Read Lamkang MATHI 13 Bible Online

MATHI 13 - Lamkang bible

MATHI 13

¹Ava nit katti Jisu ngi inn thungki thuwk da truwn biing ngi ku owng da.

²Ungta kthuwk kurtuwl mii rek klin lang lang ngi klop dok da, ava leiji arkuwng khat leen kalda ko ongda ungu kurtuwl mii mkheng ava laan tha am daat lamda.

³Ungta Mma ngi paupurtol rek knempokki mhin thaanni theda, “Chiikvar miilai khatti chii kvar ra chet da.

⁴Ungu mma ngi mvar thungta, chii angṭhea lam thu tla da, ungbi puwa rekki thlengda chom chlam da.

⁵Chii rek angṭhea lung dul leen tla da, duldak am puk mda, ungu duldak kukthukki ma amma leiji mowngteng da,

⁶pdainu kniw kakhang ngi sat da, ungta murjuwng ma amma leiji purvui chda.

⁷Chii rek angṭhea tarliing rek thung ngi tla da, ungta tarliing mowngda ava ngi pardel you lamda.

⁸Chii rek angṭhea duldak kṭha thung ngi tlada, mthei chui da, angṭhe ngi mbel arjaa khat, angṭhe ngi somtruk, angṭhe ngi som kdum chuida.

⁹Knaa kthloi ku mii khatti aryaa chso.”

¹⁰Ava dilli siikhu rekki Mhin arva lamda the lamda, “Talu leiji paupurtol rekki mhin inva ado the pik lamda?”

¹¹Ungbi Mma ngi mhin inni arthawng da, “Naan hinva parwaan Kruwngpaam ki tuprut pau ava ado dee nraan ado tpiik chaak in, pdainu mmaan hinva ava pme.

¹²Mleija ktlonuwm hin knemmi kpii chra, ungu mma ngi kheelli kthloi chra, pdainu kthloi kma mii ava mma ngi mdothloi chaak mruk suwn rukka klowng pthii ra.

¹³Hava leiji Neiji paupurtolli kdo the pik lam, mleija ksuw daatti mmaanni dei lamme, ungta karyaa daatti aryaa pindi lamme, kdei pindi ruk kurthuwk lamme.

¹⁴Mmaan hin va Isaijah pauphuwnni mdo the ava mkurkhumna: ‘Naanni aryaak inna pdainu aryaa pandi maanti, ungta asut inna pdainu tden rukva dei maan ti.

¹⁵Mleija hava miirek plung ava kurmuwng cha, maknaa in ava mdo aryaak naanni krik cha a, ungta mmik rek in ava mipjiin pthiinna, mmaanni mmik rek inni dei lam mso, maknaa rek inni aryaa lam mso, muplung ril inni dei pindi lam mso, ungta mdam nraan Nei ktummi kinle lam mso.’

¹⁶Pdainu naan mikka msuwkṭha, mleija mmaanni deida, ungta aknaa inni aryaa da.

¹⁷Kinditti, Neiji ahin thaanni kthea, naan ado dee in ava khulpu rek leh rinkindit rek mii knempokki mdee nuwm in, ungu mmaanni tdee pha chlamme, ungta naan do aryaak maryaak chaak nuwm in, ungu karyaa pha chlam me.”

¹⁸“Chiikvar paupurtol ava aryaa chaan.

¹⁹Ku mii khatti Kruwngpaam pauna aryaa da ungu mdee pindit mabi, kṭhakma khatti thleng da muplung thungki mdo var ava mdolo pthii; hava ava lam thung ngi ktla rek lam.

²⁰Pauna aryaa da karlaang teng kcha, ava hava lungdul leen mdo var ktla ava;

²¹anto joso mthung ngi arjuwng ma amma leiji mpha mruk tummi diil chda, pdainu pauna leiji suwkthuwk mdit mata kja kakham mphaak le, kbei sekki tluw chda.

²²Ungta tirliing arlakki mdovar ava pauna karyaa kcha mii rek lam, pdainu dultipaam tuk ksut ungu suwang thuw mdo ngei leiji pauna ava archu youda, ungta ava ngi mthei kchui kma tdet da.

²³Dul kṭha leen mdo var ava pauna aryaa da kdei pindi mii rek lam; mmaanna mthei chuida, khatti arjaa khat, khat leen som truk, ungu khat leen som kdummi kchui.”

²⁴Mma ngi mmaiṭhuwm inni ktlok paupurtolli theda, “Parwaan Kruwngpaam ava miilai khatti kṭha chiimuh mbil thung ngi mdo var ava tu tpinṭim kro;

²⁵pdainu mi ii dok chaak arlaan- ni,mma kusnuwm kma mii ngi arva da kehu rek arlakki kṭul var thida sun chda.

²⁶Ava leiji mdo pṭau rekki mowngda thei mchui in thungta, kṭul rek rukka kandang da.

²⁷Ungta inn ava thungki sra owr ri mhin arvang da theda, ‘Ocha, abil thung va chiimuh kṭha ado var pme mo? Tak heppi kṭul rek ka am da?’

²⁸Mma ngi mhin inni theda, ‘Kusnuwm kma rekki hava mdo tlot.’ Ungbi sra owr ri mhin theda, ‘Ava mkurthut ta neenni chetda kdo purku raan angeija?’

²⁹dainu mma ngi theda, ‘Eme; kṭul kphuiji kehu rek phui kthen naan di.

