Read lambya LOMA 8 Bible Online

LOMA 8 - lambya bible

LOMA 8

¹Polelo abantu babo bakumamatilana poka nu Kilisitu u Yesu, ilelo yitalipo nayimo-yimo inongwa iyakubasusya nayo.

²Pakuti indaghilo izya Muzimu Umuzelu zizyo zikutupa aswe ubumi ukwendela mwa Kilisitu u Yesu, zinyabuye ku ndaghilo izya mbibi na kubufwe bulo.

³U Chala akabomba zizyo Indaghilo izya Mozesi zikapotwa pakubomba, ichifukwa ubuntu ubwa mbibi butakaba na maka. Akapota imbibi mu buntu ubwa mbibi pakutuma u Mwana wache mwene na mwene, yuyo akiza nu buntu ngati bwitu twe bantu aba mbibi, ukuti abanje chakwiyipa icha mbibi.

⁴U Chala akabomba zinizi ukuti ubwanaloli bubo Indaghilo izya Mozesi bukulonda buboneke mu aswe twe bantu babo tutakukonka ubuntu bwitu ubwa mbibi, loli tukumwivwila u Muzimu Umuzelu.

⁵Abantu babo bakukonka ubuntu bwabo ubwa mbibi, bakubika inyinong'ono zyabo pa vinyonywa ivya mubili. Loli abantu babo bakumwivwila u Muzimu Umuzelu, bakubika inyinong'ono zyabo pavintu vivyo u Muzimu Umuzelu akuvilonda.

⁶Nanti umuntu akubika inyinong'ono zyache pa buntu ubwa mbibi, ubumalilo bwache, bo bufwe bwene. Loli nanti umuntu akubika inyinong'ono zyache pavintu vivyo u Muzimu Umuzelu akuvilonda, ubumalilo bwache, bo bumi nu mutende.

⁷Nanti umuntu akubika inyinong'ono zyache pa buntu ubwa mbibi, we mulwani uwa Chala pakuti atakukonka Indaghilo izya Chala, naloli-loli atangavwilapo nalumo.

⁸Abantu babo bakubika inyinong'ono zyabo pa buntu ubwa mbibi, batangamuhobosya u Chala.

⁹Amwe mutakukonka sona ubuntu bwinyu ubwa mbibi. Loli mukukonka zizyo u Muzimu Umuzelu akubabuzya—naloli nanti, u Muzimu uwa Chala akwikala mumwinyu. Loli nanti umuntu ate nu Muzimu uwa Kilisitu, yunuyu ate wa Kilisitu.

¹⁰Loli nanti u Kilisitu ali mumwinyu, kokuti umuzimu winyu ghuli nu bumi pakuti u Chala abanena pakuba bagholosu pantazi papache, napapo amabili ghinyu ghakwiza pakufwa ichifukwa icha mbibi.

¹¹Sona nanti umuzimu uwa Chala yuyo akamuzyusya u Yesu kubufwe ali mumwinyu, po wepe yuyo akamuzyusya u Kilisitu kubufwe akwiza pakughapa amabili ghinyu ubumi, ghagho ghakufwa, ukwendelela mu Muzimu wache yuyo ali mumwinyu.

¹²Polelo bakamu bane, tuli ni nkongole, loli inkongole yache yite yakuti tubombele nayo vivyo ubuntu bwitu ubwa mbibi bukulonda, awe.

¹³Pakuti nanti mukukonka ubuntu bwinyu ubwa mbibi, mukwiza pakufwa. Loli nanti u Muzimu Umuzelu akubavwa pakughogha imbombo zyinyu izya mubili, mukwiza pakuba nu bumi.

¹⁴Pakuti abantu babo bakulongoziwa nu Muzimu uwa Chala, bo bana aba Chala.

¹⁵Pakuti u Muzimu yuyo mukapokela ate wakuti abapele pakuba bazya pakunyila. Loli u Muzimu yula akubapela pakuba bana Chala, sona ukwendela mu maka ghache, aswe tukulila kwa Chala ukuti, “Tata, we Tata wane!”

¹⁶Umwenecho u Muzimu Umuzelu akusimikila poka nu muzimu witu ukuti aswe twe bana aba Chala.

¹⁷Po nanti aswe twe bana aba Chala, tukwiza pakupokela nabo ulusayo lulo abasungiye abantu bache. Sona tukwiza pakupokela poka nu Kilisitu ulusayo lulo u Chala amusungiye. Pakuti nanti tukugabana intamyo nu Kilisitu, tukwiza pakugabana poka nawe ubuchindamu bwache.

¹⁸Inkupima ukuti intamyo zizyo tuli nazyo losi ulu zitangafwanikiziwa napo panandi nu buchindamu bubo bukwiza pakuvumbuliwa kukwitu.

¹⁹Ivipeliwa vyosi amaso ghabo ghali kuzila pakulindilila ukuti u Chala abavumbule abana bache.

