Read lambya 1 TESALONIKA 4 Bible Online

1 TESALONIKA 4 - lambya bible

1 TESALONIKA 4

¹Pabumalilo, bakamu bane, mukamanyila kukwitu mumo mubaghiye mwikalilaye, umwakuti mumuhobosye u Chala ukuyana na mumo naloli mukwikalila. Po ilelo tukubalaba, nukubalambilizya nkani mwitabwa ilya Mwene u Yesu ukuti mubombaye bunubu ukuchilapo pakwanda.

²Pakuti muzimenye indaghilo zizyo tukabapa, zikafuma kwa Mwene u Yesu.

³Chicho u Chala akulonda cho ichi: Mubanje bantu abapaghuliwa, nu kubwepuka ubwamalaya.

⁴Umuntu wesi amanye pakughulamula umubili wache[2] ukuti ghubanje muzelu, sona muchindikiwa.

⁵Mutakabanje ni vinyonywa ivinyazu ukuyana na mumo bakubombela abantu abakuzi, babo batamumenye u Chala.

⁶Pafundo yiniyi, umuntu wesi atakamunangilaye umukamu wache, pamo ukusendelapo ulusako papache. U Mwene akwiza pakumufunda umuntu wesi yuyo akubomba bunubu, ukuyana na mumo tukababuzizya kale nukubasoka.

⁷U Chala atakatwitizya aswe ukuti tubombaye ubunyazu, loli ukuti tubanje bantu abazelu.

⁸Po umuntu wesi yuyo akukana ichimanyisyo chinichi, atakumukana umuntu, loli akumukana u Chala, yuyo akubapa u Muzimu wache Umuzelu.

⁹Pakunena nizya lughano pakasi pa amwe mwe bitiki, chite chakulondiwa ukuti tubasimbile, pakuti u Chala umwenecho akabamanyizya mumo mubaghiye pakughananilanagha.

¹⁰Naloli mubaghanite abakamu bosi aba muchigaba icha Makedoniya. Po tukubalaba amwe bakamu bitu, pakubomba bunubu ukuchilapo pakwanda.

¹¹Muyezye nkani pakuba nu bumi ubwabuchimyeka. Umuntu wesi amanye izyache ni zyache, sona abombaye imbombo ni nyobe zyache ukuyana na mumo tukababuzizya pakwanda.

¹²Bunubu abantu abakuzi bakwiza pakubachindika, po sona mutakwiza pakumusubila nayumo umuntu pavintu vivyo mukusobelwa.

¹³Bakamu bitu, tukulonda mumanye ubwanaloli nizya bantu babo bafuye, umwakuti mutakabe ni chitima ukuyana na bantu babo bate nu lusubilo.

¹⁴Tukusubila ukuti u Yesu akafwa nu kuzyuka sona kubufwe, tukusubila sona ukuti u Chala akwiza pakubazyusya poka nu Yesu, abantu babo bakafwila mumwache.

¹⁵Chicho tukubamanyizya ilelo cho chimanyisyo icha Mwene. Aswe twe tuchili twe bumi pisiku ilyakwiza sona ukwa Mwene tutakwiza pakulongolela pamaso pa bantu babo bafuye.

¹⁶Pakuti u Mwene umwenecho akwiza pakwika kumwanya nu kukolomoka ukukulu nkani, nizyu ilya wantumi usongo, sona nukulila ukwa ipati ilya Chala. Po abantu babo bakafwila mwa Kilisitu bakwiza pakuba bakwanda pakuzyuka.

¹⁷Pisinda pache aswe twe tuchili twe bumi, sona twe twasyala, tukwiza pakubungana poka nabo mu mabingu pakukomana nu Mwene mumwanya. Po tukwiza pakuba nu Mwene bwila na bwila.

¹⁸Polelo mukazannyanje na mazyu ghanagha.