Read Lamkang MATHI 1 Bible Online

MATHI 1 - Lamkang bible

MATHI 1

¹Abraham chapa Devid, ava Chapa Jisu Khrista ki charuwl Laaika.

²Abraham ma Isek pah, ungu Isek ka Jakob pah; Jakob pa Juda leh mnaopale pah,

³Juda le mnumei Tamar ri Peres leh Yera pah, Peres ava Hesron pah, Hesron na Ram pah,

⁴ungu Ram ma Aminadab pah, Aminadab pa Nashon pah, Nashon na Salman pah,

⁵Salman na Rahab leh Boas pah, ungu Boas leh Ruth ti Obed pah, Obed ti Jessi pah

⁶Ungta Jessia kruwng Devid pah. Ungta Devid ta mnumei Uriah numei ava tu Solomon pah,

⁷Ungu Solomon na Rehoboam pah, Rehoboam ma Abija pah, Abija ava Asa pah

⁸ungta Asa ava Jehosaphat pah, Jehosaphat ta Joram pah, Joram ma Ujiah pah,

⁹ungu Ujiah ava Jotham pah, Jotham ma Ahas pah, Ahas ava ngi Hejekiah pah,

¹⁰Ungta Hejekiah ngi Manaseh pah, Manaseh ngi Amos pah, Amos ava ngi Josiah pah,

¹¹ungu Josiah ngi Jekheniah leh mnaopa le ava pah, mmaan ava Babylon thu paam suwkki ma am in mpha thung ki kurthuwk.

¹²Ungta Babylon tha paam suwk ki ma am dil thaanni: Jekheniah ngi Sheltil pah, Sheltil li Jerubabel pah,

¹³Jerubabel li Abiud pah, Abiud ti Eliakim pah, Aliakim mi Ajor pah,

¹⁴ungu Ajor ri Jadok pah, Jadok ki Akhim pah, Akhim mi Eliud pah,

¹⁵ungta Eliud ta Eleajar pah, Eleajar ra Mathan pah, Mathan na Jakob pah,

¹⁶ungu Jakob pi Khrista mdo dit Jisu ṭou na Mery ava innpu Joseph pah.

¹⁷Ava leiji charuwl rek mkheng Abraham thungki ngi Devid kpha ava charuwl rek sowm leiplii, ungu Devid thung ki ngi Babylon tha paam suwk ki ma am naan ava charuwl sowm lei plii, ungta Babylon paam suwk thung ki ngi Khrista kpha ava charuwl sowm lei plii kurthuwk.

¹⁸Tunva Jisu Khrista ava mlam hanto ngi ṭou da. Mnuh Mery ava Joseph pi inn mthlot dok mpha thu, mmaanni mpaalve du inni pthla kchiir nao kuhur dok jap ksa ngi pha da;

¹⁹ungta minnpu Joseph ava mrinkindit miilai kurthuwk da, ning kja mhin pii nuwm mda; tupruti mbowr tlo pthii nuwm da.

²⁰Pdainu mma ngi hava mreel bing thu, asuwn, mmer khatti Mukpu waan tamsii ngi ktardet da, theda; “Devid chapa Joseph, anumei Mery klou rang nga ṭi ma; mleija mma thungki ava pthla kchiir ri kurthuwk,

²¹mma ngi chapa khat kuplu ra; ungu mmiing ava Jisu dida phuwk nadi, mleija Mma ngi pnu rek thung ki mmii rek kaktlan pik ra.”

²²Mukpu ngi khulpu rek hin mdo the dok hava mkheng mkurkhum nra thuwk da:

²³“Asuwin, ktlangdang nala khatti nao hur donle Chapa khat kuplu ra; ungu mmiing ava Emmanuel kdi ra.” ‘ava ki mlei ja Isowr ri miti ṭhiinna’.

²⁴Joseph pi ki iip mhan kardel mpha thu, Mukpu waantamsii paureen ava heppi tlo da; mnu mei ava louda,

²⁵Pdainu Chapa khat pluda Jisu dida mmiing mphuwk du khim khai kunlom lamme; ungta mmiing ava Jisu dida phuwk da.