Read Lamkang MATHI 15 Bible Online

MATHI 15 - Lamkang bible

MATHI 15

¹Ungta ava dilli Jerusalem ki kthleng Pharisi rek leh Nowlam chukpu rekki the lamda,

²“Talu leiji Nah siikhu rek va alraangki nopa mdo leek inda? Mleija mmaanni mmaal in mpha thung ngi mkhut in alṭhu lamme.”

³Mma ngi mhin inni arthawng da, “Ungta talu leiji naanva alraangki nopa tum daatti Isowr paureen ado leek in da?

⁴Mleija Isowr ri paureen da, ‘Apah leh anuh akjat cha,’ Ungta ‘Mpah mdit mata mnuh leen kṭhakma kthe mii ava kdiyou kat ra.’

⁵Pdainu naanva theen tinu, ‘Ku mii khatti mpah mdit mata mnuh hinni, naanni nei kihin ki ado phaak raan ava Isowr hin kpiik dok,’ kdingi theen tinu, mma ngi arleek setti mpah leh mnuh mdo kjat nra ame.

⁶Ava leiji naanni alraangki tum daatti, Isowr pauna ava leek pthiin tinu.

⁷Ṭha tlot ktlo naan! Naanki lei thung ngi Isaijah va hanto mdo the dok:

⁸‘Hava mii rekki mner daat inni makjat lamda, pdainu muplung ril inna Nei kihin ki kdung ngi lam kar latta;

⁹mmaanni mii ki paurin nopa ava ktlo ngi, Neia do ksii kma ngi luw mbuk lamda.’ ”

¹⁰Ungta Mma ngi mii rek Mhin own thida mhin inni theda, “Aryaa inra adei pindi chaan:

¹¹miilai khat ner thung ngi jung klut ava ngi mii kchou me, pdainu ner thungki arhan kthuwk ava ngi miilai khat ava mdo kchou kre.”

¹²Ava dilli siikhu rekki Mhin arva lamda, the chlam da, “Nang ngi hava athe mpha thu Pharisi rek plung kpur ava dei mti mo?”

¹³Mma ngi arthawng da, “Kpah parwaan ki ngi mdo phun ma dinglung haikhe khim khaija kphui pthiira.

¹⁴Ama pthiin; mmaanna mik ktot kṭhi rek lam. Ungta mik ktot khatti mik ktot khat mṭhibi, mikniing inni khur thung ngi ktla you lamra.”

¹⁵Pdainu Pitor ri Mhin theda, “Pau purtol ava mhai the pindit pik chaan.”

¹⁶Ungbi Mma ngi theda, “Nang rukka tun kpha ngi kdei pindi kma pa pti mo?

¹⁷Ner thung ngi jung klut khim khaija poi thung ngi jungda karthleng jowk jowk daat ava nang va dei mti mo?

¹⁸Pdainu ner thungki kthuwk ava plung thungki arhan kthuwk, ungu ava ngi miilai mdo kchou kre.

¹⁹Mleija plung thungki ngi kṭha kma mdo thuwṭhi, mii ke eayou, losang kṭhi, nala tartlaang kturkui, kupru, kindit kma thu sakhi kpii, kuhowng cha,

²⁰hava le ngi miilai khatta mdo kchou kre; pdainu khut kulṭhu kma ngi then kchaa ava ngi mii kchou me.”

²¹Ungta Jisu ngi ava thungki kurlouda Tyr leh Sidon paamkowl tha kunsun da.

²²Ungu asuwn, paamkowl avaki Kenan ki snu miilai khatti arvada ungu owngda, “O, Devid Chapa, Mukpu, aplungnee mhai tdet cha; kchanu ava kdung reenni tarnam khatti pja chda.”

²³Pdainu Mma ngi pauna khdaat preva arthaan pik me. Ungta msiikhu rekki arva lam da, Mhin ktham chlam da the lamda, “Ndil in ṭoida mma kṭappa, apsun pthii.”

²⁴Jisu ngi arthawng da, “Neia Jao kmawng kcha Isreel inn thung daatti mdo tsii.”

²⁵Pdainu mma ngi Mmaiṭhuwm mi arvada pkhup pi tardiil da the chda, “Mukpu, mhai bom cha.”

²⁶Ungu Mma ngi arthawng da, “Kmo rek thenpen louda ui rek hin kvar pthii ava kursuk pme.”

²⁷Mma ngi theda, “Oji, Mukpu, anto daat joso ui rek rukva mmaan kpupa rek tebol leenki mikri ktla ava mdo chom chaak pi.”

²⁸Ava dilli Jisu ngi mhin arthawngda, “O, Snu ado rin chaakka klin lang lang nga! Nah do ngei dil kṭoiji ekurthuwk so.” Ungta mchanu ava mpha ava kat thu dam chda.

²⁹Ungta Jisu ngi Galil truwn biing ki ksun ra kurlou da. Ungu lown leen hangda, ava thu ku ong da.

³⁰Ungta kurtuwl mii rek klin lang lang ngi Mhin arhang lamda, mmaanni mkhu kseek, kyeng cha, mik ktot, ki ewng, ungu ktlok knempok ki kukoi Mhin ni arhan ṭhi lamda, mkhu ther ri thii lamda, ungu Mma ngi pdam pik lamda.

³¹Ava leiji kurtuwl mii rekka ngak chlam da, ki ewng cha ava ngi mpau thuwk da, kyeng cha ava ngi karjii da, khu kseek ava ngi chet da, ungu mik ktotti khuw mdee thungta, Isreel ki Isowr ava panpaak chlam da.

³²Ava dilli Jisu ngi msiikhu rek Mhin own thida theda, “Kurtuwl mii rek hava kwon ksa lamma, mleija hava nii kdum lik thung ngi mi amṭhiin da, ungta mdo chaak raan do khat lee thloi chlam me; ungu mpoi in ktham daatti sii pthii nuwm lam maang, lam tha purthlokki klou kro lam.”

³³Ungu siikhu rekki Mhin the lamda, “Kurtuwl mii rek klin lang lang ava hava kbowk laiju thenpen kokhopva tva ki tphaak raan da?”

³⁴Ungbi Jisu ngi mhin inni theda, “Thenpen tija athloi inna?” Mmaanni arthawngda, “Tikheu, ungu tuwlva kdil sisi mruk suwn.”

³⁵Ungta kurtuwl mii rek ava dul leen mko on nraan paureen da,

³⁶Mma ngi thenpen tikheu leh tuwlva kdil sisi ava lou da, phowl kṭha parlaan thida msiikhu rek hin pii da, ungu siikhu rekki kurtuwl mii rek hin them pik lamda.

³⁷Ungu mmaan mkheng inni mpoi in kpa ngi chaa sap lamda; ungta mkekleem kṭik ava bowr tikheu kdim jilli chom lamda.

³⁸Kmaal mii rek ava snu rek leh kmo rek kthe kma pselpa mii pun plii arveel.

³⁹Ungta kurtuwl mii rek psun thida, Mma ngi arkuwng leen tuwngda, Magadan paamkowl tha vangda.