Read lambya GALATIYA 6 Bible Online

GALATIYA 6 - lambya bible

GALATIYA 6

¹Mwee bakamu bane, nanti umuntu yumo awila mumbibi, amwe mwe mukulongoziwa nu Muzimu Umuzelu, mumwavwe umuntu yunuyu nu moyo umololo. Loli namwe bulo muchebaye ukuti mutakayeliwanje.

²Munyamulilanaye ukatundu, sona pakubomba bunubu mukwiza pakukwanilisya indaghilo izya Kilisitu.

³Pakuti nanti umuntu yumo akwipima mwene ukuti we muntu naloli, po muntu bulo, akwizimbula bulo mwene.

⁴Umuntu wesi ipime mwene ni mbombo zyache. Po angituvya mwene ni mbombo zyache, ukusita ukwifwanikizya mwene nu muntu yumo.

⁵Pakuti umuntu wesi anyamulaye ukatundu uwache nu wache.

⁶Umuntu wesi yuyo akumanyiziwa amazyu agha Chala, agabane nu muntu yuyo ukumumanyizya ivyiza vyosi vivyo ali navyo.

⁷Mutakizimbulaye mwebene! U Chala atangangaziwa. Umuntu akwiza pakwinula chicho akupesa.

⁸Pakuti umuntu yuyo akupesa ivinyonywa ivya buntu, chicho akwiza pakwinula bo bufwe. Loli umuntu yuyo akupesa mwa Muzimu Umuzelu, chicho akwiza pakwinula bo bumi ubwa bwila na bwila.

⁹Po mutakalitaye pakubomba ivyiza, pakuti pakabalilo kache akiza tukwiza pakwinula nanti tutakuwa amaka.

¹⁰Polelo bo tuli nu lusako, zagha tubabombelaye ivintu ivyiza abantu bosi, nkani-nkani abantu babo bali mukabukatila aka bitiki.

¹¹Ennya ubusimbe ubukulu-kulu bubo inkubasimbila ni nyobe iyane ni yane!

¹²Abantu babo bakwilanjizya ukuti bantu biza, bakuyezya pakubafyenga ukuti musilimuliwe. Bakubomba zinizi ukuti batakavwimiwanje pachifukwa icha chipinjika icha Kilisitu.

¹³Na bantu babo basilimuliwe, bope batakukonka Indaghilo, loli bakulonda musilimuliwe ukuti chibanje chintu chimo ichakutuvikizyapo.

¹⁴Loli ane katalipo nakamo akakwituvikizyapo, loli chene ichipinjika icha Mwene u Yesu Kilisitu. Pakuti u Yesu akakomeliwa pachipinjika, umwakuyana bulo, ivintu ivya muchisu ichapasi ichi vyakomeliwa kukwane, sona nane inkomeliwe ku vintu ivya muchisu ichapasi ichi.

¹⁵Manyi kusilimuliwa pamo ukusita ukusilimuliwa vitakung'anamula nachimo. Loli chicho chili ni ching'anamulo ichakuti umuntu abanje chipeliwa ichipya.

¹⁶Umutende ni chisa ivyakufuma kwa Chala vibanje na bosi babo bakwenda muzila yiniyi, poka na bantu bosi abenecho aba Chala.

¹⁷Pabumalilo: Atakabepo nayumo umuntu uwakunjivya, pakuti indi na mabala agha Yesu pamubili wane.

¹⁸Mwee bakamu bane, ichisa icha Mwene witu u Yesu Kilisitu chibanje namwe. Ameni.