Read Lamkang MAK 12 Bible Online

MAK 12 - Lamkang bible

MAK 12

¹Ungta Jisu ngi mhin inni paupurtol rekki kthe pṭhun da. “Miilai khatti rik rou phunda, mukloi rowng tlot psuk da, mdii mdo sun nra khur kvel da, mbuk sa dok thida knum rek hin parlaan da, ava dilli paam khat tha pjiin chda.

²Mpha mvee thungta, mmaan hinki rik rou thei mruk klou ra, knum rek hin sra owr khat hai sii da.

³Ungbi mmaanni kjowng da bun lamthida, mjesang ngi sii pthii lamda.

⁴Veikhat nowlli mma ngi msra owr khat va sii da, ungbi mma ruk mluw heem krep lamda mning kakjak rakki bun lam thida sii pthii lamda.

⁵Khat mhai sii nowl thungta, eayou lamda, anto hep daatti mii murson knempok rukka, angṭhe bun lamda, angṭhe eayou lamda.

⁶Mṭut na rel va, wonsat mdo lo chaak mchapa; ‘Hava lamchi mmaanni kakjat cha kro lam,’ kdingi hai sii da.

⁷Pdainu knum rek va khat leh khatti the lamda, ‘Hava lamchi pipa; leen, mma ava aeyou in che, alrou mkheng nga nen ndo ra!’

⁸Ungta mmaanni ṭhi lamda, aeyou lam thida, rik rou bil nowm be ngi var pthii lamda.

⁹Rik rou bil kpupa va talu ktlo rang? Mma ngi thleng donle knum rek mkheng nga ki ae krep ra, ungu mbil ava ktlok mii hin kpii ra.

¹⁰Hava Laaika ava naan ni pa maan ti: ‘Inn ksapa ngi mdo pthlei lung ava katti markil ki kcho bul kurthuwk;

¹¹hava Mukpu nong tlot; nenni tsut naan thu kdung tnga chaak in pme mo’?”

¹²Ungta mmaanni mdo kjown nra tlo lamda, pdainu kurtuwl mii rek ṭi lamda, mleija paupurtol mdo saam ava mmaan mdo rot nma tdit dei lamda; ava leiji mmaanni ma pthii da sun chlam da.

¹³Ungta Pharisi mii rek angṭhe leh Herod mii rekki Mma pauna thu mdo pmen nraan arva lamda.

¹⁴Ungu mmaanni Mhin thleng da the lamda, “Chukpu, Nah kindit tdit neenni kdee in, ku mii khat lee pre nang ngi tuk su mti; mleija mii nong puwk nang ngi kjat mti, pdainu Isowr lam mkindit purchuk tinu, Keisar hin khasna tpiik ava Nowlam do rot mo mdit mata do rot pme?

¹⁵Neenni pii ni kaan mo pii ni maan ring?” Pdainu mmaanni kṭha do tlot mdo tlot in Jisu ngi dei da mhin inni theda, “Talu leiji atparsin naanna? Thiir sum khat mhai piin, suw lap ni.”

¹⁶Ungu mmaanni khat arvan sin lamda. Ungbi Jisu ngi theda, “Hava ku do kjit ungu ku arlim da?” “Keisar,” kdingi mmaanni the lamda.

¹⁷Ungbi Jisu ngi mhin inni theda, “Keisar do rek ava Keisar hin apiin, Isowr do rek ava Isowr hin apiin.” Ungbi mmaanna kdung ngi ngak chlam da.

¹⁸Ungta kdiyou thungki kring kardel ame dida kthe Sadusi rekki Mhin thleng lamthida hanto pau khewl lamda,

¹⁹“Chukpu, Mousi va hanto mikjit pik inda, mleija ku mii khat upa khatti snu lou da, nao kuplu cha kma laiji mnumei ma da mdiyo bi mnaopa ngi mnuwn ava lou donle mu u pa tummi naole kupluk pik ra di da.

²⁰Mpha khat thung ngi unao tikheu amda; u pa reeppi snu khat lou da nao khat lee kthloi cha mlaiji diyou chda.

²¹Ungbi miknit na mnaopa ngi snu ava lou da, nao kthloi cha mlaiji diyou chnowl da, anto hep daatti mnaopa mukdum na ruk kurthuwk da;

²²ungu unao tikheu va nao khat lee thloi lamme, mṭut na rel thang va snu ava ruk diyou chda.

²³Ungta kring karheel nit thungva snu ava ku numei kurthuwk rang? Mleija mtikheu kheu inni mnumei in purthuw sap lamda.”

