Read Lamkang MAK 14 Bible Online

MAK 14 - Lamkang bible

MAK 14

¹Tunva nii knii kursonni taplaanna ungu thowl taṭhaak ma thenpen kmaal amda. Ungbi thiimpu kinreel rek leh Nowlam chukpu rekki Jisu kjowng da mdo aeyo nraan tuprutti mlam thlaam lamda.

²Mleija mmaanni theda, “Kmaal mpha thung rang pme, mleija mii rekki ro mdonle mikrai chraan.”

³Ungta Mma ngi Bethania thu raaichii kthung Simon inn thung ngi tebol be ngi mukon daat arlaanni, snu khat kthleng ngi nard tdit reidii kchiir deek mmen klu lang lang mu uwm thu hurda, mu uwm ava pkui thida Jisu luw tun ptlong da.

⁴Pdainu ava thu ka am mii angṭhe ngi plung kpur ri bin da msingreel inni theda, “Talu leiji reidiia mdo partlai kre da?

⁵Mleija hava reidii ava dinari arjaa kdum kheelli jurda sra rek hin mdo piik chaak kro!” kdingi mmaanni snu ava psul chlam da.

⁶Pdainu Jisu ngi theda, “Mma ava mthi na ngi ama dok in; talu leiji mning apmul inna? Nei kihin kṭha deek nong mma va tlo imda.

⁷Mleija sra rekka mpha ktai thu naanni ado am ṭhiin, ungu naanni abin khim khai thuwn kṭha tlot pik naan di; pdainu naanva Neia mpha ktai thu mthlop ni maan ti.

⁸Mma ngi mdo pchaan ava mdo tlot; mma ngi Nei kdaksaa mdo pbul ava kukulruwl nra mdu ngi ktlo kurthuwk.

⁹Ungta kinditti, Neiji ahin thaanni kthea, dultipaam mkheng thung ngi kṭha paumin mkaryaam na thu, hava mma nong tlotta kbin paphaakki kthera.”

¹⁰Sowm lei knii arlakki khat, Iskariot Juda ngi, Jisu mdo rotma ngi thiimpu kinreel rek hin va da.

¹¹Ungu mmaanni ava maryaak in thungta, kanpa lamda, ungu mhin sum mdo piik nraan paureel dok lamda. Ungu mmaan hin mma ngi kro kma ngi mdo parlaan nra mpha kcha ava thlaam da.

¹²Ungta thowl ktaak thenpen kmaal mnii khat na thok, jao taplaan na ki tlaai kdown mpha thu, msiikhu rekki Mhin theda, “Tva tha msiin tidonle neenni chet da taplaanna amaal nrang nga purchuwl ni kaan da?”

¹³Ungu Jisu ngi siikhu rek knii haisi da,ungta mhin inni theda, “Khuwpii thu va lut in, uwm thu dii kukdom miilai khatti aju kurdut ṭhi raan, mma dil aṭoi in,

¹⁴ungu mma lu na inn kpupa hin atheen, ‘Chukpu, ngi theda, malli kthlunna innka ava tu ungda, ksiikhu rek tu taplaanna kmaal nrang nga tva thung rang da?’

¹⁵Ungta mma ngi mdo purchuwl dok tun knung reep innka khat aktidet raan; ava thung ngi nen ntum raan apurchuwl in.”

¹⁶Ungta siikhu rekki kurlou lamda khuwpii ava tha va lamda, ungbi Mma dothe pik heppi pha lamda; ungu ava thu taplaanna purchuwl chlam da.

¹⁷Ungu khuw mjiin rui rui thungta, Mma ngi sowm lei knii rek tu ar vang lamda.

¹⁸Ungta mmaanni tebol leen mmaal slii arlaan inni Jisu ngi mhin thaanni theda, “Kinditti Neiji ahin thaanni kthea, Neiji kdo maal ṭhi slii rek arlakki khatti mro nime.”

¹⁹Ungbi siikhu rekka plung kja lang lang ngi, khat khatti Mhin the chlamda, “Nei ngaal mo?”

²⁰Mma ngi mhin inni theda, “Mma ava sowm lei knii thung ki khat, Neiji arkuw thung ngi thenpen kdo puhuwm ṭhi slii ava ra.

²¹Mleija Mii Chapa ava Mma mlei thung ngi mdo kjit dok heppi kchet ra, pdainu Mii Chapa kro kma mii ava tija thu msuw kthii chdaatta! Mleija mii ava tumva tu ṭou ṭouvi mṭou chaak mabi kṭha ra.”

²²Ungta mmaanni mmaal slii arlaanni, Mma ngi thenpen louda, ungu phowl kṭha parlaan da, ungta pkui thida them pik lamda, ungu theda, “Alou in; hava Nei kdaksaa.”

