Read Lamkang MAK 10 Bible Online

MAK 10 - Lamkang bible

MAK 10

¹Ungta Jisu ngi mmun ava ma thida Jordon kheel da Judia paamkowl tha vang da, ungbi Mhin mii knempok mthuw kurtuwl nowl thungta, veikhat nowlli Mma nopa kpurchuk pṭhun da.

²Ungta Mma hinni kthleng Pharisi rekki mdo pirsin naanni paukhewl lamda, “Nowlam va innpu ngi mnumei bowr ktlo pthii mrot mo?”

³Jisu ngi arthawng da, “Mousi va talu pau atreen pik inda?”

⁴Mmaanni theda, “Mousi va mii ava ngi bowr mdo tlot na ki mlei kjit thii donle, mdo kinṭhen ṭhi kro ra dida.”

⁵Pdainu Jisu ngi mhin inni theda, “Mleija naan plung ril mapchai reen leiji mma ngi hava pauva reen da mdo kjit.

⁶Pdainu kapṭhang mupṭhun daat le, ‘Isowr va psel leh snu seem da.’

⁷Hava ngi mlei kurthuwk da pselli mpah leh mnuh ma thi donle mnumei tu ma am vee ra,

⁸ungu knii ava khdaat kurthuwk ra, ‘Mleija mmaan ve ava knii ngi am bong lamme, daksaa khdaatti ka am.’

⁹Ava ngi mlei kurthuwk da, Isowr do punlom dok mii ava ku mii khat lee ngi kṭhen ro nime.”

¹⁰Ungta inn thung tha siikhu rekki hava mlei thung ngi Mhin pau khewl lamda.

¹¹Ungbi Mma ngi mhin inni theda, “Ku mii khatti mnumei bowr tlo pthii thisora snu khat mlo bi, mma ngi mnumei leen losang mṭhia.

¹²Anto hep daatti numeiji mi innpu bowr tlo pthii thisora psel khathin inn mnee bi mma rukku mi innpu leen losang mṭhia.”

¹³Ungta Jisu ngi mdo kmei pik nlamra mii rekki kmo rek ava Mhin ṭhi paphaak lamda, ungbi siikhu rekki rai lamda.

¹⁴Pdainu Jisu ngi ava mdee thungta plung kpur ri, mhin inni theda, “Kmo rek va mhai phaa chdaat lamso, khaan maan, mleija Isowr Kruwngpaam ava hanto lu hep daat thung ngi ka am.

¹⁵Kinditti Neiji ahin thaanni kthea, ku mii khatti Isowr Kruwngpaam ava hava nao khat heppi marlaan chaak ma bi, lut chip pchaang nime.”

¹⁶Ungta Mma ngi kmo rekka mbaanni kdom da, mleen thaanni mkhut khiing da, phowl kṭha parlaan chlam da.

¹⁷Ungta Jisu ngi ksun ra mkurlo slii arlaanni, pselpa miilai khatti va chen da, mdu sukki pkhuppi tirdiil da Mhin theda, “Kṭha Chukpu, neiji talu tlo da kṭuw knai kma ki rinkhu ava pha chnik di?”

¹⁸Ungbi Jisu ngi mhin theda, “Talu leiji kṭha diti ado tu own da? Isowr kma donle kṭha ku khat lee amme.

¹⁹Nang ngi paureen rekka ado dee; ‘Mii eayou ma, losang ṭhi ma, pru ma, kindit kma sakhi ri pik ma, huwng chma, anuh leh apah akjat cha.’”

²⁰Ungbi mma ngi Mhin theda, “Chukpu, keksee daat ki hava mkheng nga kdo pṭoi chaak.”

²¹Ungta Jisu ngi wonksa lang lang ngi suw rim thida theda, “Do khat ado tlot ra kvaat daatta; vang, ado thloi ajur thira sra rek hin apii cha, ava ngi parwaan ki asumbuwr kurthuwk ra; ungu arva,Kdil aṭoi cha.”

²²Ava mdo the leiji kurnung da, alrou knempok mdo thloi leiji plung kja lang lang ngi vang sun da.

²³Ungta Jisu ngi mdil kinle da siikhu rek suw thida mhin inni theda, “Suwang rekki Isowr Kruwngpaam mthlun nraanna tija thung ngi kparsa chdaatta.”

²⁴Ungbi mpauna rekki siikhu rekka ngak chlam da. Pdainu Jisu ngi mhin inni the nowl da, “Kmo rek, Isowr Kruwngpaam tuthlun nrang nga tija thung ngi kparsa chdaatta!

²⁵Suwang khatti Isowr Kruwngpaam mthlun rang hin va, ut khatti prou khur thu mlu ngi ko ol sii ra.”

²⁶Ungta siikhu rekka kdung reenni ngak chlam da, Mhin the lam da, “Ava mkurthuttu mdo ktlan na ku rang da?”

²⁷Jisu ngi suw rim lamthida theda, “Ava lua dulti mii hinva kurthuwk nime, pdainu Isowr hin pme, do mkheng nga Isowr hinva kurthuwk lu.”

²⁸Pitor ri Mhin kthe pṭhunda, “Asuw neenni do mkheng ma pthiin thinu, Nah dil kdo ṭoi chaak in.”

