Read Lamkang MATHI 25 Bible Online

MATHI 25 - Lamkang bible

MATHI 25

¹“Parwaan Kruwngpaam ava nala miilai sowm ava ngi meila sinda kphalpa kurdut ṭhira mcheen ava purtol che naan di.

²Miilai parnga rekka ka ak lam ungu miilai parnga rekka ksing rek lam.

³Mleija ka aak rekki meila mlo in mpha thu, mmaanni thaodii lou lamme;

⁴pdainu ksing rek va meila mlo in mpha thu, thaodii rukka mu uwm thuwn sin lamda.

⁵Kphalpa ngi mukto dok thungta, mkheng inni kurngui chlam da, iip dok lamda.

⁶Pdainu thanṭim jaanni krowl khatti owngda, ‘Asuwn, Kphalpa ava! Arva inra akurdut ṭhi chaan.’

⁷Ava dilli nala rek mkheng kardel lamda, mmeila in purthlong lamda.

⁸Ungbi ka aak rekki ksing rek hin theda, ‘Athaodiin mruk mhai pinṭhe pik chaan, mleija neen kmeidiin na kthlang kcha a.’

⁹Pdainu ksing rekki arthawng lamda, ‘Naan tum ruk neen ktum in ruk ku khop kma kro; ava leiji kjur mii hin vada ado ren chaak inni kursuk bet ra.’

¹⁰Ungta mmaanni kren ra mhai arlaan inni Kphalpa arjungda, ungu kurchuwl dok mii rek ava kphal kmaal ra hun ṭhi da; ungta thurngot arkam pthii da.

¹¹Ava dilli nala rek angṭhea thleng ro lamda, the lamda, ‘Mukpu, Mukpu, mhai pvan pik chaan.’

¹²Pdainu Mma ngi arthawng da, ‘Kinditti, Neiji ahin thaanni kthea, naanna adei maan ring.’

¹³Ava ngi mlei kurthuwk da asut pṭoi chaan, mleija naanni mpha don mṭhang daat don dei maan ti.

¹⁴“Mleija miilai khatti kipjiin rang ki ngi msra owr rek mhinni own lam thida, mulrou mkheng mdo sil nlam lulu;

¹⁵miilai khat hin mma ngi sum pun parnga pii da, khat hin knii ungta khat hin khat pii da, mma mma do pchaan dil kṭoiji pii da. Ava dilli mma ngi pjiin da.

¹⁶Sum pun parnga karlaang mma va chet tengda sum dowl lo nda; ungu sum pun parnga lot tpom da.

¹⁷Anto hep daatti sum pun knii kthloi ruk va knii lot tpom da.

¹⁸Pdainu sum pun khat karlaang mma va chet da dul tou thida mma chukpupa sum ava dowl pthii da.

¹⁹Tunva mpha roi ksot dil thang ngi sra owr rek chukpu ava thlung da ungu mmaan tu sum ava tai lamda.

²⁰Ungta sum pun parnga karlaang mma ngi arvang da, sum punparnga mdolot tpom tu arvan sin da, mhin theda, ‘Chukpu sumpun parnga mpii chtinu, sum pun parnga neiji lot tpom nu.’

²¹Mma ki chukpu ngi mhin theda, ‘Kṭha a, trin chaak kro sra owr; nang ngi hava mruk suwn thung ngi trin chaak akurhui leiji, do knempok asil na nik di; nangki chukpu kanpat thu lut cha.’

²²Ungta sumpun knii kthloi rukva arvang da, theda, ‘Chukpu nah asum pun knii mparlaan chti nu,hei sum pun knii lot tpom chnu.’

²³Mma chukpu ngi mhin the da, ‘Kṭha a, kṭha ungu trin chaak kro sra owr; hava mruk suwn thung ngi trin chaak kro akurthut leiji, hava leenni neiji do knempok asil na nik di, nang ki chukpu kanpat thu lut cha.’

²⁴Sum pun khat karlaang ruk va arvang da, the da, ‘Chukpu, nang nga kparsa miilai pti, nang ngi ado pṭau ma khau tinu, ado pkhui ma ado purku ava neiji deinu;

²⁵ava leiji aṭi chnu ungbi neiji chet nu tnek thu kdo dowl pthii. Hei ado ava alou cha.’

