Read lambya 2 TIMOTI 3 Bible Online

2 TIMOTI 3 - lambya bible

2 TIMOTI 3

¹Kumbuka ukuti mumasiku aghabumalilo kukwiza pakuba utubalilo utupala-pala nkani.

²Abantu bakwiza pakuba bakwiyighana bene, na baghana ndalama, na bakwitutumula, na bamituvyo, na bantuko, na basita kwivwila abapapi babo, na basita kupalizya, sona na basita ukumwiputa u Chala.

³Bakwiza pakuba basita lughano, na basita luhobokelo, na biyebo, na bavyongo, na bakoghofya, sona na balubengo pavintu ivyiza.

⁴Batakwiza pakuba basubiliwa, bakwiza pakuba bapopo, na bamituvyo, na bakughana ivyakwihobosya, mubuyo ubwa kumughana u Chala,

⁵napapo bakuboneka ngati po bakumwiputa u Chala, loli bakughakana amaka ghache. Ubaleghuke abantu banaba.

⁶Bamo aba bantu banaba bakwinjila munyumba izya bantu nukubazimbula abakolo babo badedebaye, babo bang'wamilwe nu katundu uwa mbibi. Abakolo banaba bakuwesiwa ni vinyonywa ivyakulekana-lekana,

⁷babo bakuyezya-yezya ukuti bamanyile, loli bate bakamanyilepo nalumo-lumo ubwanaloli.

⁸Ngati mumo u Yanesi nu Yambule bakamusambukila u Mozesi, umwakuyana bulo, abantu banaba bakabusambukila ubwanaloli. Abantu babo inyinong'ono zyabo zibumpite, sona babo bapotwe mulwitiko.

⁹Loli abene batakwiza pakufika pa butali, pakuti umuntu wesi akwiza pakwennya mumo bubeleye ubupunganu bwabo. Ichi cho chicho chikabombiwa bulo kwa Yanesi na kwa Yambulesi.

¹⁰Loli wakonka ichimanyisyo chane, inkalo yane, na chicho nalondagha mubumi bwane, nu lwitiko lwane, nu bufisalyoyo bwane, nu lughano lwane, nu bujivu bwane,

¹¹nukuvwimiwa kwane, sona na mayimba ghane. Uzimenye ukuti vyosi vivyo vikangwila mu Antiyokiya, na mu Ikoniya, sona na mu Lisitila, inkajimba nkani! Loli u Mwene akampoka muvintu vyosi vinivi.

¹²Umuntu wesi yuyo akulonda pakuba nu bumi ubwakumwiputa u Chala pakumamatilana poka nu Kilisitu u Yesu, naloli akwiza pakuvwimiwa.

¹³Loli abantu ababibi na bazimbuli bakwiza pakonjelela-konjelela akuba babibi nukubazimbula abantu abanji, loli bope bakwiza pakuzimbuliwa.

¹⁴Loli awe, endelela pakulemezya ubwanaloli bubo ukamanyiziwa, sona ubusubile nkani, pakuti ubamenye babo bakakumanyizya zinizi.

¹⁵Uzimenye sona ukuti ukwandila ko kubwana bwako, waghamanya Amasimbo Amazelu ghagho ghangakupa amahala ukuti upokiwe mwa Kilisitu u Yesu.

¹⁶Amasimbo ghosi ghakafutiliwa nu Chala, sona miza pakumanyizizya, pakususya chicho chibibi, pakugholosya chicho chinyonganite, sona nukubamanyizya abantu ukuti babanje ni nkalo ingolosu

¹⁷umwakuti umubombi uwa Chala abanje wakufikapo, sona wakwiyannya pakubomba imbombo zyosi inyiza izyakulekana-lekana.