Read lambya TITI 2 Bible Online

TITI 2 - lambya bible

TITI 2

¹Loli awe ubaghiye umanyizyanje ukuyana ni chimanyisyo ichenecho.

²Ubamanyizye abanavuli abachasongo ukuti batakakolwanje, babanje bantu abamahala na bakwilema; babanje bantu abamaka mulwitiko, na balughano, sona na bololo.

³Umwakuyana bulo, bope na bakolo abachasongo, ubamanyizye ukuti babanje ni nkalo iyakuyana na bakolo babo bali nu bumi ubuzelu. Batakabanje bantu abiyebo, pamo abazya aba vinyo, loli bamanyizyanje chicho chiza,

⁴umwakuti bope bamanyizye abakolo abachilindu pakubaghana abalume na bana babo.

⁵Ubamanyizyanje ukuti babanje bantu abakwilema, na bazelu, sona nukuba bakolo abakusungilila akiza inyumba zyabo, babo bololo, sona bakwivwila abalume, umwakuti nayumo umuntu atakaghasamule amazyu agha Chala.

⁶Umwakuyana bulo, bope abachilumendo ubakazyanje ukuti bilemaye.

⁷Muvintu vyosi, awe ubanje we chifwanikizyo icha nkalo inyiza. Bo ukumanyizya, umanyizyanje nu moyo uwanaloli, sona nu muchizi.

⁸Ineno yako yibanje yanaloli yiyo abantu batangayisusya, umwakuti isoni zibalemaye abalwani bako, bo bapotwa pakuchagha ichibibi chimo ichakuti batunene aswe.

⁹Abazya babivwilaye abamwene babo nukubahobosya muvintu vyosi. Batakamulayeko,

¹⁰pamo ukubibila. Loli akabalilo kosi balanjizyanje ukuti biza, sona basubiliwa, umwakuti muvintu vyosi vivyo bakubomba abantu badebiwanje ni chimanyisyo icha Chala Umupoki witu.

¹¹Pakuti u Chala avumbula ichisa chache ukuti abantu bosi bapokiwe.

¹²Ichisa ichi chikutumanyizya ukuti tuleke pakuba ni nkalo iyakusita ukumuchindika u Chala, sona nukuti tuleke ivinyonywa ivya muchisu ichapasi ichi. Chikutumanyizya sona ukuti tubanje bantu abakwilema, na bagholosu, sona na bakumuchindika u Chala mubumi bwitu ubwa muchisu ichapasi ichi,

¹³bo tukulindilila nu lusubilo isiku isayiwa lila, isiku lilyo ubuchindamu ubwa Chala umukulu, nu Mupoki witu u Yesu Kilisitu[2] bukwiza pakuboneka.

¹⁴Akiyipa mwene pachifukwa icha sweswe ukuti atusatule ku bubibi bwitu bosi nukuti tubanje bantu bache abazelu, babo balweke pakubomba imbombo inyiza.

¹⁵Ivi vyo vintu vivyo ubaghiye umanyizyanje. Lanjizya ubulaghili bwako bosi, bo ukubakazya nukubachemela abantu babo bakukuteghelezya. Atakabepo nayumo umuntu uwakukusula.