Read Lamkang MATHI 4 Bible Online

MATHI 4 - Lamkang bible

MATHI 4

¹Ava dilli Jisua dijabowl do pthleem ra pthla ngi kbowklai tha ṭhida.

²Ungta Mma ngi nii somplii jaan som plii thu then ngowl da, ava dilthang ro ngi mpoi tham da.

³Ungta kepthleem mi Mhin arva da, theda, “Nah Isowr Chapa akurthutta hava lung rekka thenpen apur owl.”

⁴Pdainu Mma ngi arthawng da, “Ava mdo kjit dok.” ‘Thenpen daatti mii ava ring nime; pdainu Isowr ner thungki kthuwk pauna ava khim khai daat ra.’

⁵Ava dilli dijabowl li kchiir khuwpii tha hanṭhida, ungta luwbuk Inn kchuwng ver leenni kalṭhida.

⁶Ungu Mhin theda, “Nah Isowr Chapa akurthutta adaksaa ava jungkhuwng; mleija ava kjit dok da, Nah aksut pṭoi ra Mma ngi waan tamsii rek akpiira ungta lung khdaat preva ngi akhu mdo thown ma nra, mkhut inni akukjowng lamra.”

⁷Jisu ngi mhin theda, “Ava ruk mdo kjit dok; nang ngi nang ki Isowr Mukpu ava ado pthleem ro nime.”

⁸Veikhat nowlli dijabowlli lown kparthaang sii ava leen ṭhida dultipaam thungki kruwngpaam rek mkheng leh mlaarnee Mhin tdet da,

⁹Ungta Mhin theda, “Nang ngi tluwda luw atbuk bi havale mkheng nga Nah hin apii chnik di.”

¹⁰Ava dilli Jisu ngi mhin theda, “Esun dok, Seitaan mleija hava mdo kjit dok; ‘nang ngi nangki Isowr Mukpu ava luw ado buk ra ungta Mma daat hin sok adolo ra.’”

¹¹Ava dilli dijabowlli Mma ava ma pthii da; ungu asuwn,waan tamsii arjung da Mhin sok lo pik da.

¹²Tunva Johon mdo kjown dok in Mma ngi maryaak thungta, Galil tha vang thliir chda.

¹³Ungta Nasareth ma thida truwn biing ngi Kaparnahum tha, Jebulun leh Naptali paamkowl tha am chdaat da.

¹⁴Khulpu Isaijah dothe dok ava mkurkhum na kurthuwk da:

¹⁵“Jebulun paam leh Naptali paam tha, Jordon arkaan da,truwn ktong tha, ktlok chati rek Galil ava tha,

¹⁶kjiing thu ka am mii rekki, klin lang lang ki mar awng dei da, ungta ava paamkowl tha ungu, kdiyou thu ka am mii rek hin mar awng kleng nga.”

¹⁷Mpha ava thu Jisu ngi kparyaam pṭhunda, theda, plung ren ahur chaan, mleija parwaan Kruwngpaam ava knai tekka.

¹⁸Mma ngi Galil truwn be ngi mkurlon thungta,Pitor mdo dit Simon leh mnaopa Andrija unao knii ngi truwn thu kchak kdeeng slii hai deida; mleija mmaanna tuwlva kukjowng mii rek lam.

¹⁹Ungta Mma ngi mhin inni theda, “Kdil aṭoi chaan; ungu Neiji mii rek kukjowng apurthuw nikaan di.”

²⁰Ungta mmaanni makchak rek in ma pthii teng lam thida, Mma dil ṭoi chlam da.

²¹Ungu ava thungki anto kchet slii ngi Jebidi chapa rek Jeems leh mnaopa Johon unao knii rekki, mpah in Jebidi tu arkuwng leen makchak rek in ktuphut slii meek deida; ungbi Mma ngi own lamda.

²²Ungta mmaanni arkuwng leh mpah in ava ma pthii teng lamda, ungu Mma dil ṭoi chlam da.

²³Ungta Jisu ngi Galil paam mkheng thu tlowng da, synagog rek thu purchuk da; ungu Kruwngpaam kṭha paumin paryaam da, ungta omlai khim khai leh mii rek arlakki msik msik omlaiji kukoi pdam da.

²⁴Syria paam mkheng nga Mma mlei thung ngi pauren rek kurjou da, ungta kukoi rek mkheng Mhin ṭhi paphaak lamda; omlai msik msikki kukoi rek, ungu kpaang kma rek; ramṭhi rek, arngol rek; kyeng rek Mma ngi pdam pik lamda.

²⁵Ungta Galil thungki, Dikapoli thungki, Jerusalem thungki, Judia thungki, ungu Jordon hai kheel dek thung ki mii rek klin lang lang ngi kurtuwl da Mdil ṭoida.