Read lambya GALATIYA 1 Bible Online

GALATIYA 1 - lambya bible

GALATIYA 1

¹Ane ne Pabuli, nene intakitiziwa nu muntu pamo abantu pakuba mutumiwa, loli inkitiziwa nu Yesu Kilisitu, sona nu Chala Uwise, yuyo akamuzyusya kubufwe.

²Ane na bakamu bane bosi babo bali poka nane, tukuvisimbila ivipanga ivya mu Galatiya.

³Ichisa nu mutende ivyakufuma kwa Chala Utata, sona ni vyakufuma kwa Mwene witu u Yesu Kilisitu vibanje namwe.

⁴U Kilisitu akiyipa mwene pachifukwa icha mbibi zyitu ukuti atupoke ku nkulilo iya mbibi iyi, ukuyana nu bwighane ubwa Chala witu, sona yuyo we Tata.

⁵U Chala achindikiwanje bwila na bwila! Ameni.

⁶Inkubaswigha nkani ichifukwa mwamuleka umwalubilo-lubilo bulo, yuyo akabitizya amwe ni chisa icha Kilisitu nukupindukila ku mazyu amiza aghanji bulo,

⁷ghagho ghate Mazyu Amiza aghanaloli, awe. Loli balipo abantu bamo babo bakubapungannya nukuyezya pakughanyongannya Amazyu Amiza agha Kilisitu.

⁸Loli napapo tungaba aswe, pamo uwantumi uwa kumwanya, alumbilile kukwinyu amazyu ghagho ghalekanite na Mazyu Amiza ghagho tukalumbilila kukwinyu, umuntu yunuyu ichighune chibanje papache.

⁹Twanenela kale, po losi ulu inkupyanizya sona ukuti nanti umuntu yumo akulumbilila kukwinyu amazyu ghagho ghalekanite na Mazyu Amiza ghagho mukapokela, umuntu yunuyu ichighune chibanje papache.

¹⁰Nkimba mukwinong'ona ukuti inkulonda amapalo agha bantu? Awe, loli inkulonda amapalo agha Chala. Fwandi, mukwinong'ona ukuti inkuyezya pakubahobosya abantu? Nanti inkuyezya pakuhobosya abantu, po ngali inte ne wambombo wa Kilisitu.

¹¹Mwee bakamu bane, leka imbabuzye: Amazyu Amiza ghagho inkalumbilila kukwinyu ghate gha bantu, awe.

¹²Pakuti intakaghapokelapo ku muntu yumo pamo ukumanyiziwa, awe. Loli inkaghapokela ukwendela mu buvumbuli, bubo u Yesu Kilisitu umwenecho akanvumbulila.

¹³Amwe mwivuye nizya nkalo yane bo inchili indi mu Chiyuda. Mwivuye namumo inkachivwimila ichipanga icha Chala ukusita ichisa nukuyezya pakuchinangannya.

¹⁴Ane inkabachila aba Yuda abinji abankulile yane mulwitiko ulwa Chiyuda, sona inkiyula nkani pakukonka inyiho izya banyenya bitu.

¹⁵Loli u Chala akampaghulila zila bo inchili na pakupapiwa bulo, nukunyitizya muchisa chache. Bo ahoboka nane,

¹⁶akanvumbulila ane u Mwana wache, umwakuti imulumbilile pakasi pa bantu babo bate ba Yuda. Intakabukako na ku muntu nayumo-yumo pakulaba amahala, awe.

¹⁷Intakabukako nako ku Yelusalemu ku bantu babo bakaba batumiwa, bo ane inchili pakuba mutumiwa. Loli umwakusita ukuzyela inkabuka ku Alebiya, sona pisinda pache inkanyokela ku Damasika.

¹⁸Pisinda pache bo ghachilapo amaka matatu, inkabuka ku Yelusalemu ukuti nangale nu Pitala nukwikala nawe abasabata babili.

¹⁹Intakamwennyapo umutumiwa uyunji, loli mwene u Yakobo,[1] yuyo mukamu uwa Mwene.

²⁰Inkusimikizya pamaso pa Chala ukuti zizyo nabasimbila, zite zyabumyasi, awe.

²¹Pisinda pache inkabuka ku Siliya, sona na ku Kilikiya.

²²Loli ivipanga vyosi ivya Kilisitu ivya mu Yudeya vitakamanya ane pamaso.

²³Bakivwanga bulo vivyo vikaneniwanga ukuti, “Umuntu yuyo pakwanda akatuvwimagha, ilelo akulumbilila nizya lwitiko, lulo akayezyapo pakulunangannya.”

²⁴Po bakamupala u Chala pachifukwa icha nene.