Read Lamkang MATHI 14 Bible Online

MATHI 14 - Lamkang bible

MATHI 14

¹Mpha ava kat thung ngi paamkpu Herod ti Jisu mlei thung ngi pau karjaam ava aryaa da.

²Ungta msra owr rek hin mma ngi theda, “Hava ava baptis kuptlot Johon kdiyou dok thungki kring kardella; ava leiji nong mdo tlot naki rutan mma thung ngi ka am.”

³Mleija Herod ti Johon na kjowng da, bowl thida, mnaopa Philip numei Herodia tummi rowng inn thung ngi thiida;

⁴mleija Johon ni mhin theda, “Nang ngi mma adolo ava Nowlam dorot ava pme.”

⁵Ungta mma ngi ae you nuwm da, anto daat joso mii rek ṭi da, mleija mmaanva khulpu khat pi kdingi bin chlam da.

⁶Pdainu Herod ṭouna mnit arvangda, Herodia chanu ngi lop maiṭhuwm mi mkardaam thungta Herod ning tupthlungda,

⁷ava leiji mma ngi pau kthamda mma doṭhil khim khai mhin mdo piik nra paureel dok da.

⁸Mnuh do sin chaakki mma ngi theda, “Hava arkuw thung ngi baptis kuptlot Johon luwchai ado tpiik chaak ra neiji kingeija.”

⁹Ungta kruwng ava kdung ngi kansiir chda; pdainu mpau ktham leh mmal rekki mlei kurthuwk da mdo arvan sin nraan mma ngi paureen da;

¹⁰rowng inn thungki Johon luw mdo reen nraan mma ngi mii hai siida,

¹¹ungta mluw ava arvan sin lamda, arkuw thung ngi nalanao hin pii lamda,ungu nalanao vi mnuh hin arvan sin da.

¹²Ungta msiikhu rekki arva lamda mukluwng ava lou lamda alruwl chlam da; ungu mmaanni sun lam da Jisu hin song lamda.

¹³Tunva Jisu ngi hava maryaak thungta, Mma ngi ava thungki kurlou da, arkuwng khat leen mmun ktliing khat thung ngi chet da. Pdainu kurtuwl mii rekki aryaa da, khuwpii rek thungki mkhuwnni chet lamda mdil ṭoi lamda.

¹⁴Mma ngi diibiing ngi mhai thungta kurtuwl mii klin lang lang ngi ka am deida; ungbi Mma ngi wonsat lo chlam da, ungta kukoi rek pdam pik lamda.

¹⁵Khuw mjiin thungta, siikhu rekki Mhin arvang lamda, the lamda, “Hava munna ktliing nga, ungta kokto dokka; kurtuwl mii rek ava mdaksaa in tummi then mdo ren chaak nlamra apsun chlam.”

¹⁶Jisu ngi theda, “Sun lamnime; naanni mdo chaak raan do mruk apii chaan.”

¹⁷Mmmaanni Mhin the lamda, “Neenni thenpen parnga leh tuwlva knii hava tha kthloi inna.”

¹⁸Ungta Mma ngi theda, “Nei kihin tha arvan sin in.”

¹⁹Ava dilli Mma ngi kurtuwl mii rekka nowmsuwl leen mko on nraan pau pṭum da; ungta thenpen parnga leh tuwlva knii louda parwaan hansuw da,ungu phowl kṭha parlaan da, ungta khui thida thenpen rek ava siikhu rek hin pii da, ungu siikhu rekki kurtuwl mii rek hin them pik lamda.

²⁰Ungta mmaan mkheng ngi poi kpa ngi chaa lamda. Ungu mkikleem kṭik ava mmaanni bowr sowm lei knii kdim jilli lou lamda.

²¹Ungta kmaal mii rek ava snu rek leh kmo rek kthekma mii pun parnga arveel kurthuwk.

²²Ava dilli Mma ngi kurtuwl mii rek mupsun slii arlaanni, siikhu rekka arkuwng leen raalpha khat ktong tha mvan nraan tlo da.

²³Ungta Mma ngi kurtuwl mii rek mupsun dok dil tha, mthi na ngi kṭhil chra lown leen hang da. Khuw mjiin thungta Mma mthi ndaatti ava tha am daat da.

²⁴Pdainu mpha ava thungva arkuwng ava laan tu kdung ngi lam karlat da, mleija tarthli ngi raan lamda, dii kakna ngi prei lamda.

²⁵Ungta jaan ki ṭhang plii thung ngi Mma ngi truwn leen mkhu ngi chet da, mhin inni arvang da.

²⁶Pdainu truwn leen mche ava siikhu rekki mdee in thungta, kdung piir lamda, thelamda, “Ava raothla khat!” Ungta mṭit inni mmaanni owng lamda.

²⁷Pdainu Mma ngi mhin inni pau teng da, theda, “Aplung apnet chaan, Nei ping; ṭi maan.”

²⁸Ungta Pitor ri Mhin arthawng da, “Mukpu, Nah akurthutta, dii leen Nah hinni kahai nra pau mhai pṭum pik.”

²⁹Mma ngi theda, “Arva.” Ava leiji Pitor ri arkuwng leen ki ṭum da, ungu dii leenni Jisu hin vada;

³⁰Pdainu tirthli kraang mdee thungta mma ngi ṭi chda, ungu dii thung ngi mtlaak slii thungta, “Mukpu mhai ktlan cha” dida owngda.

³¹Ungbi Jisu ngi mkhut hai khiing tengda kjowng thida mhin theda, “O mruksuwn daatti krin cha miilai, talu leiji plung kinṭheek ki abinna?”

³²Ungu mmaanni arkuwng leen mkal in thungta, tarthli kraang ava down dok da.

³³Ungta arkuwng thungki mii rekki Mhin luwbuk lamda, the lamda, “Kindit katti Nah Isowr Chapa pti.”

³⁴Ungu mmaanni mvan klaan dok in thungta, Kenasarit tha arvang lamda.

³⁵Ungta mun ava thungki mii rek va Mma ava tin chlam da, ungu marveel mkheng thung ngi mii sii lamda, kukoi rek mkheng Mhin ṭhi paphaak lamda,

³⁶ungta mbuw mor rek rek mdo thown chaak nlam ra mmaanni Mhin ktham chlam da; ungu kthowng mii knempok ava dam da.