Read Lamkang MATHI 19 Bible Online

MATHI 19 - Lamkang bible

MATHI 19

¹Tunva Jisu ngi hava le mdo the pṭuw dok thida, Galil thungki sunda, ungu Jordon raalpha ngi Judia paamkowl tha lut da;

²Ungu kurtuwl mii knempok ki mdil ṭoida ava thu Mma ngi pdam pik chlamda.

³Ungta Pharisi khatti Mhin arhang da mdo pirsin na ngi Mhin pau khewl da, “Mlei khat leiji miilai khatti mnu mei bowr mdo tlot pthii ra ava Nowlam va mrot mo?”

⁴Mma ngi arthawng da, “Mupṭhun daat ki kseem va psel leh snu mdo seem, ava naanva pa maan ti mo?

⁵Ungu theda, ‘Mleija hava leiji pselpa ngi mpah leh mnuh ma thi donle mnu mei mdo am ṭhira, ungu knii ava daksaa khdaat ra.

⁶Ava leiji mmaan ava knii ngi am bong lamme, pdainu daksaa khdaatti ka am lam. Ava ngi mlei kurthuwk da, Isowr do punlom dok ava ku mii khat lee ngi ṭhen mso.”

⁷Mmaanni Mhin the lamda, “Talu leiji Mousi va mdo kinṭhen ṭhi nra, bowr ktlo ki mlei kikjit kro dida pau mdo reen da?”

⁸Mma ngi mhin inni theda, “Naan plung ril mapchai reen leiji Mousi va mnu mei bowr ktlo pthii ava mdo rot, pdainu mupṭhun daat le va anto lua kurthuwk me.

⁹Ungta Neiji ahin thaanni kthea; mnumeiji mkarmet ma lei daatti mbowr tlo pthii thida, ktlok khat mlo bi, ava losang mṭhia.”

¹⁰Siikhu rekki Mhin theda, “Pselpa khatti mnumei tu hanto lu rang mkurthut bi, snu mdolo ma ngi kṭha a.”

¹¹Pdainu Mma ngi mhin inni theda, “Tithe hava psel mkheng ngi arlaang nime, pdainu mdo piik dok mii rek ava hin daat ra.

¹²Mleija mṭou daat ki kukhong chjap ra mii ka am, ungu mii ngi mkhon chaak nra mdo seem kukhong kcha mii ka am, ungta parwaan Kruwngpaam tummi mdak saa ngi khong chnuwm da kukhong cha rek mii ka am. Hava karlaang pchaang ra mii ava ngi arlaang cha so.”

¹³Ava dilli Mma ngi mleen thaanni mkhut khiing da mdo ṭhil pik lam nra Mhin ni kmo rek arhai ṭhi lamda. Siikhu rekki mii rek ava rai chlam da;

¹⁴pdainu Jisu ngi theda, “Kmo rekka Nei kihinni arva chdaat lamso, ungta khaan maan; mleija hanto lulu thu parwaan Kruwngpaam ma ka am.”

¹⁵Ungta Mma ngi mleen thaanni mkhut khiin pik lam thida sun chda.

¹⁶Ungta asuw in, miilai khatti Mhin arhangda, theda, “Chukpu kṭuw knai kma ki rinkhu kdo phaak chaak nra, talo kṭha tatlot rang da?”

¹⁷Ungbi Mma ngi mhin theda, “Talu leiji kṭha mlei thung ngi ado tikhewl da? Isowr kma donle kṭha ku mii khat lee ame. Nang ngi rinkhu aphaak nuwm ta paureen rek ava arkhii cha.”

¹⁸Mma ngi Mhin theda, “Tva da?” Ungbi Jisu ngi theda, “Nang ngi mii eayou ma, losang ṭhi ma, pruma, kindit kma thu sakhi ri pik ma,

¹⁹anuh leh apah akjat cha, ungta adaksaa lulu ngi aveen wonsat alo.”

²⁰Pselnao ava ngi Mhin theda, “Hava le mkheng nga kdo pṭoi chaak; talu kdo tlot mlai ka am da?”

²¹Jisu ngi mhin theda, “Nang ngi kinreel akurthutta, vangra,ado thloi rek ava ajur thira sra rek hin apii cha, ungu parwaan tha asumbuwr thloi chna di; ungta arva ra kdil aṭoi cha.”

²²Pselnao ava ngi hava maryaak thungta, plung kja lang lang ngi vang sun da; mleija mma ngi do knempok thloi da.

²³Ungta Jisu ngi msiikhu rek hin theda, “Kinditti, Neiji ahin thaanni kthea, suwangpa ngi parwaan Kruwngpaam mthlun nrang nga tija thung ngi kparsa chdaatta.

²⁴Veikhat nowlli Neiji ahin thaanni kthea, suwang ngi Isowr Kruwngpaam mthlun rang kchang nga ut ti prou khur thung ngi mlu ava ngi ko ol sii ra.”

²⁵Siikhu rekki hava maryaak in thungta, kdung ngakki the lamda, “Mdittu ku da mdo ktlan rang nga?”

²⁶Pdainu Jisu ngi suw rim lamthida theda, “Mii rek hinva hava kurthuwk lu pme, pdainu Isowr hinva do mkheng nga kurthuwk lu.”

²⁷Ava dilli Pitor ri arthawngda, Mhin theda, “Asuw, neenni do khim khai ma pthii thiinnu Nah dil kdo ṭoi chaak in. Neenni talu thloi ni kaan di?”

²⁸Jisu ngi mhin inni theda, “Kinditti, Neiji ahin thaanni kthea, dultipaam ren ava thu Mii Chapa ngi mlaarnee ki longkhom leen mko on mpha thu, Nei kdil kṭoi naan ruk va Isowr ku onna sowm lei knii leen ku ong da, Isreel chati sowm lei knii kṭewl naan di.

²⁹Ungta ku mii khatti minn rek, mu u mnao, mcher, mpah mdit mata mnuh, mnaole, mpaam rek ava Nei kmiing tummi mmaak pthii bi, kṭuw knai kma ki rinkhu ava tpom pik donle arjaa khat kheelli karlaang chra.

³⁰Pdainu ru kri ki mii knempok ava dil knau ra, ungta dil knau rel ava ngi ru kri ra.”