Read Lamkang MATHI 3 Bible Online

MATHI 3 - Lamkang bible

MATHI 3

¹Mpha ava thu baptis kuptlot Johon thlengda, Judia thungki kbowklaiji paryaam da.

²“Plung ren ahur in, mleija parwaan Kruwngpaam ava knai tekka.”

³Mleija “Kbowklaiji krowl khatti owngda: Mukpu lamṭoi ra apurchuwl pik, Mkhu ther nrang rek arjit pik;” havaa khulpu Isaijah ngi mdo the dok kat kurthuwk da.

⁴Tunva Johon na ut mulli turkhown dona hiil naa da, murkowl saavun sulpaar kparyeel da; ungu khaopruwn leh nowm pkhui dii chaa needa.

⁵Ungta Jerusalem thungki, ungu Judia mkheng thungki,ungta Jordon paamkowl mkheng thungki, mii rek ava mma hin thlengda,

⁶ungta mmaanni mupnu ton in mdo the thut intu kilṭhi ngi Jordon kreng thu mma ngi baptis ptlot pik lamda.

⁷Pdainu mma ngi Pharisi rek leh Sadusi rek knempok baptis ktlo ra karva slii ava mdee thungta, mma ngi mhin inni theda, “Pruwl doi naorek naan! Plung thit kthleng rang thungki kchen daak ra ak sii inna ku da?

⁸Plung ren kuhur akurhui nraan thei echui in;

⁹‘Neen kpah raanna Abraham kthloi in,’ dida adaksaa in thung ngi kthe nuwmmi am maan; mleija neiji akthe inna, Isowr va hava lung rek thungki ava Abraham naole ngi kpurthuw kapchaang ra.

¹⁰Tun rukva ding rek arjuwng leen ṭhii rek kaksai daatta; thei kṭha kchui kma ding rek khim khaija phuwr donle mei thu kvar pthii ra.

¹¹“Plung ren kuhur leiji neiva dii ngi baptis akuptlot in; pdainu nei kdil ṭoida karvang Mma ava nei kihinnu klin lang lang,Mkhu kok rek ruk kuhur rang nga nea kurhui chmaang; Mma ava ngi pthla kchiir leh mei tu kurthloppi baptis akuptlot chraan.

¹²Mdo pkhui nrangki tuhu ava mkhut thung ngi ka am daat, Mma ngi pkhuida mdo pintiin kehu mchang rek ava ktom thu kthiira, pdainu mpirvii ava kṭuw knai kma mei thu kapkaa pthiira.”

¹³Ava dilli Jisu ngi Johon hin baptis mdolo chaak nra Galil ki Jordon tha arvang da.

¹⁴“Nang ngi nei baptis ado tuptlot rang kchang, nei kihin ni Nang kthleng pti mo?” dida kthe pkhaan ruk kro.

¹⁵Pdainu Jisu ngi mhin arthawngda, “Tunva anto chdaat so; mleija rinkindit rek mkheng nenni tpurkhum na kurthuwk ra. Ava dilli Johon ni ro da.

¹⁶Ungta Jisu ngi baptis mtlot mpha thu dii thungki kbei sekki arhun thuwk teng da,ungu asuwn, parwaan kparvang da, uṭhuw heppi Isowr pthla arjung ṭumda, mleen ni kchuk dei da; ungta mleenni lengda.

¹⁷Ungu asuwn, parwaan ki krowl khatti theda, “Hava Nei kwonsat lo Kchapa, Mhin kning kthlung nga.”