Read lambya LOMA 3 Bible Online

LOMA 3 - lambya bible

LOMA 3

¹Po nkimba chiza choni chicho chilipo pakuba mu Yuda? Pamo bwiza boni bubo bulimo mukusilimuliwa?

²Ubwiza bulipo nkani pakuba mu Yuda. Ichintu ichakwanda, u Chala akabapa aba Yuda amazyu ghache ukuti baghasungaye.

³Nkimba buli nanti bamo batakabanga basubiliwa, nkimba ichi chikung'anamula ukuti u Chala atangaba uwa kumusubila, pachifukwa ichakusita ukuba basubiliwa?

⁴Awe, napo panandi! U Chala we wanaloli, napapo umuntu wesi mumyasi. Pakuti Amasimbo ghakuti, “Ubanje we mugholosu, bo ukunena, sona bo ukulongiwa inongwa, inongwa yikukunonela.”

⁵Loli nanti ubusita bugholosu bwitu bukulanjizya ubugholosu ubwa Chala, nkimba tungati choni? Nkimba tunganena ukuti u Chala ate mugholosu, bo akutufunda? (Inkunena vivyo abantu bamo bakunena.)

⁶Awe, napo panandi! Nanti u Chala ate mugholosu, nkimba angachilonga buli-buli ichisu ichapasi?

⁷Umuntu yumo anganena ukuti, “Nanti ubumyasi bwane bukulanjizya ubuchindamu ubwa Chala nu bwanaloli ukuchila pakwanda, nkimba choni chicho indongiwanje ngati po ne wambibi?”

⁸Po choni chicho tutakunena ukuti, “Zagha tubombe ivibibi ukuti ubwiza bwize?” Naloli abantu bamo bakutusamula ichifukwa tukunena ivintu vinivi! Abantu banaba bafundiwanje nkani.

⁹Po tungati choni? Nkimba aswe twe ba Yuda twe biza ukuchila abantu babo bate ba Yuda? Awe, napo panandi![1] Twanena kale ukuti aba Yuda na bantu babo bate ba Yuda, twebosi poka tuli pasi pa bulaghili ubwa mbibi.

¹⁰Pakuti Amasimbo ghakuti, “Nayumo umuntu yuyo mugholosu,

¹¹nayumo umuntu yuyo wamahala, pamo yuyo akulonda pakumubombela u Chala.

¹²Bosi bapulumpa izila, bosi banangite nayumo umuntu yuyo akubomba ichiza, napapo weka bulo.

¹³Amamilo ghabo ghasamite ngati gho mapumpa, indimi zyabo zyizuye nu buzimbuli. Amazyu aghakoghofya ghagho ghakufuma mumalomo ghabo ghayanite bulo ni salile izya njoka.

¹⁴Ineno zyabo zyizuye ni vighune, sona na mazyu aghakubaba.

¹⁵Ivinama vyabo vyengo nkani pakukupula ibanda.

¹⁶Kosi kuko babuka, bakuleka ivisami ni ntamyo zyene.

¹⁷Batayimenye izila iya mutende,

¹⁸sona batakumunyila u Chala napo panandi.”

¹⁹Ilelo tuzimenye ukuti vyosi vivyo Indaghilo zikunena, zikunena nizya bantu babo bali pasi pa Ndaghilo, umwakuti patakabepo na pa bulyeghelo napamo-pamo, sona nukuti bosi bakwiza pakulongiwa nu Chala.

²⁰Pakuti atalipo umuntu yuyo u Chala akumunena ukuti mugholosu pamaso papache pachifukwa icha kukonka Indaghilo. Loli Indaghilo zikumupela umuntu ukuti imanye ukuti ananga.

²¹Loli ilelo izila yiyo u Chala akubanenela abantu pakuba bagholosu pamaso papache yavumbuliwa. Izila yache yite po pakukonka Indaghilo awe, napo Indaghilo izya Mozesi na balaghuzi vikubika ubukaboni.

²²U Chala akubanena abantu pakuba bagholosu pamaso papache ukwendela mu lwitiko lwabo mwa Yesu Kilisitu. U Chala akubabomba zinizi abantu bosi babo bakumusubila u Kilisitu, ichifukwa patalipo ukulekana nakumo-kumo,

²³pakuti abantu bosi banangite, sona bapotwa pakufika mu buchindamu ubwa Chala.

²⁴Loli pachifukwa icha chisa ichabulo icha Chala, abantu bakuneniwa bagholosu pamaso papache ukwendela mwa Yesu Kilisitu, yuyo akubapoka.

²⁵U Chala akamubika ukuti chibanje chakwiyipa, ukuti ukwendela mu bufwe bwache imbibi izya bantu zihobokeliwe, abantu babo bakumusubila. U Chala akabomba bunubu ukuti alanjizye ubugholosu bwache, pachifukwa icha bufisalyoyo bwache atakabafundila zila abantu babo bakananga.

²⁶Loli ilelo u Chala amusala ukuti alanjizye ubugholosu bwache. Pakubomba zinizi u Chala akilanjizya mwene ukuti mugholosu, sona nukuti akubanena abantu bosi pakuba bagholosu pamaso papache, babo bakusubila mwa Yesu.

²⁷Nkimba po tungituvya ni choni? Nachimo-chimo! Ichifukwa chache cho choni? Pachifukwa ichakuti tukukonka Indaghilo? Awe, loli pachifukwa ichakuti tukusubila.

²⁸Pachifukwa ichi tunganena ukuti u Chala akumunena umuntu ukuti ate ni nongwa pamaso papache ukwendela mu lwitiko, loli kute pakukonka Indaghilo, awe.

²⁹Nkimba u Chala we Chala uwa ba Yuda bene? Nkimba ute we Chala uwa bantu babo bate ba Yuda bope? Momumo, we Chala uwa bantu babo bate ba Yuda bope.

³⁰U Chala ali weka, akwiza pakubapela aba Yuda pakuba bagholosu pamaso papache ukwendela mu lwitiko lwabo, sona akwiza pakubanena abantu babo bate ba Yuda pakuba bagholosu pamaso papache ukwendela mu lwitiko lwabo.

³¹Nkimba ichi chikung'anamula ukuti tukunanga Indaghilo nu lwitiko lwitu? Awe, napo panandi. Loli tukuzipela Indaghilo pakuba zyamaka.