Read Lamkang MATHI 26 Bible Online

MATHI 26 - Lamkang bible

MATHI 26

¹Jisu ngi hava pau mdo the mkheng mupṭut dok le, msiikhu rek hin Mma ngi theda,

²“Nii knii dil tha taplaanna ka am ra ava naanni ado dee in, ungta Mii Chapa ava khros leen mdo pthoi nraan kparlaan pthii ra.”

³Ava dilli thiimpu kinreel rek leh mii rekki kver rekki Kaiphas tdit thiimpu kparthaang dulbukki kurkuk lamda,

⁴ungta Jisua kupru lulu kjowng da mdo aeyo nraan karseel lamda.

⁵Pdainu mmaanni theda, “Kmaal thung rang pme mleija mii rek ava ngi vawng klummi kut,lur lamra.”

⁶Tunva Jisu ngi raaichii kthung Simon inn thu ma am daat arlaanni,

⁷snu khatti reidii mman klu langlang mu uwm thung ngi sin da, Mhin arhang da, Mma ngi tebol be ngi mo kon daat arlaanni, mluw leen ptlong da.

⁸Pdainu siikhu rekki ava mdee in thungta, muplung in pthit lamda, the lamda, “Talu leija hava mdo partlai kre da?

⁹Mleija hava reidii ava sum knempokki jurda, ungu sra mii hinni mdo piik chaak kro.”

¹⁰Pdainu Jisu ngi ava tuk mdo sut leiji mhin inni theda, “Talu leiji snu ava mning atpumul inna? Mleija mma ngi Nei kihin ni kṭha deek nong tlo im da.

¹¹Mleija sra rek ava mpha ktai thung ngi naanni ado kilṭhi ṭhi daat in, pdainu naan va Neia mpha ktai thung ngi mthloi tlit daat ni maan ti.

¹²Nei kdaksaa leen mma ngi hava reidii mdo ptlon ava Nei kukulruwl nra mma ngi mdo purchuwl.

¹³Kinditti, Neiji ahin thaanni kthea, dultipaam mkheng thu hava kṭha paumin mkaryaam mpha thu, hava mma nong tlot ava kbin paphaakki kthe lamra.”

¹⁴Ava dilli Judas Iskariot tdit, sowm lei knii arlakki khat, mma ngi thiimpu kinreel rek hin chet da,

¹⁵theda, “Mma ava neiji ahin thaanni kparlaan na nea naanva talu mpii naan di?” Ungbi mmaanni thiir sum som kdum mhin ni pii lamda.

¹⁶Ungta mpha ava thungki ngi mdo parlaan pthii nrang ki mpha kcha mma ngi suw da.

¹⁷Tunva thowl ktaak thenpen kmaal mnii khat na thok nitti, siikhu rekki Jisu hin arvang lamda Mhin the lamda, “Nang ngi taplaanna amaal chaak nrang nga neenva tva thu purchuwl nikaan da?”

¹⁸Mma ngi theda, “Khuwpii thung ngi va in, ungu ksoi kma ra miilai khat hin atheen, ‘Chukpu, ngi theda, Neiki mpha ava knai tekka; nah inn thung ngi taplaanna ksiikhu rek tu dan chaanni.’ ”

¹⁹Ungta Jisu do the pik lam heppi siikhu rekki tlo lamda, ungu mmaanni taplaanna purchuwl chlam da.

²⁰Ungu khuw mjiin rui rui thungta, Mma ngi siikhu rek sowm lei knii tu tebol hin ko ong lam da;

²¹ungta mmaanni mmaal slii arlaan inni, Mma ngi theda, “Kinditti, Neiji ahin thaanni kthea, naan miilai khatti Neia mipthlei naan di.”

²²Ungu mmaanna kdung ngi muplung in ja chda, ungbi khat khatti Mhin, “Nei ngaal mo, Mukpu,” di lamda kthe pṭhun lamda.

²³Mma ngi arthawng da, “Neiji arkuw thung ngi kdo puhuwm ṭhi mma ngi mkipthlei ra.

²⁴Mii Chapa ava Mma mlei thu mdo kjit dok heppi kchet ra, pdainu Mii Chapa kipthlei mma ava msuwkthi! mii ava tuṭou ṭouvi mṭou mabi mma tumva kṭha rang nga.”

²⁵Mma kipthlei Judas ava ngi theda, “Chukpu, nei mo?” Mma ngi mhin theda, “Nah ado the ava.”

²⁶Tunva mmaanni mmaal arlaan inni, Jisu ngi thenpen louda, ungta phowl kṭha parlaan thida, khuida siikhu rek hin pii da, ungu theda, “Alou inra achaan; hava Nei kdaksaa.”

²⁷Ungta Mma ngi tong louda, mpanpaak dok diltha mhin inni pii da, theda, “Akheng inni aneen;

²⁸mleija hava paurina Neiki kihii, pnu rek mdo ptlot pik nra mii knempok tummi kdo pbuwk.

