Read lambya 1 PITALA 1 Bible Online

1 PITALA 1 - lambya bible

1 PITALA 1

¹Ane ne Pitala, umutumiwa uwa Yesu Kilisitu. Inkubasimbila abantu abasaliwa aba Chala babo banyampaniye muchigaba icha Ponti, nicha Galatiya, nicha Kapadokiya, nicha Asiya, sona nicha Bitiniya.

²U Tata u Chala akabasalila zila ukuyana ni mbatiko zyache. Akabapaghula pakuba bantu abazelu mwa Muzimu Umuzelu, umwakuti mumwivwile u Yesu Kilisitu, sona nukuswefyiwa ni banda lyache. U Chala abizuzye ni chisa nu mutende.

³Zagha tumupalizye u Chala yuyo we Wise uwa Mwene witu u Yesu Kilisitu! Pachifukwa icha chisa chache akatupa aswe ubumi ubupya pakumuzyusya u Yesu Kilisitu kubufwe. Ichi chikutupa ulusubilo ulwenecho,

⁴ulwakuti tukwiza pakupyana ichilingo chicho u Chala akubasungila abantu bache. Akubasungila amwe kumwanya, kuko chitangabola pamo ukunanganika pamo ukuchuja.

⁵Po u Chala mumaka ghache akubasunga, amwe mwe mukumusubila ukuti mupokele ubupoki, bubo umwene ayannya pakubavumbulila pisiku ilyabumalilo.

⁶Musekelaye na zinizi, napapo ilelo mubaghiye pakuba ni chitima pakabalilo akapimpa pakuyeliwa ni njelo izyakulekana-lekana.

⁷Injelo zinizi zyizite, umwakuti zisimikizye nanti ulwitiko lwinyu lwenecho. Ngati we golide yuyo angananganika, akuswefyiwa nu moto, umwakuyana bulo, ulwitiko lwinyu lulo lwapamwanya ukuchila ugolide, lubaghiye luswefyiwe. Po mukwiza pakupokela amapalo, nu buchindamu nu muchizi, pisiku lilyo u Yesu Kilisitu akwiza pakuvumbuliwa.

⁸Napapo amwe mutamwenizye na maso, pope bulo mumughanite, sona mukumusubila napapo ilelo mutakumwennya. Amwe mwizuye nu buhobosu bubo butanganeniwa pamulomo,

⁹pakuti mukupokela umuvwalo uwa lwitiko lwinyu ghugho bo bupoki ubwa bumi bwinyu.

¹⁰Abalaghuzi bakalaghulila zila nizya muvwalo, ghugho u Chala akabayanizizya. Bakalondelezya nu kubuzikizya akiza nkani nizya bupoki bunubu.

¹¹Abalaghuzi bala bakayezya pakukagha akabalilo akanecho, sona na mumo kangizila. Aka kakaba kabalilo kako Umuzimu uwa Kilisitu yuyo akaba mumwabo akasonta. Bakanenela zila namumo u Kilisitu akwiza pakujimbila mumayimba, sona nu buchindamu bubo bukwiza pakukonkapo.

¹²U Chala akabavumbulila abalaghuzi bala ukuti batakibombelagha bo babo bene, loli bakababombelagha amwe. Abene bakanena nizya vintu vivyo vikalumbililiwa kukwinyu na balumbilili babo bakafumuzyanga Amazyu Amiza ukwendela mwa Muzimu Umuzelu yuyo akafuma kumwanya. Na bantumi bulo aba kumwanya bakunyonywa nkani pakuvyennya ivintu vinivi.

¹³Polelo yannya amoyo ghinyu pakubomba imbombo. Mubanje maso, sona mubikayepo ulusubilo lwinyu losi palusayo lulo mukwiza pakupokela, bo u Yesu Kilisitu avumbuliwa.

¹⁴Mumwivwilaye u Chala, sona mutakavikonkaye ivinyonywa vyinyu ivikali vivyo mukaba navyo, bo muchili muli muchisi.

¹⁵Loli mubanje bantu abazelu mumbombo zyinyu zyosi, pakuti u Chala yuyo akabitizya muzelu.

¹⁶Pakuti Amasimbo ghakuti, “Mubanje bantu abazelu, pachifukwa ichakuti ane ne muzelu.”

¹⁷U Chala yuyo mukumwitizya ukuti Tata atakubomba ivintu pakwennya icheni, loli akubalonga abantu ukuyana ni mbombo zyabo. Polelo mubaghiye pakumuchindika u Chala pakabalilo kako mukwikala ngati mwe bayeni muchisu ichapasi ichi.

¹⁸Pakuti muzimenye ukuti mukasatuliwa ku nkalo zyinyu imbibi zizyo mukapyana ku banyenya binyu. Amwe mutakasatuliwa ni vintu vimo vivyo vikunanganika ngati we siliva pamo ugolide.

¹⁹Loli mukasatuliwa ni banda ilyamutengo ilya Kilisitu, yuyo mwana uwa ng'ozi umusita chilema nachimo-chimo pamo ububibi bumo.

²⁰Umwene akasaliwa nu Chala, bo ni chisu ichapasi chitapeliwe, loli avumbuliwa mumasiku aghabumalilo agha pachifukwa icha mwemwe.

²¹Amwe mukumusubila u Chala ukwendela mumwache, yuyo akamuzyusya kubufwe nukumupa ubuchindamu. Po ulwitiko nu lusubilo lwinyu vikwennya kwa Chala.

²²Pakuti ilelo mwiswefya mwebene pakwivwila ubwanaloli, umwakuti mukubaghana abitiki abamwinyu. Po mughananaye mwebene nu moyo winyu ghosi.

²³Pakuti amwe mwapapiwa sona. Ukupapiwa ukwabubili kunuku kutakendela mu mbeyu yiyo yingananganika, babo bapapi aba muchisu ichapasi ichi, awe. Loli mukapapiwa sona ukwendela mu mazyu amumi agha Chala, sona agha bwila na bwila.

²⁴Amasimbo ghakuti, “Abantu bosi bali ngati lyo lisote, sona ubuchindamu bwabo buli ngati gho maluba agha muzi. Isote likufoka, sona amaluba ghakulaghala.

²⁵Loli amazyu agha Chala gho gha bwila na bwila.” Agha gho Mazyu Amiza ghagho ghakalumbililiwa kukwinyu.