²⁴Jisu ngi mhin inni theda, “Naanni ado parma naanna hava lei pme mo? Naanni Laaika rek daat don Isowr rutan daat don dei maan timo?

²⁵Mleija mmaanni kdiyou thungki mrin kardel in mpha thungva innknei snu klou daat don kphal don parwaan thang va ame, pdainu waan tamsii rek hep daat sap ra.

²⁶Kdiyou vi mrin kardellu, naanva Mousi Laaika ava pa maan timo,? Chanchiim mei kṭuwng mlei thung ngi mphel rek thu Isowr va tak heppi mthe,? ‘Nea Abraham ki Isowr, Isek ki Isowr, Jakob ki Isowr ava ping!’

²⁷Mma ava kdiyou ki Isowr pme pdainu kring ki Isowr; naanva aparma reen inna.”

²⁸Ungta Nowlam chukpu rek thungki kthleng khatti mmaan karteen ava aryaa da, Jisu ngi kṭha deekki mdo arthaan ava mdo dee leiji, mma ngi Mhin pau khat khewl da, “Paureen mkheng thungki ru kri ver ra talu da?”

²⁹Jisu ngi arthawng da, “Ru kri ver ava, ‘Aryaa, O Isreel: Nenki Isowr Mukpu ava, Mukpu khdaat.

³⁰Naanki Mukpu Isowr ava, aplung ril in mkheng, araothla in mkheng, ado bin in mkheng, ungu arutan in mkheng tu wonsat adolo raan.’

³¹Miknit na ava hava, ‘Adaksaa lulu ngi aveen wonsat alo.’ Hava le kheelli klin paureen ame.”

³²Ungta Nowlam chukpu ngi Mhin theda, “Kindit deek im ti, Chukpu; Mma ava khdaat, Mma kma donle murson khat lee ame, diti kindit deekki athea.

³³Ungu Mma ava plung ril mkheng tu kurthlop tdee mkheng tu, rutan mkheng tu kurthloppi wonsat tulo ra, ungu ndaksaa heppi nveen wonsat tulo ra, ava pii da tlaai tdown mkheng kheel dek kurthuwk.”

³⁴Ungta mma ngi ksing ngi mdo arthaan Jisu ngi deida, mhin theda, “Nah Isowr Kruwngpaam thungki lam karlat mti.” Ava diltha ku mii khat lee ngi Mhin paukhewl nuwm me.

³⁵Ungta Jisu ngi luwbuk Inn thu kpurchukki theda, “Tak heppi Nowlam chukpu rek va Khrista ava Devid chapa pi mdo dit in da?

³⁶Devid mdak kat ruk va pthla kchiir tdaalli hanto tpandang da, ‘Mukpu ngi neiki Mukpu hin theda: Nang arawlmii rek Neiji akhu ti ngi kthiik du khim khai, Nei ku khut chang ktong tha ko ong cha.’

³⁷Devid mdak katti Mukpu dida mdo own; ava leiji tak heppi mma chapa kurthuwk rang da?” Ungu kurtuwl mii knempok ki kanpa kanpa ngi aryaa chlam da.

³⁸Ungta mdo purchu thu Mma ngi theda, “Phrik kturrown tu kchet nuwm, mii kurku na bajaar ktai thung ngi salaam kngei,

³⁹ungu synagog rek thung ngi longkhom kṭha kngeen, ungu kmaal thung ngi takjat mun kngeen, Nowlam chukpu rek ava cheek asin chaan.

⁴⁰Meikhu sra owr da,mi inn thuwnki lowngda ksaangpa ngi kṭhil cha do tlot ktlo mmaanni kheel sii ki mraal kpha chlam ra.”

⁴¹Ungta Jisu ngi sumbuwr be ngi ku ong da, kurtuwl mii knempokki sumbuwr thung ngi sum mdo daal in ava suw rim da, suwang mii knempok va sum knem knemmi daal da.

⁴²Ungu sra meikhunuh khat kthleng va, ana khat pang lulu, thiir sum knii pang daal chda.

⁴³Ungbi Mma ngi msiikhu rek own da mhin inni theda, “Kinditti, Neiji ahin thaanni kthea, hava sra meikhunu ngi mkheng arlak va kheel sii ngi sum buwr thungva mdaal chaakka.

⁴⁴Mleija mii mkheng va mdo thloi knempok thungki mdo daal; pdainu mma va mdo thloi chaak suwn lou dek da mdaal chaakka.”