Read lambya HEBELI 1 Bible Online

HEBELI 1 - lambya bible

HEBELI 1

¹Kale u Chala akanena na banyenya bitu ukwendela mu balaghuzi mutubalilo utwinji, sona na muzila izyakulekana-lekana.

²Loli mumasiku aghabumalilo agha anena namwe ukwendela mu Mwana wache, yuyo akamwimika ukuti apyane ivintu vyosi, sona akapela ichisu ichapasi ukwendela mumwache.

³U Mwana ko kulama ukwa buchindamu ubwa Chala, sona ichifwani ichenecho icha Chala. Umwene achilemite ichisu chosi na mazyu ghache aghamaka. Bo efya imbibi izya bantu, akikala pachitengo ichamuchizi kunyobe indilo iya Chala Uwamaka ghosi.

⁴U Mwana uwa Chala mukulu nkani ukuchila abantumi aba kumwanya pakuba litabwa lilyo u Chala akamupa lyapamwanya nkani ukuchila na matabwa ghabo.

⁵Pakuti u Chala atamubuzizyepo nayumo uwantumi wache ukuti, “Awe, we Mwana wane, ilelo naba ne ghuso.” Pamo ukunenapo nizya wantumi yumo ukuti, “Inkwiza pakuba ne Wise, po umwene akwiza pakuba Mwana wane.”

⁶Sona bo u Chala ali papipi pakumutuma u Mwana wache ukatote muchisu ichapasi akati, “Abantumi bosi aba Chala aba kumwanya, bamuchindikaye.”

⁷Nizya bantumi aba kumwanya u Chala akati, “U Chala akubapela abantumi bache aba kumwanya pakuba balubilo ngati yo mpepo, sona akubapela ababombi bache pakuba ndimi izya moto.”

⁸Loli bo u Chala anena nizya Mwana wache, akati, “Wee Chala, ichitengo chako icha bumwene chikwiza pakubangako bwila na bwila. Ubugholosu yo ndisa iya bumwene bwako.

⁹Mukuchighana ichintu chicho chigholosu, loli mukuchibenga ichintu chicho chibibi. Ichi cho chifukwa u Chala, yuyo we Chala winyu, akabapakazya na mafuta agha buhobosu ukuchila abamanyani binyu.”

¹⁰U Chala akanena sona akati, “Wee Mwene, awe wewe ukala ulwalo ulwa chisu ichapasi pabwandilo, sona kumwanya zyo mbombo izya nyobe zyako.

¹¹Ivintu vyosi vinivi vikwiza pakuzimila, loli awe ukwiza pakubangako; vikwiza pakumala ngati gho menda.

¹²Ukwiza pakuvipetenkannya ngati yo nkazo, sona vikwiza pakuchuja ngati gho mwenda. Loli awe, utakwandukapo nalumo-lumo, sona utakwiza pakughosipapo nalumo.”

¹³Nayumo uwantumi uwa kumwanya yuyo u Chala amubuzizyepo lumo ukuti, “Ikala kunyobe yane indilo, mupaka imbabike abalwani bako kusi kunyayo zyako.”

¹⁴Loli abantumi aba kumwanya babombi bulo. Abene yo mizimu yiyo yikumubombela u Chala, sona yiyo yitumiwe pakubabombela abantu, babo bakwiza pakupokiwa.