Read Lamkang MAK 15 Bible Online

MAK 15 - Lamkang bible

MAK 15

¹Ungta jiingsun mpha mvee daat le, thiimpu kinreel rekki, kver rek leh Nowlam chukpu rek, ungu karseel lop mkheng tu kurkuk lamda, karkhal nlamda; ungu Jisua bowl lamthida Pilat hin parlaan lamda.

²Ungta Pilat ti Mhin paukhewl da, “Nah Jihudia rek Kruwng pti mo?” Ungbi Mma ngi mhin arthawng da, “Nah dothe ava ping.”

³Ungu thiimpu kinreel rekki do knempokki mraal pii lamda.

⁴Ungta Pilat ti Mhin paukhewl nowl da, “Nangva arthawng nim ti mo? Asuw, mmaanva akro kma ngi tija thu araal atpiik lamma.”

⁵Pdainu Jisu va do khat lee arthawng purjom me, ava leiji Pilat ta ngak chda.

⁶Tunva kmaal lu kchok thungva rowng inn thungki mmaan do ngei miilai khat khat mdo pthuw kcholu.

⁷Ungta rowng inn thung ngi, paam kurlownni mii ke eayou, jai klah rek arlakki, Barabas tdit miilai khat amda.

⁸Ungu kurtuwl mii rekki Pilat hin hang lamda, chodu chodilli mdo pthuw kcho nopa ava mdo tlot pik nlam ra kaktham pṭhun lamda.

⁹Ungbi mma ngi mhin inni arthawngda, “Naan tummi jehudia rek kruwng kdo pthuw ra angei inna?”

¹⁰Mleija thiimpu kinreel rek kheithe ngi Mma ava mhin mdo parlaan in tdit deida.

¹¹Pdainu makchang ra Barabas mdo pthuw nra, thiimpu kinreel rekki kurtuwl mii rek ksop lamda.

¹²Ungta Pilat ti mhin inni the nowl da, “Ava mkurthut tu naanni Jihudia rek Kruwng ado dit in Mma ava neiva tak pardit nik di?”

¹³Ungbi mmaanni owng nowl lamda, “Mma ava khros leen apthoi.”

¹⁴Ungu Pilat ti mhin thaanni theda, “Talu lei, Mma va talu kṭha kma mtlot da?” Pdainu mmaanni kheel set setti owng lamda, “khros leen apthoi.”

¹⁵Ava leiji Pilat ti kurtuwl mii rek plung pngam nuwm da, mtum raan Barabas pthuwk thida; Jisua mmeel kthii lang lang ngi bun da khros leen mdo pthoi nraan mma ngi mhin inni parlaan da.

¹⁶Ungta rawlmii rekki Mma ava rawlmii ki lusang mun thu ṭhi lamda; ungu rawlmii kunpun lop mkheng own purkuk lamda.

¹⁷Ungu mmaanni kning ngi ksen phrik kturrown pnaak lamda, ungu tarliing teher luwkhum pkhum lamda.

¹⁸Ungta mmaanni luwbuk lamda, “Jihudia rek Kruwng roi ksotti ring cha,” kdingi kthe pṭhun lamda.

¹⁹Ungta mmaanni riijei khatti mluw tha prei lamda, mleen ptil kbal pthot lamda, ungu mning er inni pkhup pi tardiil lamda, luwbuk lamda.

²⁰Ungta mmaanni mipnii chaak dok dil thaan, kning ngi ksen phrik kturrown ava khowk pthii lam thida, mdaksaa dona pihiil lamda. Ungu khros leen mdo pthoi nraan ṭhi lamda.

²¹Ungu mmaanni Syrini ki Alekjander leh Ruphas pah Simon, paam khat ki kipjiin kthleng cha, mma ava Jisu khros kukdom ṭhi ra pnam psuk lamda.

²²Ungta mmaanni Jisua Golgotha ‘Luwruh kdimna mun’ ava thang ngi hanṭhi lamda.

²³Ungu mmaanni myrrh tdit doi ava tu tpurchuwm ju pii lamda, pdainu Mma va nee me

²⁴Ungta mmaanni khros leen pthoi lamda, mdo mna them lamda, ku ngi tak kphang chrang kdingi pchel piik sut nlam da.

