOMA 14

¹Mumupokele akiza umuntu yuyo ulwitiko lwache ludedebazu, loli mutakadalinkanaye nawe pachifukwa icha nyinong'ono zyache mufundo zimo.

²Ulwitiko ulwa muntu yumo lukumwitikizya pakulya ivintu ivya luko losi, loli umuntu yuyo ulwitiko lwache ludedebazu, akulya inyanyi izyamani zyene.

³Umuntu yuyo akulya ivintu ivya luko losi, atakamusamulaye umuntu yuyo atakulya ivintu ivya luko losi. Sona umuntu yuyo atakulya ivintu ivya luko losi, atakamulongaye umuntu yuyo akulya ivintu ivya luko losi, pakuti we Chala yuyo amupokelite.

⁴Nkimba we wenu awe ukuti umulongaye uwambombo uwa yumo? We Mwene wache mwene yuyo angadumula nanti abomba akiza pamo apotwa. Po akwiza pakubomba akiza muntazi, pakuti u Mwene we yuyo amenye pakumupela ukuti abombaye akiza.

⁵Umuntu yumo akwinong'ona ukuti isiku limo lyapamwanya nkani ukuchila amasiku ghosi aghanji, bo uwamwabo akwinong'ona ukuti amasiku ghosi ghayanite bulo. Umuntu wesi abombaye vivyo asimikizizya mumoyo wache.

⁶Umuntu wesi yuyo akwinong'ona ukuti isiku limo lyapamwanya nkani ukuchila amasiku ghosi aghanji, akubomba bunubu ukuti amuchindikaye u Mwene. Po umuntu yuyo akulya ivintu ivya luko losi, akubomba bunubu ukuti amuchindikaye u Mwene pakuti pakubomba bunubu ukumupalizya u Chala.

⁷Nayumo umuntu mumwitu yuyo ali nu bumi mwene, sona nayumo umuntu yuyo akwifwila mwene.

⁸Nanti tukwiza pakuba nu bumi, tukwiza pakuba nu bumi pachifukwa icha Mwene, sona nanti tukwiza pakufwa, tukwiza pakufwa pachifukwa icha Mwene. Napapo tubanje nu bumi pamo tufwe, twe bantu ba Mwene.

⁹Pakuti u Kilisitu akafwa nukuzyuka kubufwe umwakuti abanje we Mwene uwa bantu aba bumi, sona na uwa bantu abafwe bope.

¹⁰Po awe, nkimba choni chicho ukulonga abamwinyu? Nkimba choni chicho ukumusamula uwamwinyu? Pakuti twebosi tukwiza pakwimilila pantazi pa Chitengo icha Chala ukuti tulongiwe.

¹¹Pakuti Amasimbo ghakuti, “U Mwene akunena akuti, ‘Naloli ane ne Chala uwa bumi, ivimpevu vyosi vikwiza pakunfughamila, sona umuntu wesi akwiza pakwitika nu mulomo wache ukuti ane ne Chala.’ ”

¹²Polelo umuntu wesi mumwitu akwiza pakunena pamwene kwa Chala vyosi vivyo akabomba.

¹³Polelo tuleke pakulongana. Loli tuleke pakubomba vivyo vingabapunuzya abantu abanji, pamo pakubika ichizinka muzila iya bantu abanji.

¹⁴Pakumamatilana kwane poka nu Mwene u Yesu izimenye nkani ukuti chitalipo ichintu chimo chicho chinyazu pachene bulo. Loli nanti umuntu yuyo akuchipima ukuti chinyazu, po ichintu chila-chila kukwache chinyazu.

¹⁵Nanti ukumupela umukamu wako ukuti anange pachifukwa icha vyakula vivyo ukulya, kokuti utamughanite umukamu yula-yula. Utakamunangaye umukamu wako, yuyo u Kilisitu akamufwila, pachifukwa icha vyakulya vivyo ukulya.

¹⁶Utakitikizye ukuti ivintu vivyo ukuvipima ukuti vyiza, abantu bavinenaye ukuti vibibi.

¹⁷Pakuti Ubumwene ubwa Chala bute ni mbombo ni vyakulya ni vyakung'wela, loli ubugholosu nu mutende, sona nu buhobosu, vivyo u Muzimu Umuzelu akupa.

¹⁸Sona nanti umuntu akumubombela u Kilisitu bunubu, akumuhobosya u Chala, sona nukupaliwa na bantu.

¹⁹Polelo zagha tuyezye nkani pakubomba ivintu vivyo vya mutende, umwakuti tukazannye.

²⁰Mutakanangaye imbombo iya Chala pachifukwa icha vyakulya. Ivyakulya vyosi vyiza bulo pakulya. Loli chibibi ukuti muntu alyanje ichintu chosi chicho chingamupela umuntu uyunji ukuti anange.

²¹Chizapo ukuleka pakulya inyama pamo pakung'wela uvinyo pamo pakubomba chicho chingamupela umukamu wako ukuti anange.

²²Usungilile zizyo ukusubila nizya vintu vinivi pakasi papako nu Chala. Musayiwa umuntu yuyo atakwilonga mwene, bo asimikizya ukuti ichintu chicho akubomba, chiza.

²³Loli nanti umuntu akwilamwa na chicho akulya, u Chala akumususya bo akulya, ichifukwa imbombo zyache zitimite palwitiko. Sona ichintu chosi chicho chitimite palwitiko, mbibi.