Read Lamkang MATHI 7 Bible Online

MATHI 7 - Lamkang bible

MATHI 7

¹“Naan ado tikṭewl ma nraan kṭewl maan.

²Mleija naan do kṭewl ava ngi akekṭewl raan; ungu naanni parte da ado piik naan thung ngi akparte pik raan.

³Naan adak kat in mik tun ki ktobor kdei kma, talu leiji a u anao mik thungki dangka arko inna?

⁴Naan amik kat in leenki ktobor ma am daat arlaannu, ‘Amik leenki dangka lou pthii ni,’ kdingi tak heppi a u anao hin the naan di?

⁵Ṭhat tlo ktlo naan, ru kri ngi naan adak kat mik thungki ktobor alou pthii dok in, ungu a u anao mik leenki dangka ava ado lo pthii nraan kinthiir deekki dei ro naandi.

⁶“Kchiir do ava ui rek hin pthii maan, ungu vak maiṭhuwmmi asum khau pthii maan, mmaanni mkhuwnni kther pthii ra ungu karheel donle aknam raan.

⁷“Aṭhil in ungu akpii chraan; athlaam in ungta pha chnaan di; thurngot aṭhil in, ungu akpvan pik raan.

⁸Mleija kṭhil cha mii pum ktaiji marlaanna, ungta kthlaam mii ngi mphaak chaakka, ungu thurngot kṭhil mii hin kapvan pik ra.

⁹Mata naan ku mii khat hin mchapa ngi thenpen mṭhil na, mhin lung khat kpii rang mo?

¹⁰Mata tuwlva khat mṭhil na mhin pruwl khat kpii rang mo?

¹¹Naanni kṭha kma tija kurthuwk chdaat jownti, anaole hin kṭha apiik de innu, parwaanki naan Apah va Mhin kṭhil cha reka tija thu kṭha do kpii chrang!

¹²Ava leiji naan hin mii do tlot ra ado ngei in heppi, mmaan hin atlo in, mleija hava Nowlam ungu khulpu rek kurthuwk.

¹³“Paltong ktarbik thu lut chaan; mleija paltong kparjaa ungu mlam ko ol ava kukrop chrang ki lamtha mdo ṭhi, ungu ava thu klut miia knempok.

¹⁴Mleija paltong ktarbik ungu mlam kparsa ava ngi rinkhu tha mdo ṭhi ungu kpha kcha mii rek ava ktlowm tekka.

¹⁵“Jao dona knaa, pdainu mril inna nowm tkei kurthuwk, kinditkma khulpu rek naan hin kthleng ra, chek asin chaan.

¹⁶Mmaan ava mthei inni naanni dei naandi. Tirliing leen ki rik rou mdit mata tirliing chaam leenki kduwt armel purku in mo?

¹⁷Ava leiji ding kṭha khim khaiji thei kṭha kchui, pdainu ding kṭha kma leen va thei kṭhakma kchui.

¹⁸Ding kṭha ngi thei kṭhakma chui me, mdit mata ding kṭhakma ngi thei kṭha chui me.

¹⁹Thei kṭha kchui kma ding khim khaija kphur pthii ra ungu mei thu kvar pthii ra.

²⁰Anto hep lulu ngi mmaan ava mthei rek inni naanni dei naan di.

²¹“Nei kihin Mukpu, Mukpu, dida kthe mii pum ktaiji parwaan Kruwngpaam lut chip pchaang nime, pdainu parwaan ki Nei Kpah Mma plung bin ktlo mii ava daat ra.

²²Ava nitti mii knempokki ‘Mukpu, Mukpu,’ Nah amiing ngi neenni pau phuwng maan ring mo? Ungu Nah amiing ngi tarnam rek rei pthii maan ring mo? Ungta Nah amiing ngi klin klin nong rek tlo maan ring mo? didonle kthe lamra.

²³Ungu mhin inni Neiji, ‘Naanna adei maan ring; Kihin ki esun dok in, kṭhakma ktlo rek naan,’ dida thethuw nikdi.

²⁴“Hava Nei kpauna rek aryaa thida ktlo mii pum ktai ava lung leen inn ksa miilai ava hep daat ra;

²⁵ungta khuw rada, ungu dii linda, tarthli ngi raanda, pdainu tluw me, mleija lung leen mdo pri kurthuwk.

²⁶Ungta hava Nei kpauna rek aryaa thida ktlo kma mii pum ktai ava sitphui leenni inn ksa ka ak miilai khat ava hep daat ra;

²⁷ungta khuw rada, dii linda, tarthli ngi raan da, ungu inn ava deeng da, ungta tluw da, ungu mmeel kthi lang lang ngi tluw chda.

²⁸“Ungta Jisu ngi hava le mdo the mupṭut dok thungta, Mma do purchu ngi kurtuwl mii rekka ngak chlam da,

²⁹mleija Mma ngi rutan pum khat heppi purchuk da, ungu mmaan ki Nowlam chukpu rek hep daat va kurthuwk me.”