²⁹Neiji ahin thaanni kthea, naan tu kilṭhi ngi Kpah Kruwngpaam tha ren ava kneek du khim khai hava rik rou thei dii Neiji nee purnowl nimaang.”

³⁰Ungta ava diltha mmaanni laa thee lamda kruwn lown tha hang lamda.

³¹Ava dilli Jisu ngi mhin inni theda, “Snii ki jaan kat thung ngi Nei ava ngi mlei kurthuwk da, naan akheng nga tluw chnaan di; mleija ava hanto kjit da, ‘Neiji Jao krung ava prei nik di, ungta Jao rek mkheng nga kinṭheu tir chlam ra.’

³²Pdainu Neiji krin kardel dok dil tha, naan adu inni Galil tha vang nik di.”

³³Pitor ri Mhin thethuw da, “Nah aleiji mmaan mkheng tluw chdaat lam joso, neia tluw ni maang.”

³⁴Jisu ngi mhin theda, “Kinditti, Neiji ahin kthea, snii jaan kat thu harkhuwng ngi mkhuwn du ngi nang va vei kdum mmat na di.”

³⁵Ungbi Pitor ri Mhin theda, “Nah akdiyo ṭhi kma donle, neiji akmat tlo nimaang.” Ungta siikhu rek mkheng rukva anto the sap lamda.

³⁶Ungta ava dilli Jisu ngi mmun Gethsamani tdit ava thung ngi va ṭhi lamda, ungu Mma ngi siikhu rek hin theda, “Neiji va kursown da kṭhil chaak slii arlaan ni hava thung ngi am daat in.”

³⁷Ungta Mma ngi Pitor leh Jebedi chapa rek knii ṭhida, ava thung ngi kja lang lang leh plung kunchul pṭhun da.

³⁸Ava dilli Mma ngi mhin inni theda, “Kdiyou daat rang ngi kraothla ava kja kcha a; hava thu jiam inra mhai sut pṭoi ṭhi chaan.”

³⁹Ungta Mma ngi hai kursown bet thida, mmaiji ju kuwn da pukhuppi tardiil da ungu ṭhil chda, “Apah, mkurthut de rang ta hava tong ki hinki ava mhailo pik cha; joso Nei kdo ngei rang pme, pdainu Nah aplung bin daat ra.”

⁴⁰Ungu Mma ngi msiikhu rek hin marvan thungta ki iip daatti pha lamda; ungbi Mma ngi Pitor hin theda, “Nangva ṭhang khat pang daat rukka msut pṭoi ṭhi pchaang mti mo?

⁴¹Kepthleem thu atlaak ma nraan asut pṭoi inra aṭhil chaan; pthla va mtlot nuwm ma pdainu daksaa va ksowlla.”

⁴²Ungta vei khat nowlli mvei knit na ngi va da ṭhil chda, “Apah, Neiji kdo neek ma kro kma mkurthut cheen tung ngi mhailo pthii pik ma, Nah aplung bin daat so.”

⁴³Ungta Mma ngi marvan nowl thungta ki iip daatti pha nowl lamda, mleija mmik inna kdung reenni rik da.

⁴⁴Ava leiji Mma ngi ma pthii nowl lam thida, kṭhil chra mvei kdumna vada, mdo the ksa pauna rek anto jikki the nowl da,

⁴⁵Ava dilli Mma ngi siikhu rek hin arvang da theda, “Naanni iip tlit daat inti karnga in pti mo? Asuwn, Mii Chapa ava pnu kirvei rek khut thung ngi mdo parlaan pthii nrang ki ṭhang ava knaija.

⁴⁶Ekardel in; vang in che; asuwn Nei mkipthlei ava knaija.”

⁴⁷Ungta Mma ngi mpau slii daat arlaanni, sowm lei knii arlakki Judas ava ngi kurtuwl mii rek klin lang lang ngi ṭhida, kaang ksaang rek leh kchung rek sin lamda, thiimpu kinreel rek leh mii rekki kver rek hin ki arva lamda.

⁴⁸Tunva kipthlei ava ngi titinna khat pii lamda, theda, “Nei kdo put ra Miilai khat ava ra; Mma akjowng chaan.”

⁴⁹Ungta mma ngi Jisu hin arhang da theda, “Kdaai kurthuwk so, Chukpu!” Ungu mma ngi put da.

⁵⁰Jisu ngi mhin theda, “Cham, talu leiji hava thu kthleng pti da?” Ava dilli mmaanni arhang lamda, mkhut inni Jisua kjowng lamda.

⁵¹Ungta asuwn, Jisu doṭhi rek thung ki khatti mkaang ksaang mklee thungta, thiimpu kparthaang suwk khat knaa sel buk da.

⁵²Ungbi Jisu ngi mhin theda, “Akaang ksaang nga ma am na thu athii pinle dok; mleija kaang ksaang ksin mii mkheng nga mkaang sin inni kmaang tir chlam ra.