²⁰Ivipeliwa vikapeliwa ukuti vibaghiye pakusita pakuba ni mbombo, chite chifukwa ichakuti vikalondagha ukuti vibanje bula-bula, loli pachifukwa ichakuti u Chala akaba we yuyo akalonda ukuti vibanje bula-bula. Loli pakaba ulusubilo

²¹ulwakuti ivipeliwa vyosi vikwiza pakusatuliwa kubuzya ubwa bubozu nukupokela ubusatuke nu buchindamu ubwa bana aba Chala.

²²Pakuti tuzimenye ukuti mupaka pakabalilo aka ivipeliwa vyosi vikukoloma nu bubavu ngati mukolo pakabalilo akakusayiwa.

²³Loli vite vipeliwa vyene vivyo vikukoloma; aswe twe tuli ni seke izyakwanda izya Muzimu Umuzelu, naswe tukukolomela mukasi-kasi, bo tukulindilila ukuti u Chala utupele pakuba twe bana bache, sona nu kughapoka amabili ghitu ghosi.

²⁴Pakuti lukaba lusubilo lwitu lulo tukapokiwa nalo. Loli ulusubilo lulo lukuboneka na maso, lute lusubilo. Nkimba muntu wenu yuyo akusubila ichintu chicho akuchennya na maso ghache?

²⁵Loli nanti tukulindilila chicho tutakuchennya na maso, tukuchilindilila nu bololo.

²⁶Umwakuyana bulo, wepe u Muzimu Umuzelu akutwavwa aswe twe bantu abadedebazu. Pakuti tutamenye namumo tubaghiye pakwiputila, umwenecho u Muzimu Umuzelu akutwiputila kwa Chala nukukoloma, kuko kutanganeniwa na mazyu.

²⁷Sona u Chala yuyo akwenelezya mukasi mumoyo ghitu, azimenye mumo zibeleye inyinong'ono izya Muzimu Umuzelu pakuti u Muzimu Umuzelu akubiputila abantu bache abazelu ukuyana nu bwighane bwache.

²⁸Tuzimenye ukuti ivintu vyosi vikubendela akiza abantu babo bamughanite u Chala, babo bitiziwa ukuyana nu bwighane bwache.

²⁹Pakuti abantu babo u Chala akabasala kale, akabapaghula pakuba ngati we Mwana wache, umwakuti u Mwana wache abanje ngati we katote mu bakamu abinji.

³⁰Po sona abantu babo u Chala akabapaghula, bope akabitizya, sona babo akabitizya, bakaneniwa pakuba bantu bagholosu pantazi papache, sona akagabana nabo ubuchindamu bwache.

³¹Mu vyosi vinivi, po nkimba tungati choni? Nanti u Chala ali kulubazu lwitu, we wenu angatususya?

³²Ate we Chala, awe, yuyo atakatwima u Mwana wache, loli akamubika ukuti chibanje chakwiyipa pachifukwa icha twebosi! Akatupa u Mwana wache, nkimba atangatupa sona pa bulo ivintu vyosi?

³³Nkimba we wenu akwiza pakubasusya abantu abasaliwa aba Chala? Umwenecho u Chala we yuyo akubanena ukuti bate ni nongwa pantazi papache!

³⁴Po we wenu akwiza pakunena ukuti bali ni nongwa? Ate we Kilisitu u Yesu awe, yuyo akafwa, nkani-nkani yuyo akazyuka kubufwe nukuba nu bumi, sona ali kunyobe indilo iya Chala. Akutwiputila aswe kwa Chala!

³⁵Nkimba we wenu angatusabulannya nu lughano ulwa Kilisitu? Fwandi intamyo pamo amayimba, pamo ukuvwimiwa, pamo izala, pamo ubupina, pamo ivyakoghofya, pamo ubufwe?

³⁶Pakuti Amasimbo ghakuti, “Utubalilo tosi tuli muntamyo izya bufwe pachifukwa icha mwemwe. Tuli ngati zyo ng'ozi zizyo zikubuka pakughoghiwa.”

³⁷Awe, loli muvintu vyosi vinivi twe bapoti ukwendela mu yuyo akatughana aswe.

³⁸Pakuti naloli izimenye ukuti nachimo-chimo chicho chingatusabulannya aswe nu lughano lwache. Napapo ubufwe pamo ubumi, napapo abantumi aba kumwanya pamo abalaghili aba kumwanya pamo abamaka, napapo ivintu vivyo vilipo ilelo pamo vivyo vikwiza muntazi,

³⁹napapo ichisu icha kumwanya pamo ichisu ichapasi—chitalipo nachimo-chimo muvipeliwa vyosi chicho chingatusabulannya aswe nu lughano ulwa Chala, lulo lwitu ukwendela mwa Kilisitu u Yesu u Mwene witu.