Read Lamkang MATHI 23 Bible Online

MATHI 23 - Lamkang bible

MATHI 23

¹Ava dilli Jisu ngi kurtuwl mii rek leh msiikhu rek hin theda,

²pharisi rek leh Nowlam chukpu rek ki Mousi longkhom leen ku ong lamda;

³ava leiji mmaan do the khim khaija atlo inra adan in, pdainu mmaan do tlot lu rang pme; mleija mmaanni mparyaam inna, pdainu mnongva tlo lamme.

⁴Mmaanva mii do diil pchaan ma bowr krik ki bowl lamda, ungu mii rek lukou leen thii lamda; pdainu mmaanva mkhut chel in daat rukva pursown lamme.

⁵Mmaanni do mkheng ava mii rek do dee rang ngi tlo lamda; mleija mleen thaanni laaika mjiik kṭum pa ngi arkeeng lamda, ungu mbuw mor in kturrown,

⁶ungta kmaal mun rek thung ngi mmun takjat ngeen lamda, ungu synagog rek thung ngi longkhom kṭha ngeen lamda,

⁷ungta bajaar mun thung ngi mii salaam ngei lamda, ungu mii ngi rabbi mdo dit ra ava ngei lamda.

⁸Pdainu naanni Rabbi dida ado to own nraan ki pme, mleija naanni Chukpu khat thloi in tinu, ungta akheng inni unao jesang in pti.

⁹Ungta dultipaam thung ngi ku mii khat lee hin apah dida own maan, mleija parwaan tha ka am naan ki Pah khat ado thloi in.

¹⁰Mata chukpu rek di maan, mleija Khrista tdit Chukpu khat ado thloi in.

¹¹Naan arlakki klin sii mii ava ngi naan ki sra owr kurthuwk ra;

¹²ungu ku mii khatti mdak saa mkar khiin nuwmbi, ava ktipneem pthii ra, ungta kneem mii rek ava ki khiing ra.

¹³“Pdainu ṭha tlot ktlo Nowlam chukpu rek leh pharisi rek naan ava suwkthi! Mleija mii rek mraal kpii ngi naanni parwaan Kruwngpaam arkam pthiin tinu; mleija naan adaksaa in ruk lut maan ti, mdit mata klut ra mii ruk plut maan ti.

¹⁴Kṭha do tlot ktlo Nowlam chukpu rek leh pharisi rek naan ava suwkthi! Mleija naanni meikhu inn kruwl inti, ksaangpa ngi kṭhil cha do tlot tlo inti; ava ngi mlei kurthuwk da klin sii ki mraal arlaang chnaan di.

¹⁵Kṭha tlot ktlo pharisi rek leh Nowlam chukpu rek naan ava suwkthi! Mleija miilai khatti plung mdo parthlen nra truwn leh laan tija arkaan inti, ungu mii ngi plung mparthlen dok le, knii kheel dekki naan adaksaa in lulu ngi sim nao purthuw krep pthiin tinu.

¹⁶“Mik ktot kṭhi rek naanna asuwn kthi! ‘Ku mii khatti luwbuk Inn ktham da pau mreel bi, ava do khat lee pme; pdainu ku mii khatti jeering luwbuk Inn ktham da pau mreel bi, mii ava mdo the dok ava ngi mbowlla,’ kdingi the in tinu.

¹⁷Mik ktot ka aak rek naan! Mleija tva ngi klin, jeering rang mo mdit mata jeering kurdowlli kthii luwbuk Inn rang?

¹⁸Ungta naanni theen tinu, ‘Ku mii khatti kchiir suwlbuwr ktham da pau mreel bi, ava do khat lee pme; pdainu kchiir suwlbuwr leen ki chla ava maktham bi, mdo reel dok ava ngi mma ava mbowlla.’

¹⁹Mik ktot rek naan! Mleija tva ngi klin betta, chla ava mo mdit mata chla ava kurdowlli kthii kchiir suwlbuwr da?

