Read lambya HEBELI 3 Bible Online

HEBELI 3 - lambya bible

HEBELI 3

¹Mwee bakamu bane, u Chala abasalite amwe ukuti mubanje bantu bache abazelu. Polelo mwinong'onaye nizya Yesu, yuyo akatumiwa nu Chala ukuti abanje Muputi Usongo nkani uwa lwitiko lulo tukwitika.

²Umwene akaba musubiliwa kwa Chala yuyo akamusala, ukuyana na mumo u Mozesi akabela musubiliwa munyumba iya Chala.

³Umuntu yuyo akuzenga inyumba akupokela nkani umuchizi ukuchila inyumba iyenecho. Umwakuyana bulo, wepe u Yesu apokelaye nkani umuchizi ukumuchila u Mozesi.

⁴Pakuti inyumba zyosi zikuzengiwa nu muntu, loli u Chala we muzengi uwa vintu vyosi.

⁵U Mozesi akaba mubombi umusubiliwa munyumba yosi iya Chala, pakusimikizya zyosi zizyo u Chala akalondagha pakunena muntazi.

⁶Loli u Kilisitu akaba mwana umusubiliwa munyumba iya Chala. Aswe twe nyumba yache, nanti tukwendelela pakuba bajivu nkani nukusunga ulusubilo lwitu muvintu vivyo tukuvilindilila.

⁷Ichi cho chifukwa u Muzimu Umuzelu akuti, “Ilelo nanti mukwivwa izyu ilya Chala,

⁸mutakabanje bakafu amoyo ghinyu. Umu mumo abanyenya binyu bakamusambukilila u Chala pakabalilo kako bakamuyelagha munkolongo.

⁹Mula-mula abanyenya binyu bakanjela, napapo bakavyennya vivyo inkabomba amaka 40.

¹⁰Ichi cho chifukwa inkayikalalila nkani inkulilo yila-yila. Po inkanena inkati, ‘Amoyo ghabo ghakunsambukila bwila, sona batakukonka amalamulo ghane.’

¹¹Po inkakalala nkani nukulapa ukuti, ‘Batakwiza pakwinjilamo nalumo-lumo muchisu chane icha butuzyo chila.’ ”

¹²Mwee bakamu bane, muchebaye ukuti atakabepo nayumo umuntu mumwinyu uwa moyo umubibi, sona nu musita ukusubila, ghugho ghungamulesannya nu Chala umumi.

¹³Loli mukazannyanje isiku ni siku, bo tuli na Masimbo aghakuti, “Ilelo.” Bomba bunubu umwakuti nayumo umuntu mumwinyu atakazimbuliwe ni mbibi nukuba mukafu mumoyo.

¹⁴Pakuti twebosi tuli ni chigaba muvintu vivyo u Kilisitu akupa nanti twimite nkani mupaka pabumalilo palusubilo lulo tukaba nalo pakwanda.

¹⁵Amasimbo ghakuti, “Ilelo nanti mukwivwa izyu, mutakabanje na moyo amakafu ukuyana na mumo mukabombela pakumusambukila u Chala.”

¹⁶Nkimba bo bawenu babo bakivwa izyu lyache nukumusambukila? Nkimba batakaba bantu babo u Mozesi akabefya muchisu icha mu Ijiputi?

¹⁷Nkimba bo bawenu babo akabakalalila amaka 40? Nkimba batakaba bantu babo bakananga, babo imivimba yabo yikabolela munkolongo?

¹⁸Nkimba bo bawenu babo akabalapila ukuti batakwiza pakwinjilamo nalumo-lumo muchisu chache icha butuzyo? Nkimba batakaba bantu babo bakamusambukila?

¹⁹Polelo tukwennya ukuti abantu bala bakapotwa pakwinjilamo muchisu icha butuzyo, pachifukwa ichakusita ukusubila kwabo.