Read Lamkang MAK 11 Bible Online

MAK 11 - Lamkang bible

MAK 11

¹Ungta mmaanni Jerusalem mthlun tiing tiing inle, Bethphas leh Bethania ki kruwn tdit ava lown tha, Mma ngi siikhu rek knii haisii lamda,

²ungu mhin inni theda, “Adusuk inki khuw ava thung ngi va lut in, naanni ahai thlun daat inle, ku mii khat lee ko on nma skowlraam suwn khat kpursuk daat dei naan di, aparthlet in ra arvan ṭhiin.

³Ungta ku mii khat ti talu leiji aparthle inna dida mthe ta, ‘Mukpu ngi kriing da kbei sekki arhai pthla pinle ni kaan di’ kdingi athe pik in.”

⁴Ungu mmaanni mhai lu in thungta, skowlraam suwn ava inn thurngot kpursuk daat da; mmaanni mparthle in thungta,

⁵mbe tha krip daat rekki mhin inni theda, “Tak ktlo in pti, talu leiji skowlraam suwnna aparthle inna?”

⁶Ungta mmaanni Jisu dothe heppi the lamda; ungbi rot pik lamda.

⁷Ungu mmaanni skowlraam suwn ava Jisu paphaak lamda, mleen buw phat lam thida mleen Jisu ko ong da.

⁸Ungta mii knempok ki lam thu buw phat lamda, angṭhe rek va bil thungki arnaa du lamda phat chlam da.

⁹Ungta mdu leh mdil li kchet mii mkheng ngi owng lamda, “Hosana! Mukpu miing ngi kthleng Mma ava msuw kṭha!

¹⁰O kparthaang sii ki Hosana! Nen ki npah in Devid Kruwngpaam kthleng slii meek Mma ava msuw kṭha,” kdi ngi the lamda.

¹¹Ungta Mma ngi Jerusalem thlung da, luwbuk Inn thu lut da,Mma ngi do mkheng loi da msut dok diltha, mukto dok leiji, sowm lei knii ṭhi da, Bethania tha va lamda.

¹²Ungu mupduk nii ngi Bethania thungki mdil mkinlet in thungta, Jisua mpoi tham da.

¹³Ungta raalpha khatti kduwt ding arnaa mhai dee thungta, thei kchui daat luwng rang mo kdingi va mer da, mhai phaak thungta marnaa kma donle do khat lee amme, mleija kduwt thei mchui na ki mkaal kurthuwk me.

¹⁴Ungbi Mma ngi theda, “Ku mii khat lee ngi aleen ki thei chaa purnowl mso.” Ungta Mma dothe ava siikhu rekki aryaa da.

¹⁵Ungta mmaanni Jerusalem thlung lamda, Ungu Jisua luwbuk Inn thu lut da, luwbuk Inn thungki kren rek leh kjur rek ava rei pthii da, sum parthlen na tebol rek leh uṭhuw kjur rek ko onna longkhom mkheng kpurlup kparthel pṭhun da.

¹⁶Ungu ku mii khat lee ngi luwbuk Inn thung ngi klut mdit mata kthuw ṭhi ro me.

¹⁷Ungta Mma ngi mhin inni purchuk da theda, “Nei ki Inn na chati mkheng ki doṭhil chaak na Inn di nik di, dida mdo kjit dok pme mo? Pdainu naan va kuppru rek khur apurthuw pthiinna!”

¹⁸Ungta thiimpu kinreel rek leh Nowlam chukpu rekki ava aryaa da; Jisu mdo ea kre nraan ki mlam thlaam lamda; mleija kurtuwl mii mkheng va Mma do purchu thung ngi ngak chlam da, ava leiji Mma ava ṭi lamda.

¹⁹Ungu khuw mjiin rui rui thungta,mmaanni khuwpii ava thungki duwn thuwk lamda.

²⁰Mmaanni mupduk nii jiingsunni ava lam mṭoi in thungta, kduwt ding ava murjung kpha dekki kpurvui kcha dei lamda.

²¹Ungbi Pitor ri Jisu do the bin paphaak da Mhin ni theda, “Chukpu, Asuw! Nah pauhur buk kduwt ding ava kpurvui kcha a!”

²²Ungbi Jisu ngi mhin ni arthawng da, “Isowr hin arin cha.

²³Kinditti Neiji ahin thaanni kthea, ku mii khatti hava lown nang nga kurlou buk ra truwn thu kpurlup cha, dida plung kinṭheek liit kma thesora, mma dothe ava kurthuwk ra kdingi mrin chaak bi, ava kurthuw pik ra.

²⁴Ava ngi mlei kurthuwk da Neiji ahin thaanni kthea, ktham chda ado ṭhil chaak in khim khaija, kphaak chaakka kdingi arin chaan,ungu naan do ra.

²⁵Ungta naanni kṭhil chra ari in mpha thu ado hal chaak in ku mii khat ma amta, ava aptlot pik in, ava mkurthutbi parwaan tha ka am apah in ruk va ado parma naan mkheng akuptlot pik chraan.”

²⁶Pdainu naanni aptlot pik maanbi, parwaan ki apah in ruk va apnu ton inna aptlot pik in nime.

²⁷Ungta mmaanni Jerusalem hanpha nowl lamda, Jisu ngi luwbuk Inn thung ngi mkurlon slii arlaanni thiimpu kinreel rek, Nowlam chukpu rek, ungu kver rek Mhin thleng lamda.

²⁸Ungu mmaanni Mhin theda, “Hava mkheng nga talu rutan mdit mata ku ngi rutan apii da Nang va ado tlot?”

²⁹Jisu ngi mhin inni theda, “Neiji pau khat aju khewl inni ava atarthaan inbi Nei ruk va talu rutan thloi nu hava lea kdo tlot tdit athe pik ni kaan di.

³⁰“Baptis kuptlot Johon na parwaan ki mo mdit mata dulti mii rek thungki kthleng? Mhai arthawng in.”

³¹Ungbi mmaanni msingreel inni karseel lamda, “Parwaan ki pi dida nthe inbi, talu leiji mma ava rin chmaan ti di donle kthe ra.

³²Pdainu nenni dulti mii rek thungki pi dida tithe raan mo?” mmaanni mii rek ṭi nowl lamda, mleija Johon na khulpu kindit kat pi dida mii rek va bin chda.

³³Ava leiji mmaanni Jisu hin, “Dei maan ring,” kdingi arthawng lamda. Ungbi Jisu ngi mhin inni theda, “Ava mkurthut bi Nei ruk va talu rutanni hava lea kdo tlot tdit athe pik ni maan ring.”