Read lambya EFESO 6 Bible Online

EFESO 6 - lambya bible

EFESO 6

¹Mwe bana, mubivwilaye abapapi binyu mwa Mwene, pakuti zinizi zyo zizyo mubaghiye pakubomba.

²“Chindika ughuso nu nyoko” lyo lilamulo ilyakwanda lilyo lili ni layizyo ilyakuti:

³“umwakuti ivintu vyosi vikwendelaye akiza, sona nukuti amasiku agha bumi bwako muchisu ichapasi ichi ghabanje minji.”

⁴Namwe bulo mwe bawise, mutakabakalalizyanje abana binyu, loli mubakuzye akiza pakubamanyizya ivimanyisyo ni ndaghilo izya Mwene.

⁵Amwe mwe bazya, mubivwilaye abamwene binyu aba muchisu ichapasi ichi nu bogha, sona nu muchizi uwenecho. Mubombaye zinizi nu moyo uwanaloli ngati po mukumubombela u Kilisitu.

⁶Mutakabombaye bunubu ukuti mubahobosye bo bakubenelezya, awe. Loli amwe mwe bazya aba Kilisitu, po mubombaye nu moyo ghosi zizyo u Chala akulonda.

⁷Bomba imbombo yinyu mubuhobosu ngati po mukumubombela u Mwene, abantu, awe.

⁸Pakuti muzimenye ukuti u Chala akwiza pakumupa umuntu wesi umuvwalo wache ukuyana ni mbombo inyiza zizyo abomba, manyi muzya, manyi musatuke.

⁹Umwakuyana bulo, namwe mwe bamwene, mubabombelaye bunubu abazya binyu. Mutakaboghofyanje pakuti muzimenye ukuti mwebosi muli nu Mwene winyu kumwanya, yuyo atakwennya icheni icha muntu.

¹⁰Ichabumalilo inkuti mwimaye nkani mwa Mwene, nukwimilila nkani mumaka ghache amakulu.

¹¹Muvwalaye ivilwilo vyosi vivyo u Chala akutupa, umwakuti mungalwa nu buchevu ubwa Satana.

¹²Pakuti tutakulwa na bantu, awe. Tukulwa na bamwene na balaghili, na maka agha muchisu icha chisi ichi, sona ni mizimu imibibi iya mumwanya.

¹³Polelo vwala ivilwilo ivya Chala, umwakuti mwimaye nkani pisiku lilyo mukwiza pakukomana ni vintu ivibibi, sona bo mwamala pakubomba vyosi ukuti mwimaye.

¹⁴Po mwimaye nkani, bo mwavwala ubwanaloli bubo we lamba mumisana yinyu. Vwala ubugholosu ubwa Chala pakuba chilwilo chinyu icha chela icha pachifuba.

¹⁵Ukwiyannya kwinyu pakulumbilila Amazyu Amiza aghamutende ko kubanje zyo nkwato zizyo mukuvwala kunyayo zyinyu.

¹⁶Ukonjelezya pavyosi vinivi mubanje nu lwitiko pakuba ngulu yinyu iyakuzimya nayo utulasilo utwakwaka umoto utwa Mubibi yula.

¹⁷Vwala ubupoki pakuba chisote chinyu, sona amazyu agha Chala ghabanje we panga uwa Muzimu Umuzelu.

¹⁸Mubombaye zyosi zinizi munyiputo. Akabalilo kosi mwiputaye kwa Chala ukuti abavwe. Akabalilo kosi mwiputaye umwakulongoziwa nu Muzimu Umuzelu. Pachifukwa ichi mubanje maso, sona mutakanyokelaye mwisinda. Mubiputilaye bwila abantu bosi abazelu aba Chala.

¹⁹Sona nane munyiputilaye ukuti u Chala abike amazyu mu mulomo wane bo inkufumuzya, umwakuti imbamanyizye abantu nu bujivu nkani nizya kubusyefu izya Mazyu Amiza.

²⁰Napapo indi mujele, ane ne mwimilili pachifukwa icha Mazyu Amiza ghanagha. Mwiputaye ukuti inene nu bujivu nkani ukuyana na mumo imbaghiye pakunenela.

²¹U Tikika, umukamu witu umughaniwa, sona yuyo mubombi umusubiliwa uwa Mwene, akwiza pakubabuzya amwe zyosi izya ane, sona nizya mbombo yiyo inkubomba.

²²Inkumutuma kukwinyu pafundo yiniyi ukuti mumanye namumo tubeleye, nukughakazya amoyo ghinyu.

²³Umutende nu lughano, sona nu lwitiko ivyakufuma kwa Tata u Chala, sona ni vyakufuma kwa Mwene witu u Yesu Kilisitu vibanje na bakamu bosi.

²⁴Ichisa icha Chala chibanje na bantu bosi babo bamughanite u Mwene witu u Yesu Kilisitu nu lughano lulo lutakufwapo nalumo-lumo.