Read lambya TITI 3 Bible Online

TITI 3 - lambya bible

TITI 3

¹Ubakumbuzyanje abantu ukuti bivwilaye abalongozi na balaghili, sona nukwiyannya pakubomba imbombo zyosi inyiza.

²Ubabuzye ukuti batakamuyebaye nayumo umuntu, loli babanje bantu abamutende, abamanyani aba bantu bosi, sona babanje bololo ku bantu bosi.

³Pakuti naswe bulo akabalilo kamo tukaba bapunganu, abasita ukwivwila, sona na bakusobela. Tukaba bazya aba vinyonywa ivibibi, sona ni vintu vyosi ivyakulekana-lekana ivyakuhobosya umubili. Tukalindagha mumbibi na mukabini. Abantu abanji bakatubenga, sona naswe bulo tukababenga.

⁴Loli bo u Chala Umupoki witu alanjizya ichisa nu lughano lwache,

⁵akatupoka aswe. Zitakaba mbombo ingolosu zizyo aswe tukabombagha, awe, loli chifukwa icha chisa chache. Akatupoka aswe pakutozya nukutupapizya sona ukwendela mwa Muzimu Umuzelu, nukutupa ubumi ubupya.

⁶U Chala akatupungulila u Muzimu Umuzelu umwakusita ukumamilizya ukwendela mwa Yesu Kilisitu Umupoki witu,

⁷umwakuti ukwendela mu chisa chache tunganeniwa pakuba bantu abagholosu pamaso pa Chala nukupokela ubumi ubwa bwila na bwila bubo tukubulindilila nu lusubilo.

⁸Amazyu agha masubiliwa. Inkulonda ukuti udidimizyepo pavintu vinivi, umwakuti abantu babo bakumusubila u Chala babanje bakwikolezannya pakubomba imbombo inyiza, zizyo nyiza, sona zikubavwa abantu bosi.

⁹Loli leghuka amadali aghabupunganu, nizya mbatiko izya matabwa agha banyenya, ukulwa nukudalinkana nizya Ndaghilo izya Mozesi. Pakuti zinizi zite ni mbombo nayimo-yimo.

¹⁰Nanti wamusoka umuntu yuyo akupela ukugabinkana, lyoka pamo kabili, po utakabanje sona nawe ni mbombo.

¹¹Pakuti uzimenye ukuti umuntu yunuyu inyinong'ono zyache zinyonganite, sona mubibi. Imbibi zyache zikulanjizya ukuti akwilonga mwene.

¹²Bo inkumutuma u Alitema pamo u Tikika kukwako, uyezye-yezye pakunyagha mu Nikapoli, ichifukwa nadumula ukwikala kula-kula ichisiku chosi.

¹³Uyezye-yezye pakumwavwa u Zena umumanya ndaghilo, nu Apolo ukuti bande ubulendo bwabo, sona wenelezye ukuti bali navyo vyosi vivyo bakusobelwa.

¹⁴Abantu bitu bamanyilaye ukwiyula pakubomba imbombo inyiza, umwakuti bangabavwa babo bakusobelwa, sona nukuti batakabanje nu bumi ubusita iseke.

¹⁵Abantu bosi babo bali poka nane kuno bakukulamuka. Utulamukileko abamanyani bitu mulwitiko. Ichisa icha Chala chibanje namwe mwebosi.