Read lambya EFESO 1 Bible Online

EFESO 1 - lambya bible

EFESO 1

¹Ane ne Pabuli, umutumiwa uwa Kilisitu u Yesu ukuyana nu bwighane ubwa Chala. Inkubasimbila amwe mwe bantu abazelu aba Chala babo bali mu Efeso, sona babo basubiliwa mwa Kilisitu u Yesu.

²Ichisa nu mutende ivyakufuma kwa Chala u Tata witu, sona nu Mwene u Kilisitu u Yesu vibanje namwe.

³Amapalo ghabanje kwa Chala, Uwise uwa Mwene witu u Yesu Kilisitu, yuyo atusayite aswe mwa Kilisitu pakutupa ulusayo ulwakulekana-lekana ulwa buzimu kumwanya.

⁴Pakuti akatusala aswe mwa Kilisitu, bo ni chisu ichapasi chitapeliwe ukuti tubanje bantu abazelu, sona na basita chilema pantazi papache.

⁵Pachifukwa ichakuti akatughana akatuyanizya zila ukuti atupokele pakuba bana bache mwa Yesu Kilisitu. Akabomba zinizi pachifukwa ichakuti akalondagha pakulanjizya ichisa chache.

⁶Zagha tumupale u Chala pachifukwa icha chisa chache icha buchindamu pakutupa umwana wache umughaniwa ukuti abanje chabupi bulo.

⁷Aswe twabukite ukwendela mwibanda lyache, sona akatuhobokela imbibi zyitu ukuyana nu bukulu ubwa chisa icha Chala,

⁸chicho akatupa pachifukwa icha maka na mahala ghache.

⁹Na mahala ghache ghosi, sona na kivwisizye kache atuvumbuliye izya kubusyefu izya bwighane bwache ukuyana ni chisa chache, chicho akayanizya zila mwa Kilisitu.

¹⁰Ulubatiko ulu, lulo u Chala akwiza pakumalizya bo akabalilo kakwana lwakuti, u Chala akwiza pakubungannya poka ivipeliwa vyosi, ni vintu vyosi ivya kumwanya nivya muchisu ichapasi ichi, po u Kilisitu akwiza pakuba mutu.

¹¹Ivintu vyosi vikubombiwa ukuyana na kabatikile na kadumulile aka Chala. U Chala akatusala mwa Kilisitu ukuti tubanje bantu abache na bache. Pakuti iyi yikaba yo fundo yache, ukuyana na mumo akadumulila po pabwandilo.

¹²Ifundo yache yikaba yakuti aswe twe tukaba bakwanda pakuba nu lusubilo mwa Kilisitu, tubupale ubuchindamu bwache.

¹³Namwe bulo mukaba bantu aba Chala, bo mwivwa amazyu aghanaloli, ghagho gho Mazyu Amiza aghabupoki bwinyu. Amwe mukasubila mwa Kilisitu, sona u Chala akabika ichidindo papinyu ukulanjizya ukuti mwe bantu abache na bache pakubapa u Muzimu Umuzelu, yuyo akabalayizya.

¹⁴U Muzimu Umuzelu yunuyu we chikole icha vintu vivyo u Chala akabalayizya abantu bache, sona nukuti naloli u Chala akwiza pakubapoka abantu, babo akabasatula ukuti babanje bache na bache. U Chala apaliwanje nukupokela ubuchindamu.

¹⁵Pachifukwa ichi, bo nivwa nizya lwitiko lwinyu mwa Mwene u Yesu, sona nu lughano lwinyu pa bantu bosi abazelu aba Chala,

¹⁶intalekitepo nalumo-lumo pakumupalizya u Chala pachifukwa icha mwemwe. Inkubakumbuka amwe munyiputo zyane ukumulaba,

¹⁷u Chala uwa Mwene witu u Yesu Kilisitu, sona nu Tata umuchindamu, ukuti abape umuzimu uwamahala nu wabuvumbuli ukuti mumumanye akiza.

¹⁸Inkwiputa sona ukuti Umuzimu Umuzelu ighule amoyo ghinyu umwakuti mulwennye ulukozyo lwache umwakuti mungalumanya ulusubilo, lulo u Chala akabitizizya. Nalondagha sona ukuti mumanye ukukula kwache ukwa bukabi nu lusayo, lulo u Chala akabalayizya abantu bache.

¹⁹Inkulonda sona ukuti mumanye amaka ghache ghagho ghachilite ni chipimilo ghagho ghali pambombo mumwitu, aswe twe tukusubila, ukuyana na maka ghache amakulu nkani.

²⁰Akabombezya amaka ghala-ghala pakumuzyusya u Kilisitu kubufwe nukumwikazya kunyobe yache indilo muchisu icha kumwanya.

²¹Ilelo u Kilisitu ali pamwanya pa bamwene bosi, na balaghili bosi, na basongo bosi aba kumwanya, sona ali pamwanya pamatabwa ghosi, ghagho abantu bangitiziwa nagho akabalilo aka, pamo na kabalilo kako kakwiza.

²²U Chala akavibika ivintu vyosi pasi panyayo izya Kilisitu, sona akamwikazya pamwanya pavintu vyosi pakuba mutu uwa chipanga.

²³Ichipanga ichi gho mubili uwa Kilisitu, sona chizuye nu Kilisitu yunuyu, yuyo akwizuzya ivintu vyosi umwakufikapo.