Read lambya LOMA 6 Bible Online

LOMA 6 - lambya bible

LOMA 6

¹Po tungati choni? Nkimba twendelelaye pakwikala mumbibi ukuti ichisa icha Chala chonjelelepo?

²Awe, tutangachela! Aswe tufuye ku mbibi, po nkimba tungendelela buli-buli pakwikala mumbibi?

³Nkimba mutazimenye ukuti twebosi bo tukoziwa, tukamamatilana nu Kilisitu u Yesu, sona nu lozyo lula-lula tukamamatilana nawe mu bufwe bwache?

⁴Ukwendela mu lozyo lwitu tukamamatilana poka nawe mu bufwe sona nu kusyiliwa kwache, umwakuti ngati mumo u Kilisitu akazyukila kubufwe nu buchindamu ubwa Wise, po umwakuyana bulo, naswe tukwiza pakwikala nu bumi ubupya.

⁵Pakuti nanti twamamatilana poka nawe pakwendela mu bufwe bwache, momumo tukwiza pakumamatilana poka nawe pakwendela mu kuzyuka kwache kubufwe.

⁶Tuzimenye ukuti inkalo yitu inkali yikakomeliwa poka nu Yesu pachipinjika, ukuti inkalo zyitu izya mbibi zinanganike, umwakuti tutakabe sona bazya abambibi.

⁷Pakuti bo umuntu afwa, asatuliwa ku bulaghili ubwa mbibi.

⁸Loli nanti tufuye poka nu Kilisitu, tukusubila ukuti tukwiza pakuba nu bumi poka nawe.

⁹Pakuti tuzimenye ukuti u Kilisitu azyukite kubufwe, nukuti ate akafwe sona—ubufwe bute sona nu bulaghili papache.

¹⁰Pachifukwa ichakuti akafwa, imbibi yite sona nu bulaghili papache. Po ilelo ubumi bwache bumamatilanite poka nu Chala.

¹¹Umwakuyana bulo, mubaghiye mwipimaye mwebene pakuba ngati mwe bantu abafwe ku mbibi, loli pakuba nu bumi pamaso pa Chala pakumamatilana poka nu Kilisitu u Yesu.

¹²Polelo mutakitikizye ukuti imbibi yilamulilaye amabili ghinyu ghagho ghakufwa, umwakuti mukonke ivinyonywa ivya mabili ghinyu.

¹³Mutakiyipe ichigaba chimo icha mubili winyu ku mbibi ukuti chibombe imbombo imbibi. Loli mwiyipe mwebene kwa Chala, ngati bo bantu babo bazyuka bulo kubufwe, sona bali nu bumi. Mwiyipe amabili ghinyu kwa Chala ukuti ghabombe imbombo ingolosu.

¹⁴Imbibi yitakwiza pakuba nu bulaghili papinyu pakuti mute pasi pa bulaghili ubwa ndaghilo, loli pasi pachisa icha Chala.

¹⁵Po, buli lelo? Nkimba tubombe imbibi ichifukwa tuli pasi pa bulaghili ubwa ndaghilo, loli tuli pasi pachisa icha Chala? Awe, napo panandi!

¹⁶Nkimba mutazimenye ukuti bo mukwiyipa mwebene ukwivwila umuntu yumo ngati bo bazya, naloli mwe bazya aba muntu yuyo mukumwivwila—pamo mwe bazya aba mbibi zizyo zikwiza nu bufwe, pamo mwe bazya aba lwivwilo lulo lukumunena umuntu pakuba mugholosu pamaso pa Chala?

¹⁷Loli amapalo ghabanje kwa Chala, napapo akabalilo kamo mukaba mwe bazya abambibi, loli ilelo mukwivwila nu moyo winyu ghosi ubwanaloli ubwa vimanyisyo vivyo mukapokela.

¹⁸Mwasatuliwa ku mbibi, sona ilelo mwaba bazya aba bugholosu.

¹⁹Inkubombela neno iya siku ni siku ukuyana na kivwisizye kinyu. Akabalilo kamo mukiyipa mwebene ngati bo bazya aba bunyazu nu bubibi pakubomba inyazu. Umwakuyana bulo, ilelo mubaghiye mwiyipe mwebene ngati bo bazya aba bugholosu ukuti mubombaye imbombo izelu.

²⁰Akabalilo kako mukaba mwe bazya aba mbibi, mukaba babuke ku bulaghili ubwa bugholosu.

²¹Nkimba mukakabapo choni pakubomba ivintu ivyakukozya isoni vinivi? Pakuti ubumalilo ubwa vintu vinivi, bo bufwe bwene!

²²Loli pakuti ilelo mwasatuliwa ku mbibi, po mwaba mwe bazya aba Chala. Chicho mwakabapo bumi ubuzelu, sona bumalilo bwache, bo bumi ubwa bwila na bwila.

²³Pakuti amalipilo agha mbibi, bo bufwe. Loli ichabupi ichabulo icha Chala, bo bumi pakumamatilana poka nu Kilisitu u Yesu u Mwene witu.