²³Ungta Mma ngi tong khat louda, mpanpaak dok dil tha mhin inni pii nowl da, mkheng inni nee sap lamda.

²⁴Ungu Mma ngi mhin inni theda, “Hava mii knempok tumra kdo pbuwk, paurina Nei ki kihii.

²⁵Kinditti Neiji ahin thaanni kthea, Isowr Kruwngpaam ki ren ava kneek du khim khai, Neiji rik rou dii veikhat nee nowl ni maang.”

²⁶Ava diltha mmaanni laa thee lamda, kruwn lown tha hang lamda.

²⁷Ungta Jisu ngi mhin inni theda, “Naanna akheng inni tluw chtir naan di; mleija hanto kjit dok da, ‘Neiji jao krung prei nik di, ungu mjao rek ava kinvei tir chra.’

²⁸Pdainu Neiji krin kardel diltha, naan aduwnni Galil tha vang nik di.”

²⁹Pdainu Pitor ri Mhin theda, “Mmaan mkheng ktluw kurthuwk daat joso nea tluw ni maang.”

³⁰Ungbi Jisu ngi mhin theda, “Kinditti, Neiji ahin kthea, snii jaan kat ti harkhuwng ngi vei knii mkhuwn du ngi, nangva vei kdum mmat na di.”

³¹Pdainu mma ngi kheel setti theda, “Nah adiyo ṭhi kma donle, amat ni maang.” Ungta mkheng inni anto the sap lamda.

³²Ungta mmaanni Getsamani tdit mun thung va lamda; ungu msiikhu rek hin Mma ngi theda, “Neiji kṭhil chaak slii arlaanni, hava thu eku ong daat in.”

³³Ungta Mma ngi Pitor, Jeems, ungu Johon ṭhi da, mun ava thung ngi kheel sii ki kja kakham pṭhun da.

³⁴Ungta Mma ngi mhin inni theda, “Kdiyou daat rang ngi kraothla ava kja kcha a; hava thu am inra, mik khut ahar chaan.”

³⁵Ungu Mma ngi kla betti va kursown thida, dul leen tpee da ṭhil chda, “Mkurthut de rang ta, hava ṭhang nga mhai sown pik cha.”

³⁶Ungta Mma ngi theda, “Abba, Apah, Nah ahinva mkheng nga kurthuwk lu; hava kihin ki tong ava mhailo pik cha; anto daat joso Nei kuplung bin rang pme, pdainu Nah aplung bin daat ra.”

³⁷Ungu Mma ngi marvan thungta, siikhu rekka ki iip daatti pha lamda, ungbi Mma ngi Pitor hin theda, “Simon ki iip slii daat im ti mo? ṭhang khat pang thung ngi mik khut har pchaang mti mo?

³⁸Kepthleem thu atlaak ma nraan, mik khut ahar inra aṭhil chaan; pthla va mngeenna pdainu daksaa va ksowlla.”

³⁹Ungta Mma ngi va nowl da mdo ṭhil ksa pauna ava hep daatti ṭhil chnowl da.

⁴⁰Ungu Mma ngi marvan thungta, ki iip daatti pha nowl lamda, mleija mmik inna kdung ngi rik da; mdo arthaan nraan dei chlam me.

⁴¹Ungta mvei kdum na marvan thu, mhin inni theda, “Ki iip tlit daatti karnga in pti mo? Ko khoppa; ṭhang kvei dokka; Mii Chapa ava krokma mii ava ngi pnu ktong rek khut thu mparlaan dokka.

⁴²Ekardel in, vang in che; asuw in, mukrokma ava knaija!”

⁴³Ungta tun kat daatti,Mma ngi mpau slii daat arlaanni, sowm lei knii arlakki khat, Juda ava ngi thiimpu kinreel rek leh Nowlam chukpu rek ungu kver rek hinki mii knempok ṭhi da, kaang ksaang leh kchung rek sin lamda thleng da.

⁴⁴Tunva krokma mii ava ngi titinna khat pii lamda theda, “Neiji miilai khat kdo put ra, Mma ava akjowng inra aseel psuk chaan.”

⁴⁵Ungu mma ngi arva da, “Chukpu!” kdingi theda, put da.

⁴⁶Ungta mmaanni khut kjownni kjowng lamda.

⁴⁷Pdainu krip daat rek arlakki khatti, mkaang ksaang maklee thungta, thiimpu kinreel suwk khat knaa sel buk da

⁴⁸Ungbi Jisu ngi mhin thaanni theda, “Naanni kuppru hal chda kthleng lulu ngi, kaang ksaang rek leh kchung rek sin in ti mukukjowng ra kthleng in pti mo?

