Read Lamkang MATHI 8 Bible Online

MATHI 8 - Lamkang bible

MATHI 8

¹Mma ngi lown leen ki murjun ṭum thungta, kurtuwl mii rek klin lang lang ngi mdil ṭoi da;

²ungta asuwn, raaichii kthung miilai khatti arva da Mmaiṭhuwm mi pkhuppi tirdiil da, Mhin theda, “Mukpu, Nang ngi atrot pik ta mhai partleu cha.”

³Ungta Mma ngi mkhut khiingda mma makmei chunni, theda, “Neiva krotta, ekartleu cha.” ungu tun kat daatti mraaichii ava tlei chda.

⁴Ungu Jisu ngi mhin theda, “Asuw, ku mii khat lee hin do khat lee the ma; pdainu vang ra, thiimpu hin adaksaa ktardet cha, ungta mii rek hin ado tdet na ngi Mousi paureen dil kṭoiji tlaai adown chaa.”

⁵Jisu ngi Kaparnahum tha mhai lu thungta, rawlmii klin khatti Mhin arva da ktham chda,

⁶ungu theda, “Mukpu, nei ksra owr ava yeng chda kdung plung kinsiir ri inn tha iip da ka am daatta.”

⁷Ungta Mma ngi mhin theda, “Neiji vada pdam nik di.”

⁸Pdainu rawlmii klin ava ngi Mhin arthawng da, “Mukpu nei ki inn thung ngi arhai rang nga neia kurhui chmaang; pdainu pauna hehe ngi athe,ungu ksra owr ra kdam chdaat ra.

⁹Mleija nei rukka rutan kurdu ngi ka am miilai khat ping, nei kukur du ngi rawlmii rek ka am lam; ungta hava khat hin ni ‘Va’ kdit che mma ngi vada, ungu ktlok nitti ‘Arvang’ kdit che arvang da; ungta ksuwk hin ‘Hava atlo’ kdit che mma ngi tloda.”

¹⁰Jisu ngi hava maryaak thungta ngak chda,ungu mdil kṭoi rek hin Mma ngi theda, “Kinditti, Neiji ahin thaanni kthea, Isreel thung rap kluva hanto lu ngi krin cha Neiji pha liit maang.

¹¹Neiji akthe inna,kniw thuwna ki leh kniw tlaak na ki mii knempok thleng donle parwaan Kruwngpaam tha Abraham, Isek ungta Jakob le tu tebol hin kuk ong lamra.

¹²Ungta hava kruwngpaam chapa rekka duwnki kjiing thu mvar pthii mpha thu, ava thu mii rekki ṭap donle mhaa in kikril lamra.”

¹³Ungu rawlmii klin ava hin Jisu ngi theda, “Vangcha; nang ngi ado rin chaak heppi kurthuwk so.” Ungta sra owr ava mpha ava kat thung ngi dam chda.

¹⁴Ungu Jisu ngi Pitor inn thung ngi mlu thungta, mma kternu ava riphaakki koida ki iip daat deida.

¹⁵Mma ngi mkhut tha makmei thungta,mriphaak va ma dok da, ungta mma ngi kardel da Mhin sok lo chda.

¹⁶Ava nit kjiing tha mii rekki tarnam rek doṭhi mii knempok Mhin arhai ṭhi lamda; ungu pauna daatti pthla rekka rei pthii da, ungta kukoi mkheng nga pdam pik lamda.

¹⁷Khulpu Isaijah ngi hava the dok da, “Mma ngi nenki nukduwng milo pik inda na omlai in mi hur pik inda,” dida mdo the ava mkurkhum na kurthuwk.

¹⁸Tunva kurtuwl mii klin lang lang ngi Mma mdo klop dok Jisu ngi mdee thungta, raalpha khat tha mvan nraan Mma ngi pau pṭumda.

¹⁹Ungta Nowlam chukpu khatti Mhin arhang da theda, “Chukpu, Nah ache na ktai thu aju ṭoi chni.”

²⁰Ungbi Jisu ngi mhin theda, “Tkei rekka mkhur in ka am, kjuwng puwa rekka mbuw in ka am; pdainu Mii Chapa ngi mluw mdo thiik chaak nra mmun khat lee ame.”

²¹Ungta siikhu rek ktlok khatti Mhin theda, “Mukpu, ru kri ngi vang nira kpah alruwl chdok lap ni.”

²²Pdainu Jisu ngi mhin theda, “Kdil aṭoi cha ungu kdiyou rekka mdak in diyo mdo alruwl chaak nlam ra ama pthii.”

²³Ungu Mma ngi arkuwng leen mtuwn thungta, msiikhu rekki mdil ṭoi chlam da.

²⁴Ungta asuwn, truwn leen tchangkhuw klin lang lang khat raang da, ava leiji arkuwng ava truwn thung ngi kpurlup rang ngi tloda; pdainu Mma ava iip dok da.

²⁵Ungu mmaanni Mhin pha lamda, pardel lamda, Mhin the chlam da, “Mukpu, mhai ktlan chaan, kmaang chra nthe ina.”

²⁶Ungbi Mma ngi mhin inni theda, “O mruk suwnni krin cha rek naan, talu leiji kṭi in pti?” Ungta Mma ngi kardel da tchangkhuw kraang leh truwn ava raida; ungbi pum daaiji daai chda.

²⁷Ungta mii rekka ngak chlamda the lamda, “Tchangkhuw kraang leh truwnni mdo pṭoi hava Miilai ava ku rang da?”

²⁸Ungta Mma ngi raalpha khat ktong tha, Gadarenis khuwpaam tha marvan thungta, thlaan rek thungki kthuwk tarnam rek doṭhi miilai knii ngi kurdut ṭhida, ramtleng ngi ma am lei inni ku mii khat lee ngi ava ktongki lam ava ṭoi pchaang me.

²⁹Ungu asuwn, mmaanni owng lamda, “O Isowr Chapa neenna talu mhai pardit chnaan di? Mpha mvee du liitti neen mkapja raan kthleng pti mo?”

³⁰Tunva mmaan amna ava raalpha ngi vak mluwngpa ava maal meek lamda.

³¹Ungu tarnam rekki Mhin ktham chlam da, “Nang ngi atrei pthii raanta vak luwng thu mhai sii chaan,”

³²Ungbi Mma ngi mhin inni theda, “Va in,” Ava lei mmaanni arvang thuwk lamda; ungu asuwn, kham kukki vak luwng rek mkheng nga truwn thu jungjaam lamda, dii thu tla you tir lamda.

³³Ungta kseel rekka chen chlam da, khuwpii tha chet lamda, mmaanni do khim khai, ungu tarnam rek doṭhi rek thung ngi kthuwk ava song lamda.

³⁴Ungu asuwn, khuwpii rek mii mkheng ngi Jisu kurdut ṭhira arva lamda; ungta mmaanni mdee in thungta, mpaam in thungki mkunsun dok nra Mhin ktham chlam da.