²⁰Ava leiji kchiir suwlbuwr kaktham mi mleenki do khim khai ruk mdo ktham kthen dok;

²¹ungta luwbuk Inn kaktham mii ava ruk pau mdo ktham kthen ungu mthungki ka am Mma ruk mdo ktham kthen;

²²ungta parwaan kaktham mii ava rukku, Isowr longkhom ungu ava leenki kuk ong rek ruk mdo ktham kthen.

²³“Kṭha tlot ktlo Nowlam chukpu rek leh pharisi rek naan ava asuwnkthi! Mleija naanni chiimuh mkheng tholowm piin tinu, ungu krik bet Nowlam mlei thu kindit, wonsat ava krin cha thu leek psuk in tinu; murson kleek kma hava lea naan ni ado tlot kat raan.

²⁴Mik ktot kṭhi rek naan! Naanni pdou rei pthii thiin tinu ut pjol in tinu!

²⁵“Kṭha do tlot ktlo Nowlam chukpu rek leh pharisi naanna asuwn kthi! Mleija naanni tong leh arkuw mduwn ava knowt in tinu, pdainu mthung nga naan ki avawnglum in leh daksaa akpirnin naanni kdim kcha a.

²⁶Mik ktot pharisi naan! Ru kri reeppi tong leh arkuw mthung ava aknowt dok in, mbi mduwn rukka kartleu chra.

²⁷“Kṭha do tlot ktlo Nowlam chukpu rek leh Pharisi rek naan ava asuwn kthi! Mleija naan ava mduwn kindang kṭha kpowlli tparnaal dang thlaan rek ava hep daat in pti, pdainu mthung ava kdiyou mii rek ava ru ungu ktobor ri kdim cha.

²⁸Ava leiji naan rukka mduwn daatti rinkindit ti mii rek hin kindang in pti, pdainu athung inna ṭha tlot ktlo leh pnu ngi kdim kchaan pti.

²⁹“Kṭha do tlot ktlo Nowlam chukpu rek leh pharisi rek naan ava asuwn kthi! Mleija naanni khulpu rek thlaan rek sak pik in tinu, ungu rinkindit rek purthlot in tinu,

³⁰theen tinu, ‘Nenni npah le in mpha thu na am daat tlaang inbi, khulpu rek hii kpubuw nenki ntum ka am kma rang nga.’

³¹Hanto adaksaan mraal kpii ngi sakhi rek kurthuwk da, mleija naan ava khulpu rek ke eayou mmaan ava chapa rek in pti.

³²Ava mkurthutta naanki apah leenni mdo parte na ava apdim dok in.

³³Pruwl nao rek naan, sim thu akbuk nraan thungki tak heppi karthlet chnaan di?

³⁴Ava ngi mlei kurthuwk da, Neiji khulpu rek leh ksing mii rek ungu Nowlam chukpu rek naan hinni mdo sii mii angṭhe ava naanni aeyou naan di ungta khros leen pthoi naan di ungu mii angṭhe ava synagog rek thung ngi bun naan di ungta khuwpii khat ki ngi khuwpii khat tha rei punthowm pthii naan di,

³⁵Ungta kdei cha kma Abel hii thung ki ngi Barakhia chapa Sakharia kpha, kchiir thungki ngi kchiir suwlbuwr kpha naanni ado eayo in dultipaam thung ngi rinkindit rek hii kbu mkheng ava naan leenni kurjung ra.

³⁶Kinditti, Neiji ahin thaanni kthea, hava mkheng nga hava charuwl rek mkheng leenni kthleng ra.

³⁷“O Jerusalem, Jerusalem, khulpu rek eayou tinu ungu nah hinni mdo sii mii rek ava lung ngi deeng you tinu! Tak hep pang kurnowlli Neiva anao lea harnu ngi msuwn rek mapthla ti ngi mdo om lulu ngi om nik di ungta nangva ro mti!

³⁸Asuw, a inn na ktlong reng rong ngi mmaak pthia.

³⁹Mleija Neiji ahin thaanni kthea, ‘Mukpu miing ngi kurjung Mma ava msuwkṭha, dida kthe du khim khai nang ngi vei khat mdei chnim ti.’ ”