⁴⁹Nit kurnowlli luwbuk Inn thu kpurchuk ra aju am ṭhiinnu, ungu naan ruk va mukjowng maan ti. Pdainu Laaika mkurkhum na kurthuwk so.”

⁵⁰Ungta mkheng inni ma pthii lamda chen chtir lamda.

⁵¹Ungta kseenao khatti mdona ktaakki buw laak khatti mdak kparyeel da, Jisu dil ṭoi da, ungbi mma ruk kjown kthen lamda.

⁵²Pdainu mbuw laak var pthii thida mchai daatti chen chda.

⁵³Ungta mmaanni Jisua thiimpu kparthaang hin ṭhi lamda; thiimpu kinreel rek, kver rek, Nowlam chukpu rek mkheng thuwk kurbuk lamda.

⁵⁴Ungu Pitor va lam karlatti, thiimpu kparthaang dulbuk kpha dekki mdil ṭoi da; ungta kseel mii rek tu mdak kpurlum ra mei tur oida ku ong lamda.

⁵⁵Tunva thiimpu kinreel rek leh karseel lop mkheng ngi Jisu rinpaumin kro kma ngi, mdo eayo nraan ki mlam thlaam lamda; pdainu mmaanni khdaat pre pha lamme.

⁵⁶Mleija Mma krokma ngi mii knempokki kindit kma sakhi pii lamda, pdainu mdo theenna kinṭim sii me.

⁵⁷Ungta Mma krokma mii angṭhe ngi rip da kindit kma sakhi hanto pii lamda,

⁵⁸“Neenni Mma do the karyaak in, ‘Khut do sak hava luwbuk Inn ava Neiji ea krep thi nik donle, khut do sak ma khat nowl nii kdum thung ngi Neiji sa nik di’ dida theda.”

⁵⁹Ava daat ruk va mrinpaumin mdo theenna kinṭim siime.

⁶⁰Ungta mṭim merri thiimpu kparthaang ngi rip da, Jisu hin paukhewl da, “Nang va arthawng nim ti mo? Hava mii rekki arin paumin mdo rot maanna talu lei da?”

⁶¹Pdainu Mma ngi karthawng kma rim kdi am chda. Veikhat nowlli thiimpu kparthaang ngi Mhin paukhewl da, “Nah suw kṭha Chapa Khrista pti mo?”

⁶²Ungbi Jisu ngi theda, “Nei ping; Mii Chapa ngi ru ktang chang ktong tha ku ong donle, parwaan ki armei thu kurjung nang ngi dei na di.”

⁶³Ungta thiimpu kparthaang ngi mdona jen thida theda, “Talu lei nenni sakhi murson ta thlaam raan da?

⁶⁴Isowr kjowm cha ngi mpau pda naanni aryaak sap inna. Naanva tak heppi areel inna?” Mkheng inni mdo aeyo nuwm lei inni psul sap lamda.

⁶⁵Mii angṭhe va mleen ptil kbal kupthot pṭhun da, mmai kuhuwm lamda, prei lamda, “Apurphuwng,” kdingi the lamda. Ungu kseel rek va tuthuw chlam da.

⁶⁶Ungta Pitor ri dulbuk thu ma am daat arlaanni, thiimpu kparthaang sra owr snu miilai khatti;

⁶⁷Pitor ri mei mdo tur oi dei da, mhin suw rim thida theda, “Nang rukka Nasareth ki Jisu ava dil kṭoi pti.”

⁶⁸Pdainu mma ngi mat da, “Nah ado thea neiva tdee dee ngi dei maang kdei ruk kurthuwk maang,” dida theda. Ungta mma ngi paltong lam ktong tha vang thuwk da.

⁶⁹Ungta sra owr snu ava ngi dei da, ungbi mbe ngi krip daat rek hin theda, “Hava miilai rukka mmaan arlakki khat,” dida kthe pṭhun nowl da.

⁷⁰Pdainu mma ngi mat nowl da. Ungta ma am bongle mbe ngi krip daat rekki Pitor hin the nowl lamda, “Ksoi liit kma nang rukka mmaan arlakki khat munna; mleija nang rukka Galil mii pti.”

⁷¹Pdainu mma ngi mdaksaa kartham da kthe pṭhun da, “Naan do the hava Miilai ava neiji dei chliit maang.”

⁷²Ungta tun kat daatti harkhuwng ngi mvei knit na khuwng da. Ungbi Pitor ri Jisu pauthe ava bin phaak da, “Harkhuwng ngi vei knii mkhuwn du ngi nangva vei kdum mro nim ti.” Ungu mma ngi mning ksiinni ṭap da.