Read lambya UBUVUMBULI 17 Bible Online

UBUVUMBULI 17 - lambya bible

UBUVUMBULI 17

¹Po weka uwa bantumi seveni, babo bakakupula vivyo vikaba mumbako seveni bala bakiza nukunena nane ukuti, “Zagha, inkwiza pakukulanjizya namumo umalaya umumanyikwe, yuyo ikaye pamizi aminji nkani, akwiza pakufundiliwa.

²Abamwene aba muchisu ichapasi bakalowa nawe, sona abantu aba muchisu ichapasi bakalowa pakung'wela uvinyo uwa bulowe bwache.”

³Po u Muzimu Umuzelu akansendela munkolongo. Kula-kula inkamwennya umukolo ikaye pachinyamana ichichesamu, chicho chikaba ni mitu seveni, sona ni mpembe teni, zizyo zikaba na matabwa posi na posi aghakumusamula u Chala.

⁴Umukolo yula akavwala umwenda ghugho ghukachesamila, sona nu muchesamu. Akavwala ivintu ivya golide na mabwe aghamutengo na mambo. Akalema ulubako ulwa golide munyobe zyache, lulo lukizula ni vinyazu ni vintu ivibibi nkani ivya bwamalaya bwache.

⁵Pa cheni chache pakasimbiwapo itabwa lilyo lili ni ching'anamulo ichakubusyefu ukuti, “U Babeloni umukulu nkani, unyina uwa bamalaya bosi nu wa bantu abanyazu bosi muchisu ichapasi.”

⁶Po inkennya ukuti umukolo yula akolizwe ni banda ilya bantu abazelu aba Chala, sona ni banda ilya babo bakaghoghiwa pachifukwa ichakuba bakaboni aba Yesu. Bo namwennya umukolo yula, inkaswigha nkani.

⁷Po uwantumi akandalusya akati, “Nkimba choni chicho ukuswigha? Ane inkwiza pakukulingannya iching'anamulo ichakubusyefu nizya mukolo yunuyu, sona nizya chinyamana chicho chili ni mitu seveni, poka ni mpembe teni.

⁸Ichinyamana chicho ukachennya chikaba nu bumi kale, loli ilelo chite sona nu bumi. Losi ulu chikwiza pakufuma mu chibanka ichibizu nkani nukubuka pakuchinangannya. Abantu aba muchisu ichapasi, babo amatabwa ghabo ghatasimbiwe mwibuku ilya bumi ukwandila ko kubwandilo ubwa chisu ichapasi, bakwiza pakuswigha, bo bakuchennya sona ichinyamana, chicho kale chikafwa.

⁹“Panapa pakulondiwa amahala na kivwisizye. Imitu seveni yila yikwimilila amaghamba seveni, papo umukolo yula akwikala. Yikwimilila sona abamwene seveni.

¹⁰Abamwene fayivi baghuye kale, loli uwa sikisi achili akulaghila. Uyunji uwa seveni achili atizite, loli bo akwiza, akwiza pakubako akabalilo akapimpa bulo.

¹¹Ichinyamana chila chicho kale chikaba nu bumi, loli ilelo chite sona nu bumi, akaba we mwene uwa eyiti, yuyo akaba ngati bo bamwene abanji seveni bala, sona wepe akubuka pakunanganika.

¹²“Impembe 10 zizyo ukazyennya bo bamwene 10 babo bachili pakulaghila, loli bope bulo bakwiza pakupeghiwa ubulaghili ubwakulaghila poka ni chinyamana. Bakwiza pakulaghila pa awala weka bulo.

¹³Abamwene bosi 10 aba bali ni fundo yoka, sona bakwiza pakuchipa ichinyamana amaka nu bulaghili bwabo.

¹⁴Bakwiza pakulwa inkondo nu Mwana uwa ng'ozi. Loli u Mwana uwa ng'ozi na bitiziwa poka na basaliwa bache, bakwiza pakubapota ichifukwa u Mwana uwa ng'ozi we Mwene uwa bamwene, sona we Mulaghili uwa balaghili.”

¹⁵Po uwantumi akanena sona kukwane akati, “Amizi ghagho ukaghennya papo umukolo umalaya yula akikalaghapo bo abantu aba inko zyosi, na bavikolo vyosi, sona na baneno izyakulekana-lekana.

¹⁶Impembe 10 zizyo ukazyennya ni chinyamana chila vikwiza pakumubenga umukolo umalaya yula. Bakwiza pakumufyula vyosi vivyo ali navyo nukumuleka nkule. Bakwiza pakughunangannya umubili wache nukumulungulizya nu moto.

¹⁷Pakuti u Chala avipiye umoyo uwakuti abombe vivyo akabatikila zila pakwitikizya ukuchipa ichinyamana chila amaka ghabo aghakulaghilila mupaka amazyu agha Chala ghakwanilisiwe.

¹⁸“Umukolo yuyo ukamwennya, ko kaya akakulu nkani kako kakulaghila abamwene aba muchisu ichapasi.”