Read Lamkang MATHI 28 Bible Online

MATHI 28 - Lamkang bible

MATHI 28

¹Tunva sabath nit dil tha, hapta ki mnii khat na thokki khuw mutmul daat arlaanni, Magdaleni Mery leh Mery murson rekki thlaan ksuw ra chet lamda.

²Ungta asuwn, ava thu ringnaang klin lang lang khat thuwk da; mleija parwaan ki Mukpu waan tamsii arjung ṭumda, ungu lung phel ava purlup pthiida, thida mleen ko ong da.

³Mrungchen ava kowl kiplek hep daat kurthuwk da, ungu mdo mna ava tbuwr heppi powl da.

⁴Ungta thlaan krung mii rekva Mma mdo ṭit reen lei inni kunchun lamda kdiyou rek lulu ngi am chlam da.

⁵Pdainu waan tamsii ngi snu rek hin theda, “Naanni ṭi maan; mleija Neiji kdea, khros leen mdo pthoi in Jisu ava kthlaam in pti.

⁶Mma ava hava thu ame; mleija Mma ngi mdo the dok heppi, kring kardel dok kcha. Arvang in, Mma iina mun ava asuwn.

⁷Ungta kbeiji vang inra, msiikhu rek hinni, Mma ava kdiyou thungki kring kardel dokka, adi inra ason pik chaan, ungu asuwn, Mma ava naan adu inni Galil tha kvang nga; asuwn, Neiji akthe pik dok inna, ava tha naanni Mma ava dei chnaan di.”

⁸Ava leiji mmaanni thlaan thungki mṭit in leh kheel sii ki mkanpat inni kuknotti sun lamda, ungu msiikhu rek hin ksong rangki chen lamda.

⁹Ungta asuwn, Jisu ngi kurdut ṭhi lamda mhin inni theda, “Kdaaiji aju ṭhi chaan so!” Ungu mmaanni hangkal lamda mkhu kjowng lam da, Mma ava luwbuk chlam da.

¹⁰Ava dilli Jisu ngi mhin inni theda, “Ṭi maan; ku u knao rek ava ngi Galil tha mvan nraan, vang inra, pau ason pik chaan; ava tha mmaanni mikdei ro lamra.”

¹¹Ungta mmaanni hanto mvan slii arlaan inni, asuwn, kseel rek mii angṭhe ngi khuwpii tha vang lamda, kthuwk nong mkheng ava thiimpu kinreel rek hin song lamda.

¹²Ungta mmaanni kver rek tu kurdu lamda karseel lamda, rawlmii rek hin sum pii lamda,

¹³ungta the lamda, “‘Neenni ki ii chaak dok arlaanni, jaanni msiikhu rek thleng lamda pru dok lamda,’ adiinra mii rek hin asong in.

¹⁴Ungta hava ava paam kpupa knaa mthlun bi, naanni plung ado pjat ma nraan, neenni mning pthlung chdaat ni kaan di.”

¹⁵Ungta mmaanni sum ava lou lamda, mmaan doparseel heppi tlo lamda; ungu hava paumin ava Jehudia rek arlakki snii kpha thung ngi kurjou da.

¹⁶Ungta tunva siikhu rek sowm lei khat ava Galil tha vang lamda, Jisu do the pik lown ava tha hang lamda.

¹⁷Ungta mmaanni mdee in thungta luwbuk chlam da, pdainu mii angṭheva plung kinṭhekki bin lamda.

¹⁸Ungu Jisu ngi arvang da mhin inni theda, “Parwaan ki leh dultipaam thungki rutan mkheng ava Nei kihin ni mitpiik dok.

¹⁹Ava leiji chati rek mkheng thung ngi chet inra, siikhu rek aseem in, ungta Mpah, Mchapa, ungu Pthla Kchiir miing ngi baptis aptlot in,

²⁰ungu Neiji naan hin pau kdo reen mkheng ava mdo dan nraan apurchuk in; ungta asuwn, kum ṭut du khim khai, Neiji mpha ktai thu aṭhi nikaan di.”