Read Lamkang MATHI 9 Bible Online

MATHI 9 - Lamkang bible

MATHI 9

¹Ungta Mma ngi arkuwng khat leen tuwng da, Mma mdak kat ki khuwpii tha arvang da.

²Ungu asuwn, mmaanni kyeng miilai khat ava mi ii na tu arhai kdom lamda; ungbi Jisu ngi mmaan do rin chaak ava mdee thungta,kyeng miilai ava hin theda, “Kchapa aplung apnet; apnu tong rekka akuptlot pikka.”

³Ungta asuwn Nowlam chukpu rek angṭhe ngi msingreel inni the lamda, “Hava Miilaiva Isowr kjowm cha ngi kpauva.”

⁴Pdainu Jisu ngi muplung reel in deida, theda, “Talu leiji aplung ril in thung ngi kṭha kma ado reel inda?

⁵‘Apnu ton rekka akuptlot pikka,’ dida tithe mdit mata, ‘Ekardel ra echet,’ dida tithe ava tva ngi ko ol betta?

⁶Pdainu Mii Chapa ngi dultipaam thu pnu rek mdo ptlot pik naki rutan mthloija tdit naanni ado dee nraan,” Kyeng miilai ava hin Mma ngi theda, “Kardel, a iina achomra, a inn tha vang cha.”

⁷Ungbi mma ngi kardel da mi inn tha vang da.

⁸Kurtuwl mii rekki ava mdee in thungta ṭi chlam da, ungu miirek hin anto lu rutan kpii Isowr ava punlor chlam da.

⁹Jisu ngi ava thungki hanto mhai kurlon thungta, khasna inn thung tha ku kong daat Mathi mdo dit miilai khat deida; ungbi Mma ngi mhin theda, “Kdil aṭoi cha.” Ungta mma ngi rip daat da mdil ṭoi chda.

¹⁰Ungu inn thu tebol hin mku on thungta, asuwn khasna klou rek leh pnu kirvei rek knempokki Jisu leh msiikhu rek ku on ṭhi lamda.

¹¹Ungu Pharisi rekki hava mdee in thungta, mmaanni msiikhu rek hin the lamda, “Talu leiji naanki Chukpu va khasna klou rek leh pnu kirvei rek mdo maal ṭhi da?”

¹²Pdainu Mma ngi ava maryaak thungta theda, “Kchun kdam mii va kdim kriing me, pdainu kukoi rek daat.

¹³‘Neiva wonsat kthloi kdo ngei, ungu tlaai kdown ngei maang,’ dinu Neiji kdo the ava vang inra talu mdo thena kdingi ekurchuk chaan. Mleija Neiji rinkindit rek ko ownra kurjung pmaang, pdainu pnu kirvei rek ko own kurjung ping.”

¹⁴Ava dilli Johon siikhu rekki Mhin arva lamda, the lamda, “Neen leh Pharisi rek va then ngowl kchok innu, pdainu talu leiji Nah siikhu rek va then ngowl lam me da?”

¹⁵Ungbi Jisu ngi mhin inni theda, “Kphalpa ngi ma am ṭhi daat lam arlaannu, mmal rek va kurnung karbaang don ka am lam rang mo? Mmaan arlakki kphalpa mdo lo dok nrang ki mnit rek karvang ra, ava dil ro ngi then kngowl lamra.

¹⁶Ungta ku mii khat lee ngi buw ren laak ava ngi buw pliw tun kleng lot nime, mleija mdo lot ava ngi buw ava kekṭet ra ungu kheel sii ngi kjen ra.

¹⁷Mata rik rou dii ren ava rik rou dii pliw am ndaat saavun khau thu daal nime; ava kma donle, saavun khau rekka ksai phokra, ungta rik rou dii ruk kjaan chra, ungu saavun khau ruk kmaang chra. Pdanu rik rou dii ren ava saavun khau ren khat thu mdo daal ra, ungu mikniing ngi kuhuira.