⁵³Kpah hin Neiji kthe bi Mma ngi sowm lei knii kheel dekki waan tamsii rek mpunpa msii pik pchaang nime kdingi naanni abin inna?

⁵⁴Pdainu anto mkurthuttu tak heppi Laaika rek ava kurkhum rang da?”

⁵⁵Ṭhang ava kat thu Jisu ngi kurtuwl mii rek hin theda, “Naanni kup pru mraal kpii heppi, kaang ksaang leh kchung rek sin in ti, Nei mikṭhi ra kthleng in pti mo? Luwbuk Inn thu mnii ktai Neiji ku ong nu kpurchu mpha thu naanni mukjowng maan ti.

⁵⁶Pdaiinu hava le mkheng nga khulpu rek Laaika rek mkurkhum nrang lei kthuwk.” Ava dilli siikhu rek mkheng inni mada chen chtir lamda.

⁵⁷Ungta ava dilli kukjowng rek va Jisua Nowlam chukpu rek leh kver rek kurku na Keiphas tdit thiimpu kparthaang hinni ṭhi lamda.

⁵⁸Pdainu lam karlat haiji Pitor va mdil ṭoida, ungta thiimpu kparthaang dulbuk kpha dekki ṭoi da, mthu lut da mṭut na kdei rang ngi karseel rek tu ko ong sap lamda.

⁵⁹Tunva mmaanni mdo eayo nraan thiimpu kinreel rek leh karseel lop mkheng ngi Jisu mraal kpii ngi rinpaumin kindit kma the psuk lamda,

⁶⁰pdainu kindit kma sakhi rek knempok thleng daat joso mmaan ni khat lee pre pha lamme. Mṭut na rel tha miilai knii rekki mdu suk inni arhang lamda

⁶¹the lamda, ‘Hava Miilaiva theda, Isowr luwbuk Inn ava ea krep thi nik don nii kdum daat thung ngi sa nik di,’ dida Mma ngi mthe.

⁶²Ungta thiimpu kparthaang ngi rip da theda, “Ado arthaan ra ame mo? Hava mii rekki mraal akpii ngi sakhi rek mdo piik inna talu lei da?”

⁶³Pdainu Jisua rim kdi am chda. Ungta thiimpu kparthaang ngi Mhin theda, “Kring Isowr kthamnu neiji Nah hin kthea, Nah Isowr Chapa akurthutta mhai the pik chaan.”

⁶⁴Ungbi Jisu ngi mhin theda, “Nah do the ava Ping. Pdainu Neiji ahin kthea, hava dil tha Mii Chapa ava ngi ruktang chang ktong tha ku ongda, ungu parwaan ki armei rek tu kurjung nang ngi dei nadi.”

⁶⁵Ava dilli thiimpu kparthaang ngi mphrik kturrown ri jen thida theda, “Mma ngi Isowr kjowm kcha ngi kpauva, talu leiji nenni sakhi murson ta thlaam raan da? Tunva Isowr kjowm kcha ngi mpau naanni aryaak sap inna.

⁶⁶Naanva talu heppi akṭewl inna?” Mmaanni arthawng lamda, “Mma ngi mdiyo ra ava kngei inna.”

⁶⁷Ava dilli mmaanni Mmai leen ptil kballi pthot lamda, ungu prei lamda; ungta mii angṭhe va tpeeng lamda,

⁶⁸the lamda, “Mhai purphuwn pik chaan, Khrista Nang ngi! Nah akipreija ku?”

⁶⁹Tunva Pitor ra duwnki dulbukki ku ong daat da. Ungbi sra owr nala khatti arva da theda, “Nang rukka Galil ki Jisu dil kṭoi pti.”

⁷⁰Pdainu mkheng in maiṭhuwm mi mma ngi mat da theda, “Nang do the ava talu tdit neiji dei maang.”

⁷¹Ungta mma ngi dulbuk tha mvan thungta, sra owr snu khat nowlli deida, ungbi mbe ngi krip daat rek hin theda, “Hava miilai ava Nasareth ki Jisu tu kilṭhi.”

⁷²Veikhat nowlli mma ngi pau ktham da mat da, “Neiji hava Miilai ava dei chliit maang.”

⁷³Ma am bong le mbe ngi krip daat rekki Pitor hin arvang lamda the lamda, “Ksoi liit kma nang rukka mmaan arlakki khat pti, mleija akurthlon akurbowlli rome.”

⁷⁴Ava dilli mma ngi mdaksaa pauhur kurbuk da ktham da kthe pṭhunda, “Hava Miilai ja neiji dei chliit maang.” Ungbi tun kat daatti harkhuwng ngi khuwngda.

⁷⁵Ungta Pitor ri Jisu do the ava bin phaak da, “Harkhuwng ngi mkhuwn du ngi nang va vei kdum mmat na di.” Ungu mma ngi duwn tha van thuwk da mning ksiinni ṭap chda.