Read lambya 1 YOHANI 5 Bible Online

1 YOHANI 5 - lambya bible

1 YOHANI 5

¹Umuntu wesi yuyo akusubila ukuti u Yesu we Mupoki umusaliwa yula, kokuti umwene mwana uwa Chala. Sona umuntu wesi yuyo amughanite u Wise, abaghanite sona na bana bulo.

²Umu mo mumo tukumanyila ukuti tubaghanite abana aba Chala. Pakuti ukumughana u Chala, ko kukonka amalamulo ghache.

³Pakuti ukumughana u Chala kokuti tukukonka amalamulo ghache. Amalamulo ghache ghate nkafu kukwitu.

⁴Umuntu wesi yuyo mwana uwa Chala akuchipota ichisu ichapasi. Tukuchipota ichisu ichapasi pachifukwa icha lwitiko lwitu.

⁵Nkimba we wenu angachipota ichisu ichapasi? Loli mwene umuntu yuyo akusubila ukuti u Yesu Mwana uwa Chala.

⁶U Yesu Kilisitu we yuyo akiza ukwendela mumizi na mwibanda. Atakiza ukwendela mumizi ghene, loli ukwendela mu mizi na mwibanda bulo. Po u Muzimu Umuzelu we yuyo akuzisimikizya, pakuti u Muzimu yula we bwanaloli.

⁷Abakaboni balipo batatu:

⁸u Muzimu Umuzelu, na mizi sona ni banda. Bosi batatu aba bakunena ulusimikizyo loka.

⁹Aswe tukusubila ulusimikizyo ulwa muntu, loli ulusimikizyo ulwa Chala lwamaka nkani, lulo akasimikizya nizya Mwana wache.

¹⁰Po umuntu wesi yuyo akumusubila u Mwana uwa Chala ali nalo ulusimikizyo lunulu mumoyo wache. Loli umuntu wesi yuyo atakumusubila u Chala, ipela mwene pakuba mumyasi, ichifukwa atakusubila ulusimikizyo lulo u Chala akasimikizya nizya Mwana wache.

¹¹Ulusimikizyo lwache lwakuti: U Chala atupiye ubumi ubwa bwila na bwila, sona ubumi bunubu bukwaghiwa mu Mwana wache.

¹²Umuntu wesi yuyo akwikala nu Mwana yunuyu, ali nabo ubumi. Loli umuntu wesi yuyo ate nu Mwana uwa Chala, ate nabo ubumi.

¹³Inkubasimbila zinizi, amwe mwe mukumusubila u Mwana uwa Chala, umwakuti mungazimanya ukuti muli nu bumi ubwa bwila na bwila.

¹⁴Aswe twe bajivu nkani pamaso pa Chala, pakuti tuli nu lusubilo ulwakuti akutwivwa nanti tukumulaba ichintu chimo ukuyana nu bwighane bwache.

¹⁵Sona nanti tukumanya ukuti akutwivwa, bo tukumulaba ichintu chimo, po tukumanya sona ukuti twapokela chicho twamulabagha.

¹⁶Nanti yumo akumwennya umukamu wache akubomba imbibi, yiyo yitangamupelela ubufwe, iputaye kwa Chala yuyo akwiza pakumupa ubumi. Inkunena nizya kubomba imbibi kuko kutangamupelela umuntu ubufwe. Loli kuliko ukubomba imbibi kumo kuko kungamupelela umuntu ubufwe, sona intakunena ukuti iputaye kwa Chala nizya kubomba imbibi kula, awe.

¹⁷Ububibi bosi ko kubomba imbibi, loli kuliko ukubomba imbibi kumo kuko kutangamupelela umuntu ubufwe.

¹⁸Tuzimenye ukuti umuntu wesi yuyo mwana uwa Chala, atakwendelela pakubomba imbibi, pakuti u Mwana uwa Chala akumusungilila akiza umuntu yula, sona Umubibi yula atangamupalamasya.

¹⁹Tuzimenye ukuti aswe twe bana aba Chala napapo abantu aba muchisu ichapasi ichi bali pasi pa maka agha Mubibi yula.

²⁰Tuzimenye ukuti u Mwana uwa Chala iza, nukutupa amahala aghakivwisizye, umwakuti tumumanye yuyo wanaloli. Aswe tukwikala mukumamatilana poka nu Chala wanaloli, sona nu Mwana wache u Yesu Kilisitu. U Yesu Kilisitu we Chala wanaloli, we bumi ubwa bwila na bwila.

²¹Mwee bana bane, muvileghuke ivifwani!