²⁹Jisu ngi theda, “Kinditti, Neiji ahin thaanni kthea, ku mii khat lee ngi Nei ktum,ungu kṭha pauna tummi, mi innlou, mcher mṭah, mnuh mpah, mnaole, mdit mata mpaam kma pthii mapchaanma bi,

³⁰karvang ra kum thu mma ngi suwkthuw mphaak thu mi inn rek, mcher mṭah, ungu mnuh mpah, ungta mnaole, mpaam tu kilṭhi ngi arjaa khat ktopommi suwkthuw kphaak ṭhi lamra; ungu karvang ra kum thung ngi kṭuw knai kma ki rinkhu karlaang ra.

³¹Pdainu ru kri ki mii knempok ava dil knau ra,ungu dil knau ava ngi ru kri ra.”

³²Ungta Jerusalem hun kpha ra, lam tha mche slii arlaan inni, Jisua mdu bet inni ru rida hang da, ungbi siikhu rekka ngak chlam da, ungta mdil in kṭoi rekka ṭi chlam da. Jisu ngi sowm lei knii rek ṭhi nowl da, Mma leenni kthuwk ra mlei thung ngi mhin inni kthe pṭhun da.

³³Mma ngi theda, “Asuw in, nenna Jerusalem tha kahang slii in min, ungta Mii Chapa ava thiimpu kinreel rek leh Nowlam chukpu rek hin kparlaan pthii ra; mmaanni mdiyo nra mraal kpii lamra, ungu ktlok chati rek hin kparlaan pthii lamra.

³⁴Ungta mmaanni pnii chaak donle ke eayou ra, pdainu nii kdum diltha kring kardel ra.”

³⁵Ungta Jebidi chapa rek Jeems leh Johon ni Mma pha lamda, Mhin the lamda, “Chukpu, ahin kdo ṭhil chaak in khim khai mtlot pik naan di kdingi kngei inna.”

³⁶Ungbi Mma ngi mhin inni theda, “Neiji ado ktlot pik raan talu angei inna?”

³⁷Ungta mmaanni Mhin the lamda, “Nah alaarnee ngi khatti achang tha ungu khatti alee tha, kuk ong mhai rot pik chaan.”

³⁸Pdainu Jisu ngi mhin inni theda, “Naanni talu kṭhil inna tdit dei pindi chmaan ti. Neiji kdo neek na tong ava nee pchaang da, mdit mata Neiji baptis kdo tlot na thu baptis tlo pchaang naan mo?”

³⁹Ungta mmaanni Mhin the lamda, “Neenva pchaang ni kaan di.” Ungbi Jisu ngi mhin inni theda, “Nei kdo neek na tong thu nee pchaang naan di,Neiji baptis kdo tlot na thu tlo pchaang naan di.

⁴⁰Pdainu kchang leh klee tha ku kong rang nga Nei kdo rot ra ava pme, pdainu mma mma tummi mdo purchuwl pik ava kurthuwk ra.”

⁴¹Ungta miilai sowm rekki ava maryaak in thungta, Jeems leh Johon leen kdung ngi plung pthit lamda.

⁴²Ungu Jisu ngi Mhin own lam thida theda, “Ktlok chati rekka naanni ado dee in, ungu kpaal na kver rekki mmaan leen rutan mkheng mdo thloi in, ungu nong klin kpuw rekki rutan mdo pinret.

⁴³Pdainu naan arlak va anto lua kurthuwk me; naan arlakki klin ra kngei mii ava mkheng ki sra owr kurthuwk ra.

⁴⁴Ungta naan arlakki ru kri nuwm mii ava mkheng ki suwk kurthuwk ra.

⁴⁵Mleija Mii Chapa rukka mii sok lo psuk ra kurjung pme, pdainu sok klou ra, ungu Mma rinkhu ngi mii knempok mdo ktlan nra kpii chra kurjung.”

⁴⁶Ungta mmaanni Jerikho arvang lamda; Mma ngi msiikhu rek leh kurtuwl mii mluwngpa tu kilṭhi ngi Jerikho thungki mkunsun in thungta, Timaju chapa Bartholomio tdit mmik ktot ava then kṭhil chra lam siirri ku ongda.

⁴⁷Nasareth ki Jisu tdit mma ngi maryaak thungta, “Devid, Chapa Jisu, Aplungnee mhai tdet cha!” dida ṭap da kthe pṭhun da.

⁴⁸Ungbi mii maknem mi rim kdi jiam dida rai chda; pdainu kheel set setti owng da ṭap da, “Devid Chapa, Aplungnee mhai tdet cha!”

⁴⁹Ungbi Jisu ngi rip da theda, “Va own in,ungu mmaanni mik ktot ava own lamda; plung apnet ra; erip, Jisu ngi ato ownna,” kdingi the pik lamda.

⁵⁰Ungta mma ngi mbuw hiil var pthii thida Jisu hin arva chen da.

⁵¹Ungta Jisu ngi mhin khewl da, “Nah atummi tak ado ktlot pik ra angeija?” Ungbi mik ktot ava ngi theda, “Chukpu, khuw tdeera kngei chaakka.”

⁵²Ungbi Jisu ngi mhin theda, “Alam tha vang; ado rin chaakki kdam im pti.” ungta tun kat daatti mma ngi khuw deida, lam thung ngi Jisu dil ṭoi chda.