Read lambya 2 KOLINTI 10 Bible Online

2 KOLINTI 10 - lambya bible

2 KOLINTI 10

¹Ane ne Pabuli, yuyo abantu bamo bakuti, “Ne mogha, bo indi namwe pamaso na pamaso, loli ne mujivu, bo indi kubutali namwe.” Inkubalaba mwitabwa ilya Kilisitu yuyo mololo sona wachisa

²ukuti bo niza kukwinyu intakabe ne mujivu ukuyana na mumo ninong'onelagha pakuba pakasi pa bantu bamo babo bakwinong'ona ukuti tukwikala ukuyana ni nyinong'ono izya buntu.

³Napapo tukwikala muchisu ichapasi ichi, loli tutakulwa inkondo na maka agha buntu.

⁴Pakuti ivilwilo vivyo tukulwila navyo inkondo, vite vilwilo ivya buntu, awe, loli maka agha Chala aghakuti tumongolannye nagho amalinga agha balwani.

⁵Sona tukumongolannya nagho amadali, sona na mituvyo ghosi ghagho ghakukanizya abantu pakumumanya u Chala. Tukuzipela inyinong'ono zyosi ukuti zimwivwile u Kilisitu.

⁶Po twiyanizye pakumalana nu muntu wesi uwamadinko, bo ukwivwila kwinyu kwafikapo.

⁷Amwe mukwennya bulo pamwanya-mwanya. Nanti umuntu yumo isubiye ukuti wa Kilisitu, mumuleke ikumbuzye mwene ukuti pakuba wa Kilisitu, po naswe bulo twe ba Kilisitu.

⁸Intakwiza pakukoziwa nacho isoni, napapo ningituvya mubusatuke nu bulaghili bubo u Mwene akatupa pakubakazya nabo, mubuyo ubwakubanangannya.

⁹Intakulonda pakuboneka ngati po inkuboghofya amwe na bakalata bane aba.

¹⁰Pakuti bamo bakuti, “Abakalata aba Pabuli bang'wamu sona bakafu, loli bo umwene ali naswe pamaso na pamaso, mudedebazu, sona amazyu ghache ghabulo!”

¹¹Abantu banaba bivwisyanje ukuti patalipo ukulekana pakasi pavivyo tukusimba mubakalata bitu, bo tuli kubutali na vivyo tukwiza pakubomba, bo tuli poka namwe.

¹²Tutakuyezya ukwibikapo pamo ukwifwanikizya twebene na babo bakwipala bene, awe. Loli bo bakwipima bene na bene, sona bo bakwifwanikizya bene na bene, abene bakwilanjizya ubupunganu bwabo.

¹³Loli aswe tutakwiza pakwituvya ukuchila impaka. Tukwiza pakuba mukasi-kasi mumpaka zizyo u Chala akatuyanizya, sona ichi chikongannyapo imbombo yitu mumwinyu.

¹⁴Pakuti tutachilite impaka yitu, ngati po tutakiza kukwinyu. Aswe tukaba bakwanda ukufika kukwinyu pakulumbilila Amazyu Amiza aghakunena nizya Kilisitu.

¹⁵Sona tutakwituvya ukuchila impaka ni mbombo yiyo abantu abanji babomba, awe. Loli ulusubilo lwitu lwakuti, ulwitiko lwinyu lukonjelela-konjelela, imbombo yitu mumwinyu yingonjelela nkani,

¹⁶umwakuti tungalumbilila Amazyu Amiza muvigaba ukuchila impaka zyinyu. Tutakulonda ukwituvya ni mbombo yiyo yibombiwe kale mumughunda uwa muntu yumo.

¹⁷Loli Amasimbo ghakuti, “Umuntu wesi yuyo akulonda pakwituvya, ituvikizyanje pazizyo u Mwene abomba.”

¹⁸Pakuti ate muntu yuyo akwipala mwene itikiziwe pamaso pa Mwene, loli umuntu yuyo u Mwene amwitikizya pantazi papache.