²⁶Pdainu mma chukpu ngi mhin arthawng da, ‘Kṭha kma howng kva sra owr nang! Neiji kdo pṭau ma khau nu kdo pkhui ma kdo purku adee mo?

²⁷Sum lot na thu ksum thii da, neiji kikinlet mpha thu mdo lot tpom tu kdo arlaan chaak rang nga nang ngi apartlai krea.

²⁸Ava leiji mma hinki sum ava alou inra sum sowm kthloi hin apiin.

²⁹Mleija ktlo nuwm mii ava hin kheelli kpii ra, ungta mma ngi kheelli kthloi ra; pdainu kthloi kma mii ava, mma ngi mdo thloi mruk suwn ava ruk klou pthii ra.

³⁰Ungta do ksi kma sra owr ava duwn ki kjiingnu thung ngi avar pthiin, ava thu mii rekki mhaa kril donle kṭap lamra.

³¹“Mii Chapa ava ngi waan tamsii rek mkheng tu mlaarnee ngi murjun mpha thu, mlaarnee longkhom leen Mma ngi kuk ong ra.

³²Mma maiṭhuwm mi chati rek mkheng ava kpurkuk ra, ungta Jao krung ngi keel rek thungki Jao rek mdo ṭhen lulu ngi, Mma ngi khat thungki khat kṭhen pthii ra.

³³Ungta Mma ngi jao rek ava mchang ktongki mkhut leen kthii ra, pdainu keel rek ava mlee ktongki khut thung ngi kthii ra.

³⁴Ava dilli Kruwng ngi mchang ktong ki mkhut thungki rek hin kthe ra, ‘Arhung in, O Kpah phowl kṭha kpha rek, dultipaam mapṭhan daat ki ado tpurchuwl pik dok in Kruwngpaam ava thung ngi am chaan;

³⁵Mleija Neiji kpoi mtham mpha thu then mpii chaan ti, kning makraal mpha thu dii mpii chaan ti, malpa kukurthut thu mkowl chaan ti,

³⁶kdak chaiji ka am mpha thu buw mpihiil chaan ti, kukoi thu mvel chaan ti, rowng inn thu ka am mpha thung ki hin mthlen pik chaan tinu.’

³⁷Ava dilli rinkindit rekki Mhin karthawng ra, ‘Mukpu tden thung ngi neenni apoi ktham dei innu apmaal innu, mdit mata aning makraal thung ngi dii akipneek inda?

³⁸Ungta tden thu malpa ngi thleng tinu akowl chaannu mdit mata adak chai dei innu dona akipihiil chaak in da?

³⁹Ungta tden thung ngi akoi dei innu mdit mata rowng inn thung ngi a am dei innu akvel chaak inda?

⁴⁰Ungta Kruwng ngi mhin inni karthawng ra, ‘Kinditti, Neiji ahin thaanni kthea, naanni ku u knao kdil sisi ado tlot in ava Nei kihinni ado tlot in kurthuwk.’

⁴¹Ava dilli Mma lee ktong tha ku kong rek hin kthe ra, ‘Ki hinki kursown dok in, pauhur do buk rek naan, dijabowl leh mtamsii rek tummi mdo purchuwl dok kṭuw knai kma meiṭhuwm thu lut chaan;

⁴²Mleija Neiji kpoi mtham mpha thu naanni then mpii maan ti, kning makraal thu kdo neek ra dii mpii maan ti,

⁴³malpa kukurthut thu mkowl chmaan ti, kdak chaiji ka am mpha thu buw mpihiil maanti, ku koi ungta rowng inn thu ka am mpha thu mvel maan ti.’

⁴⁴Ava dilli mmaan rukku karthawng ra, ‘Mukpu tden thu apoi tham da mdit mata aning kraal da, mdit mata malpa ngi am ti ungta adak chaiji am ti mdit mata koi ti mdit mata rowng inn thu a am kdee chun inni sok alo chmaan ring da?’

⁴⁵Ava dilli Mma ngi mhin thaanni karthawng ra, ‘Kinditti, Neiji ahin thaanni kthea, hava le kdil sisi leen naanni ado tlot in ava Nei kihin ni ado tlot in.’

⁴⁶Ungta mmaanna kṭuw knai kma mraal pii lam donle kupsun lamra, pdainu rinkindit rek ava kṭuw knai kma rinkhu tha ksii lamra.”