Read lambya 1 KOLINTI 9 Bible Online

1 KOLINTI 9 - lambya bible

1 KOLINTI 9

¹Nkimba ane inte ne musatuke? Fwandi, ane inte ne mutumiwa? Nkimba intamwenizyepo u Yesu, u Mwene witu? Nkimba amwe mute mwe seke izya mbombo yiyo inkamubombela u Mwene?

²Napapo abantu abanji bakwinong'ona ukuti inte ne mutumiwa, loli amwe muzimenye ukuti ne mutumiwa naloli, pakuti amwe mwe chisimikizyo chane ichakuti ane ne mutumiwa naloli.

³Bo abantu bakundalusya-ndalusya inkwiyimila nemwene ulu:

⁴Nkimba aswe tute nu busatuke ubwakupokela ivyakulya ni vyakung'wela?

⁵Nkimba aswe tute nu busatuke ubwakubomba vivyo bakubomba abatumiwa abanji, sona na bakamu aba Mwene, sona nu Pitala, pakulongozannya nu muchi uwa Chikilisitu pa bulendo bwitu?

⁶Nkimba nene ne mwene nu Balanabasi twe tubaghiye pakubomba imbombo ukuti twilondele twebene vivyo tukusobelwa?

⁷Nkimba musikali wenu yuyo akwilipilila mwene? Nkimba mulimi wenu uwa mampesya yuyo atakulyapo amampesya ghache? Nkimba mudimi wenu yuyo atakung'welapo ulukama ulwa ng'ozi zizyo akudima?

⁸Nkimba inkunena zinizi na mahala agha buntu bulo? Nkimba Indaghilo zyope zitakunena ivintu vili vyoka?

⁹Pakuti zisimbiwe mu Ndaghilo izya Mozesi ukuti, “Mtakayipinyaye ing'ombe kumulomo, bo yikupula amalezi.” Nkimba kokuti u Chala akwinong'onela ni nkambaku bulo?

¹⁰Naloli akanena zinizi pachifukwa icha sweswe, buli, mute momumo? Izi zikasimbiwa pachifukwa icha sweswe, umwakuti yuyo akulima, sona na wepe yuyo akukoma, babombe nu lusubilo ulwakuti bakwiza pakupokela ichigaba icha nyinulo yila-yila.

¹¹Nanti aswe tukapesa imbeyu iya buzimu mumwinyu, po choni chicho chipala ukuti aswe tupotwe pakupokela ivyakusobelwa vyitu kukwinyu?

¹²Nanti abanji bali nu busatuke ubwakupokela vinivi kukwinyu, po nkimba aswe tutangapokela ukuchilapo? Aswe tutakabombezya ubusatuke bwitu, awe. Loli tukafisa ilyoyo muvintu vyosi, umwakuti kutakabeko nachimo ichakukanizya Amazyu Amiza agha Kilisitu.

¹³Nkimba mutazimenye ukuti abantu babo bakubomba mu Nyumba iya Chala bakulya ivya munyumba iya Chala, sona nukuti babo bakubika ivyabupi pachighemo bakupokela pa vyakwiyipa vila-vila?

¹⁴Umwakuyana bulo, u Mwene akalamula ukuti abantu babo bakulumbilila Amazyu Amiza bapokelaye ubwavwilizi bwabo mu bulumbilili bula-bula.

¹⁵Loli ane intabubombeyepo nalumo-lumo ubusatuke bunubu napo panandi, awe, pamo intakusimba ukalata uyu ilelo nu lusubilo ulwakuti mukwiza pakumbombela ivintu vinivi. Pakuti chingaba chizapo ukuti ane imfwe nukuchila ukuti umuntu anfyule ichintu chicho inkwituvikizyamo.

¹⁶Loli bo inkulumbilila Amazyu Amiza, ane intakwituvikizyamo ichifukwa u Mwene akandamula pakubomba bunubu. Imbanje muntamyo nanti intakulumbilila Amazyu Amiza.

¹⁷Pakuti nanti inkabombagha imbombo iyi nu bwighane ubwane nu bwane, po ngali napokela umuvwalo, loli inkubomba bulo imbombo yiyo u Chala akampa.

¹⁸Po nkimba umuvwalo wane gho ghoni? Umuvwalo wane wakuti indumbililaye Amazyu agha Chala ukusita kulipiliwa kamo, pamo ukubombezya ubusatuke bwane ubwakupokela pachifukwa icha kulumbilila Amazyu Amiza.

¹⁹Ane ne musatuke, sona inte ne muzya uwa muntu yumo, awe. Loli inkipela nemwene pakuba muzya uwa bantu bosi, umwakuti inkabepo abantu abinji.

²⁰Bo inkubomba na ba Yuda inkaba ngati ne mu Yuda, umwakuti inkabepo aba Yuda bala-bala. Bo inkubomba na bantu babo bakaba pasi pa Ndaghilo izya Mozesi, inkaba ngati ne yumo uwa pasi pa Ndaghilo, umwakuti inkabepo abantu babo bali pasi pa Ndaghilo izya Mozesi, napapo ane inte pasi pa Ndaghilo zila-zila.

²¹Bo inkubomba na bantu babo bate ba Yuda, inkaba ngati ne yumo uwa babo, umwakuti inkabepo abantu bala-bala, napapo inte ne musatuke ku Ndaghilo izya Chala, awe, loli indi pasi pa ndaghilo izya Kilisitu.

²²Bo inkubomba na bantu abadedebazu inkaba ngati ne muntu umudedebazu, umwakuti inkabepo abantu bala-bala. Bo indi poka na bantu bosi inkaba ngati bo babo, umwakuti nanti zingabombiwa impokepo abantu bamo mumwabo.

²³Inkubomba zyosi zinizi pachifukwa icha Mazyu Amiza, umwakuti nane bulo impokele nabo ulusayo ulwa Mazyu Amiza.

²⁴Nkimba mutazimenye ukuti muchipalano abantu abinji bakuchimbila, loli umuntu weka bulo we yuyo akupokela umuvwalo? Po, ukuchimbila kwinyu kubanje kwakuti mupokele nako umuvwalo.

²⁵Umuntu wesi yuyo ali panyangalo iyakuchimbila, akwikanizya muvintu vyosi, umwakuti apokele inkata iya maluba[3] yiyo yikufoka, loli aswe tukulonda pakupokela inkata yiyo yitakufokapo nalumo.

²⁶Ichi cho chifukwa intakuchimbila ngati ne muntu yuyo akuchimbila mwalwe-mwalwe bulo, ane intakuyana nu wankonya yuyo akubwinda-bwinda bulo.

²⁷Loli inkughufunda nukughukazya umubili wane ni nkonya nukughupela pakuba muzya, umwakuti bo nalumbilila Amazyu Amiza pakasi pa bantu banji, ane nemwene, intakapotwe pakupokela umuvwalo.