Read Lamkang MATHI 20 Bible Online

MATHI 20 - Lamkang bible

MATHI 20

¹“Mleija parwaan Kruwngpaam ava inn kpupa ngi jiingsun kpanma ngi chet da rikrou bil thung ngi nong klou ra arda kren mche chaak ava lulu.

²Nii khat ki arda man dinarii khat khatti mkulrot naan dok dil tha, rik rou bil thung ngi haisii lamda.

³Ungu mma ngi ṭhang kdum arveelli ktlowng ngi ktlok rek ava mardaan kthii lang lang ngi bajaar thung ngi krip daat dei lamda;

⁴Ungta mmaan hin rukku mma ngi theda, ‘Naan rukka rikrou bil thung ngi vaan, ungu ado kpiik raan mkindit ava apii ni kaan di,’ ava leiji mmaanni va lamda.

⁵Ungta mma ngi ṭhang truk leh ṭhang tku arveelli, anto jikki tlo nowl da.

⁶Ungu ṭhang sowm lei khat arveelli mhai nowl thungta, mii angṭhe krip daat pha nowl da; ungbi mma ngi mhin inni the nowl da, ‘Talu leiji niiluwnva arda kthii lang lang ngi krip tlit daat in pti?’

⁷Mmaanni theda, ‘Mleija ku mii khat lee ngi arda mren pik maan da.’ Mma ngi mhin inni theda, ‘Naan rukka rikrou bil tha vaan.’

⁸“Ungu khuw mjiin thungta, rikrou bil kpupa ngi mma ki sumvai klou hin theda, ‘Nong klou rekka a own lamra, mṭut na ki ngi ru kri ki thok kpha marda man in apii chlam.’

⁹Ungta ṭhang sowm lei khat arveel ro ngi karva rek va, mii pum ktaiji dinarii khat khat arlaang chlam da.

¹⁰Tunva ru kri ki rek karvang va, kheelli arlaang raan pak innu kdingi bin chlam da; pdainu mmaan ruk va mii pum ktaiji dinarii khat khat daat arlaang lamda.

¹¹Ungta ava mdo arlaan lei inni inn kpupa ava psul chlam da,

¹²the lamda, ‘Mṭut na ki relva ṭhang khdaat thu nong lou lamda, ungu niiluwnni kniw ksa khaangda nong klou neen tu mpinṭim in tinu.’

¹³“Pdainu mmaan arlakki khat hin mma ngi arthawngda, ‘Cham, neiji nah hin kar mak tlo maang; dinarii khatti tkulrot naan pme mo?

¹⁴Naan ado ava alou inra vang in; naan hinni kdo piik lulu ngi hava mṭut na rel ki rukka kdo piik chaak.

¹⁵Nei kdo ava nei kuplung bin ni kdo kchol chaak ro memo? Mdit mata nei kuplungnee leiji khei athe naan mo?”

¹⁶Ava leiji dil knau rek ava ru krira, ungu ru kri rek ava dil knaura.

¹⁷Ungta Jisu ngi siikhu rek sowm lei knii ṭhida, Jerusalem tha hang da, ungu lam tha Mma ngi mhin inni theda,

¹⁸“Asuw in, nenni Jerusalem tha ka hang in min; ungta Mii Chapa ava thiimpu kinreel rek leh Nowlam chukpu rek hin kparlaan pthii ra ungu mmaanni mraal pii lam donle ke eayou ra,

¹⁹ungta ktlok chati rekki mdo pni chaak nraan ungu bunda khros leen mdo pthoi nraan kparlaan pthi lamra, ungta mnii kdum na thung ngi Mma ngi kring kardel ra.”

²⁰Ungta ava dilli Jebedi chapa rek nuh ngi arhang da mchapa rek tu kilṭhi ngi mmaiṭhuwm mi pkhuppi tardiil lamda Mhin do khat ṭhil chda.

²¹Ungbi Mma ngi mhin theda, “Talu angei da?” Mma ngi Mhin theda, “Nah Akruwngpaam thu hava nei kchapa rek kniia khatti achang ktong tha khatti alee ktong tha mkon chaak nlam ra pau mhai reen pik cha.”

²²Pdainu Jisu ngi arthawng da, “Ado ṭhil ava nang ngi dei pindi cha mti. Neiji kdo neek na tong thung ngi nee pchaang naan di?” Mmaanni Mhin the lamda, “Nee pchaang nikaan di.”

²³Mma ngi mhin inni theda, “Nei ktong nga nee pchaang naan di, pdainu kchang ktong tha kuk ong rang leh klee ktong tha ku kong ra ava Neiji kdo rot ra ava pme, pdainu Kpah ngi mdo purchuwl pik rek ava tum.”

²⁴Ungu sowm rekki ava maryaak in thungta, unao knii rek leen mmaanni kdung ngi plung pthit lamda.

²⁵Pdainu Jisu ngi Mhin ni own lam thida theda, “Ktlok chati rek ava mmaan ki paam kpu ngi mleen thaanni mdo paalna, ungta klin mii rekki mmaan leen rutan mdo trat ava naanni ado dee in.

²⁶Naan arlak va anto lua kurthuwk me; pdainu naan arlakki klin mii ava naan sra owr ra,

²⁷ungta naan arlakki ru kri ver mma ngi asuwk in ra;

²⁸Mii Chapa mak rap klua, sok talo psuk ra kujung pme pdainu sok klou ra kurjung, ungu Mma rinkhu ngi mii knempok mdo ktlan pik nra kurjung.

²⁹Ungu mmaanni Jerikho ki mvanthuw in thungta, kurtuwl mii rek klin lang lang ngi mdil ṭoida.

³⁰Ungta asuwn lamsiir ri mik ktot miilai knii kong daat lamda, Jisu kchet meek slii ava maryaak in thungta, mmaanni owng lamda, “Devid Chapa wonsat mhailo chaan!” dilamda.

³¹Ungbi kurtuwl mii rekki, “Rim kdi jiam in,” dilam da rai chlam da; pdainu kheel set setti mmaanni owng lamda, “Devid Chapa, Mukpu, wonsat mhailo chaan!”

³²Ungta Jisu ngi rip thida own lamda, theda, “Neiji talu ado ktlot pik raan angei inna?”

³³Mmaanni Mhin the chlam da, “Mukpu, kmik in kparvang so.”

³⁴Ungta Jisu ngi wonsat lo chlam da mmik in kmeida, ungbi tun kat daatti mmaanni khuw dei lamda ungu mdil ṭoi chlam da.