¹⁸Ungta Mma ngi mhin inni hanto mpau slii arlaanni, asuwn paam kpu khatti Mhin arva da, Mmaiṭhuwm mi pkhuppi tirdiil da, theda, “Tun tunni kchanua diyou chda, pdainu Nang ngi arvada mleen akhut ati khiin pik bi, mma kring ra.”

¹⁹Ungu Jisu ngi ripda msiikhu rek tu mdil vanṭoi lamda.

²⁰Ungta asuwn, kum sowm lei knii lik thu hii ngi jaan da suwkthuwk snu miilai khatti mdil pang tha arva da mbuw mor thowng chda.

²¹Mleija mma mdaksaa ngi hanto the chda, “Neiji mbuw mor rek rek kthown chaak bi, nea dam chnik di.”

²²Ungu Jisu ngi mdil kinle da mdee thungta,mhin theda, “Kchaanu aplung apnet cha; ado rin chaakki kdam im pti.” Ungta mpha ava kat thung ngi snu ava dam chda.

²³Ungu Jisu ngi paamkpupa inn thu marvan lu thungta, riseem kdum rek leh kurnung karbaang da kṭap deida,

²⁴Ungbi Mma ngi theda, “Esun in, mleija nalanao ava kdiyou pme, pdainu ki iip kcha ngaal.” Ungu mmaanni pnii chaak lamda.

²⁵Pdainu kurtuwl mii rekki duwn tha mthuw dok inle,Mma ngi vangluwt da mkhut tha kjowng da, ungbi nalanao ava kardelda.

²⁶Ungta hava pau ava paamkowl mkheng thu ṭoujei da.

²⁷Ungu Jisu ngi ava thungki mkurlo thungta, mik ktot miilai knii ngi mdil ṭoida, krowl kparyaa ngi owng lamda, “Devid Chapa, wonsat mhailo chaan.”

²⁸Ungta Mma ngi inn thu mvan lu thungta, mik ktot rekka Mhin arva lamda; Ungbi Jisu ngi mhin inni theda, “Neiji hava kdo tlot pchaan ra ava naanva arin chaak inna?” Ungta mmaanni Mhin the chlam da, “Oji, Mukpu.”

²⁹Ava dilli Mma ngi mmik rek in kmei pik lamda, theda, “Naan do rin chaakki kurthuwk so.”

³⁰Ungta mmik inna kparvang da, “Ungu asuwn, ku mii khat lee ngi dei mso.” dida Jisu ngi kparsa lang lang ngi parseel lamda.

³¹Pdainu mmaanni sun lamda marveel mkheng thu Mma mleiji ṭoujei lamda.

³²Ungta mmaanni ksunra mkurlo slii arlaan inni, asuwn, tarnam ramṭhi ngi ki ewng miilai khat arhai ṭhi lamda.

³³Ungu tarnam mrei pthi thungta, ki ewng miilai ava mpau thuwk da, ungbi kurtuwl mii rekka ngak chlam da, the lamda, “Isreel thung ngi hava lu khat lee tdee chaak inme.”

³⁴Pdainu Pharisi rekki the lamda, “Tarnam rek chapa rutanni tarnam rek mdo rei pthii.”

³⁵Ungta Jisu ngi khuwpii rek leh khuw rek mkheng thung ngi chet da, Synagog rek thu purchuk da, ungu Kruwngpaam kṭha paumin paryaam da ungta omlai khim khai leh kduwng ksaan khim khai pdamda.

³⁶Ungu Mma ngi kurtuwl rek mdee thungta, wonsat lo chlam da,mleija mmaan ava krung ra ktaak Jao heppi parvai lamda, pchaang chlam me.

³⁷Ava dilli Mma ngi msiikhu rek hin theda, “Tkhau rang nga knempokka, pdainu kakhau rang nga ktlowm suwn na.

³⁸Ava ngi mlei kurthuwk da, Mukpu ngi tkhau rang thu kakhau rang rek mdo sii nra aṭhil chaan.”