³⁰Takhau pha mvee du khim khaiji mowngve chdaat lamso; mkhau in mpha thu, ru kri ngi kṭul rek purkuk da mtut mtut ti tapkaak nra, pdainu kehu rekka purkuk da kuktom thu ado thiik raan, dida kakhau rek hin neiji the laini’ ”

³¹Mma ngi ktlok paupurtol khat rukva mhin inni theda, “Parwaan Kruwngpaam ava miilai khatti anruwng muh louda mbil thung ngi mdo var ava hep daat;

³²mmuh rek ava mkheng thungki kdil sii kurthuwk, pdainu marhan mown thungta kukmowng rek thungki klin sii ngi ding khat kurthuwk da, ava leiji kjuwng puwa rekki thleng lamda, mbaak leen mbuw rek sa chlam da.”

³³Mma ngi ktlok paupurtol rukva mhin inni theda, “Parwaan Kruwngpaam ava snu miilai khatti jaangju louda tparte na ava kdum jaam louda thowl mkur owl du khim khai mdo purhau ava hep daat.”

³⁴Jisu ngi hava paupurtol mkheng ngi mii rek hin theda; pau kpurtol kma donle Mma ngi do khat lee pre mhin inni the kchok me.

³⁵Hava ava khulpu rek do the ava mkurkhum na kurthuwk da: “Pau purtol rek ava ngi Neiji kner pvang nik di, dultipaam mapṭhan daatki kurdowl daat Neiji thethuw nik di.”

³⁶Ava dilli Mma ngi kurtuwl mii rek ma thida inn thung ngi vang luwt da. Ungta msiikhu rekki Mhin arvang lamda Mhin the lamda, “Bil thungki kṭul mlei thung ngi mhai thethut pik chaan.”

³⁷Mma ngi arthawng da, “Chiimuh kṭha kvar mma ava Mii Chapa;

³⁸bil ava dultipaam, ungu chiimuh kṭha ava Kruwngpaam chapa rek, kṭul rek ava kṭha kma ava chapa rek,

³⁹ungta kusnuwm kma dovar ava Dijabowl; takhau pha kvei ava kum ṭut na, ungu kakhau rek ra ava waan tamsii rek ra.

⁴⁰Kṭul rek purkuk da mei thung ngi mdo pkaak ava heppi, kum ṭut na thang va anto ktlora

⁴¹Mii Chapa ava ngi waan tamsii rek arju ksiira, Mma Kruwngpaam thungki pnu kaptau rek mkheng leh kṭhakma mkheng ava purkuk donle,

⁴²kṭuw knai kma meiṭhuwm thung ngi kvar pthii ra; ava thu mii rekki ṭap donle mhaa in kikril lamra.

⁴³Ava dilli rinkindit rekki Mpah in Kruwngpaam thung ngi kniw heppi kleng lamra. Taryaak na knaa kthloi mii ngi aryaa chso.”

⁴⁴“Parwaan Kruwngpaam ava bil khat thung ngi sumbuwr kurdowl li ka am chdaat, miilai khatti mphaak khot thungta, purvuwl dok thida; mkanpatti vangda mdo thloi mkheng jur dokda ungta bil mdo ren chaak ava hep daat kurthuwk.”

⁴⁵“Veikhat nowlli, parwaan Kruwngpaam ava tek tre kthlaam sum dowl klou miilai khat ava lulu,

⁴⁶mma ngi mman klu lang lang sum khau khat mphaak thungta, vangda mdo thloi mkheng jur dok thida, mdo ren chaak ava hep daat.”

⁴⁷“Veikhat nowlli, parwaan Kruwngpaam ava truwn thung ngi kchak kdeeng thu msik msik tuwlva kurkuk da;

⁴⁸mdim thungta, mii rek ki dii biing ngi ko ong thida kṭha ava uwm thung ngi pintiingda, kṭha kma mdo var pthi ava lulu.

⁴⁹Ava leiji kum ṭut tiing tiingva anto hep daat ra. Waan tamsii rekki arjung donle rinkindit thungki kṭha kma rek ava kpintiing lamra,

⁵⁰ungta kṭuw knai kma ki meiṭhuwm thung ngi kvar pthii lamra; ava thu mii rekki ṭap donle mhaa in kikril lamra.”

⁵¹“Hava mkheng nga adee pindit inna?” Ungbi mmaanni the lamda, “Oji.”

⁵²Ungbi Mma ngi mhin inni theda, “Ava ngi mlei kurthuwk da parwaan Kruwngpaam tum mi kurchuk Nowlam chukpu rek khim khaija tva ngi ren da tva ngi pliw tdit deida mdo mna ksintho inn kpupa khat ava hep daat.”

⁵³Ungta Jisu ngi hava paupurtol rek the dok thida, Mma ngi ava thungki kurlou da

⁵⁴Mdaksaa ki khuwpaam tha arvang da, mmaan synagog thung ngi purchuk da, ava leiji mmaanni ngak chlam da; the lamda, “Hava Miilai va hava lousing leh klin klin nong rek mdo tlotta tva ki mdo phaak da?

⁵⁵Hava ding kparnaal lik ava pme mo? Mnuh miing nga Mery pme mo? Ungta Jeems, Joseph ungu Simon leh Judas lea Mma naopa rek pme mo?

⁵⁶Ungta mcher rek mkheng ruk nen tu tkilṭhi daat in pme mo? Ava mkurthuttu hava Miilaiva hava mkheng nga tva ki mdo phaak da?”

⁵⁷Ungta mmaanni Mhin pthlei lamda. Pdainu Jisu ngi mhin inni theda, “Khulpu khat ava mdaksaa khuwpaam leh mdak kat ki phungka thung daat kma donle mii do kjat nma ra ame.”

⁵⁸Ungta Mma ngi ava thu nong klin knem mi tlo me, mleija mmaanni rin chlamme.