Read lambya 2 TIMOTI 4 Bible Online

2 TIMOTI 4 - lambya bible

2 TIMOTI 4

¹Pantazi pa Chala na pamaso pa Kilisitu u Yesu, yuyo akwiza pakubalonga abantu abumi na bafwe bulo, sona pachifukwa ichakuti akwiza pakulaghila ngati we Mwene, inkukulamula ukuti

²ulumbililaye amazyu agha Chala. Wiyannye pakughalumbilila pakabalilo kako abantu bakughalonda, sona na pakabalilo kako abantu batakughalonda. Ubasoke nukubachemela, sona nukubakazya, bo ukubamanyizya nu bololo.

³Pakuti akabalilo kakwiza, po abantu bakwiza pakuchikana ichimanyisyo ichanaloli. Loli bakwiza pakukonka ivinyonywa vyabo nukwibunganikila bene abamanyisi abinji, babo bakwiza pakubabuzya zizyo amakutu ghabo ghakunyeghela ukuti ghivwe.

⁴Bakwiza pakusindila amakutu ghabo ukuti batakivwanje ubwanaloli nukuteghelezya utupangwi utwa bulo.

⁵Loli awe, wilemaye wemwene muvintu vyosi, nukujimba mumayimba. Bombagha imbombo iya bulumbilili, sona bombagha imbombo yako yosi ngati we mubombi uwa Chala.

⁶Loli ane, akabalilo kane kakwanite kale akakuti impunguliwe ukuti chibanje chakwiyipa ichakung'wela; akabalilo kane akakubukila kakwana.

⁷Nalwa inkondo inyiza, namalizya inyangalo iyakuchimbila, sona nasungilila ulwitiko.

⁸Ilelo chicho inkulindilila yo mpumpu iya bugholosu yiyo u Mwene, umulongi umugholosu, akwiza pakumpa pisiku ilyabumalilo. Polelo ate akampe nemwene awe, loli na bantu bosi abanji babo bakusamba nkani ukuboneka kwache.

⁹Uyezye-yezye ukuti wize kuno losi ulu.

¹⁰Pachifukwa icha kuvighana ivintu ivya muchisu ichapasi ichi, u Dema akantoloka nukubuka ku Tesalonika. U Kilisikeni akabuka ku Galatiya, sona wepe u Titi akabuka ku Dalimatiya.

¹¹U Luka mwene we yuyo ali poka nane kuno. Umusende u Maliko wize nawe kuno, pakuti anganyavwa mumbombo yane.

¹²U Tikika inkamutuma ku Efeso.

¹³Bo ukwiza, unsendeleko inkazo yane, yiyo inkamulekela u Kalipo mu Tulowa. Unsendeleko sona na mabuku bulo, nkani-nkani aghamakwela ghala.

¹⁴U Alikizandala, umusyani uwa vyela yula akambombela ububibi nkani. U Mwene akwiza pakumutanizya ukuyana ni mbombo zyache.

¹⁵Po nawe bulo uchebaye nawe, pakuti akasusannya nkani na mazyu ghitu.

¹⁶Pakabalilo akakwanda pakwiyimila nemwene panongwa yane, nayumo umuntu yuyo akiza pakunyavwa, loli abantu bosi bakantoloka. U Chala atakabelengele ukunanga kwabo.

¹⁷Loli u Mwene akaba kulubazu lwane nukumpa amaka, umwakuti inkalumbilila Amazyu umwakufikapo ukuti abantu babo bate ba Yuda bivwe. Pakubomba bunubu inkapona ku mulomo uwa nkalamu.

¹⁸U Mwene akwiza pakumpoka ku bubibi bosi nukunsunga akiza mupaka nukunyinjizya mu Bumwene bwache ubwa kumwanya. Kukwache kubanje ubuchindamu bwila na bwila! Ameni.

¹⁹Undamukileko u Pulisika nu Akwila, sona bamunyumba iya Onesifola.

²⁰U Elasita akasyala mu Kolinti, sona u Tulofimo inkamuleka mu Mileta pachifukwa ichakuti akabinagha.

²¹Uyezye-yezye ukuti wize kuno, bo na kabalilo aka chisiku katafikite. U Yubulo, nu Pudeni, nu Lino, nu Kalabudiya, sona na bitiki abanji bosi kuno, bakukulamuka.

²²U Mwene abanje nu muzimu wako. Ichisa icha Chala chibanje nawe.