Read lambya UBUVUMBULI 6 Bible Online

UBUVUMBULI 6 - lambya bible

UBUVUMBULI 6

¹Po inkennya u Mwana uwa ng'ozi akumamatula ichimatilo choka mu vimatilo seveni vila nukwivwa ichipeliwa ichabumi choka mu vipeliwa ivyabumi folo chikunena nizyu lilyo likivwika ngati kupaya ukwa vula ukuti, “Zagha.”

²Po inkenelezya nukuyennya ifalasi inswepu. Uwakukwelapo akalema ubuta munyobe zyache, sona akapeghiwa impumpu iya bumwene. Akaba mupoti yuyo akabuka pakupota.

³Bo u Mwana uwa ng'ozi amamatula ichimatilo ichabubili, inkivwa ichipeliwa ichabumi ichabubili chikuti, “Zagha!”

⁴Po ifalasi iyinji inchesamu yikaboneka. Uwakukwelapo akapeghiwa amaka aghakulwila inkondo pachisu ichapasi, umwakuti abantu baghoghanaye bene-bene, sona akapeghiwa upanga umukulu nkani.

⁵Bo u Mwana uwa ng'ozi amamatula ichimatilo ichabutatu, inkivwa ichipeliwa ichabumi ichabutatu, chikuti, “Zagha!” Inkenelezya nukuyennya ifalasi infitu. Uwakukwelapo akalema ichakupimila ubung'wamu munyobe zyache.

⁶Po inkivwa ngati lyo lizyu likunena mukasi mu vipeliwa ivyabumi folo likuti, “Akampepe koka bulo aka vilombe, gho malipilo agha muntu pisiku lyoka, sona utumpepe tutatu bulo utwa malezi, gho malipilo agha muntu pisiku lyoka, loli utakanangannye amafuta agha misyunguti nu vinyo!”

⁷Bo u Mwana uwa ng'ozi amamatula ichimatilo ichafolo, inkivwa ichipeliwa ichabumi ichafolo chikuti, “Zagha.”

⁸Inkenelezya nukuyennya ifalasi imbufu. Uwakukwelapo akaba we ubufwe, sona ichisu icha bantu abafwe chikamukonkagha mwisinda. Bakapeghiwa ubulaghili pachigaba choka icha vigaba folo ivya chisu ichapasi ukuti baghoghe nu panga, ni zala, ni chiwaya, sona ni vinyamana ivikali ivya muchisu ichapasi.

⁹Bo u Mwana uwa ng'ozi amamatula ichimatilo ichafayivi, inkennya imizimu iya bantu muzungululu umwa chighemo, babo bakaghoghiwa pachifukwa icha mazyu agha Chala, sona nu lusimikizyo lwabo ulwamaka.

¹⁰Bakakolomoka nkani bakati, “Mwene, Uwamaka ghosi, umuzelu nu wanaloli, nkimba choni chicho ukukaba pakubalonga abantu aba muchisu ichapasi nukubafunda babo bakatughogha?”

¹¹Po umuntu wesi akapeghiwa inkazo inswepu, sona bakabuziwa ukuti batuzye panandi bulo mupaka ubwinji ubwa bambombo abanji, nu bwinji ubwa bakamu babo bukwane, babo bope baghoghiwanje ngati bo babo.

¹²Bo u Mwana uwa ng'ozi amamatula ichimatilo icha sikisi, pakaba akasenyenta akakula. Izuba likaba lifitu ngati gho mwenda umufitu, umwezi ghosi ghukachesama ngati lyo libanda.

¹³Intondwa izya kumwanya zikalaghala pachisu ichapasi ukuyana na mumo amakuyu amabisi ghakulaghalila mwikwi, bo impepo iyamaka yikuliyingannya.

¹⁴Kumwanya kukazyebeluka ukuyana na mumo ibuku ilyakunnyengiwa likunnyengeliwa, sona amaghamba ghosi nu tusungo tosi vikepapo pabuyo bwache.

¹⁵Po abamwene aba muchisu ichapasi na balaghili na basongo aba nkondo, na bantu abakabi, na bantu abamaka, na bantu abanji bosi, na bazya poka na bantu ababuke bakavwama bene mumpako na kusi ukwa mabwe agha mumaghamba.

¹⁶Bakaghitizya amaghamba na mabwe bakati, “Mutuwile, mutufise pamaso pa yuyo ikaye pa Chitengo icha bumwene, mutufise ku bukali ubwa Mwana uwa ng'ozi.

¹⁷Pakuti isiku ilyakoghofya ilyakufundiwa kwabo lyafika, po nkimba we wenu angajimba?”