²⁵Ungu mmaanni khros leen mupthoi in mpha thungva ṭhang kdum ktla.

²⁶Ungu Mma kusnuwm kma ngi, “Jihudia rekki Kruwng,” kdingi kjit lamda.

²⁷Ungta Mma tu kilṭhi ngi, kuppru rek miilai knii, khatti mchang ktong tha khatti mlee ktong tha pthoi kthen lamda.

²⁸Laaika mkurkhum na ngi theda, “Mma ava pnu ktong rek tu tai kthen da.”

²⁹Ungu mbe ngi kurlon rekki mluw in hai lamda ning er ri hanto the lamda, “Eh! luwbuk Inn ea krep thida nii kdum daat thung ngi ksa rang daat lo!

³⁰adaksaa kartlan ra khros leen ki arjung ṭum lo!”

³¹Anto lulu ngi thiimpu kinreel rek leh Nowlam chukpu rekki kipnii chaakki khat leh khatti the lamda, “Mma va mii ktlokka ktlen thida, mdaksaa ava kartlan pchaang me.

³²Isreel rek Kruwng Khrista ava ngi khros leenki tun tunni arjung ṭum so, mbi ava kdeiji neenni rin chnikaan di!” Ungta Mma tu khros leenni kukthoi vee rek ruk va ning er pau the psuk lamda.

³³Ungu ṭhang truk mphaak thungta, ṭhang tku kpha dekki, paam mkheng nga pum jiing ngi jiing chda.

³⁴Ungta ṭhang tku mphaak le Jisu ngi krowl kparyaa ngi owng da, “Eloi, Eloi, lama sabath thani?” Ava ki mleija “Nei ki Isowr, Nei ki Isowr, talu lei Neia atmaak pthia?”

³⁵Ungbi mbe tha krip daat mii angṭhe ngi aryaa thida the lamda, “Asuw in, Mma ngi Elija mo ownna.”

³⁶Ungu marlak inni krip daat miilai khatti chen teng da, buwphown ava ju kdor thung ngi puhuwm thida, kchung leen daar da mdo neek ra mhan piik chunni theda, “Ardaan, Elija ngi arjung ṭum don kupṭum sik rang mo suw lap in che.”

³⁷Ungta Jisu ngi krowl kparyaa ngi owng thida, mṭut na tdaal ṭen chda.

³⁸Ungu luwbuk Inn thungki buwkhaar ava karthak ki ngi kurdu kpha karjen bak chda.

³⁹Ungta Mma maiṭhuwm mi krip daat rawlmii rek arlakki klin khatti, Jisu ngi mṭut na tdaal ṭen da mdiyo ava mdee thungta, theda, “Kindit katti hava Miilai ava Isowr Chapa thide!”

⁴⁰Ungu lam kla ngi snu rek angṭhe ngi sut pṭoi da, marlak inki ava Magdaleni Mery, Jeems naopa Josi nuh Mery, Salomi,

⁴¹mmaanni Galil paam ki kupṭhunni mdil ṭoi lamda Mhin sok lo pik chlam da. Ungta Jerusalem kpha ngi Mma dil kṭoi snu rek ava mii knem pok.

⁴²Ungta khuw jiing rui rui da, sabath nit ava du ngi mdo purchuwl naan mkurthut leiji,

⁴³Isowr Kruwngpaam kurjung ra ksuw pṭoi cha, karseel lop thungki takjat kirvei miilai khat Arimathia ki Joseph pi, plung kta ngar ri, Pilat hin va da, Jisu kluwng ṭhil chda.

⁴⁴Ungu Pilat ti kdiyou dok maryaak thungta, ngak chda; rawlmii klin khat hin kdiyou dok mo, kdingi khewl da.

⁴⁵Ungta mma ngi rawlmii klin khat hinki kdiyou dok maryaak dilli, Jisu kluwng ava Joseph hinni mdo piik nra rot pik da.

⁴⁶Ungu mma ngi plabuw ktarnaal dang ren da, han pṭum da, plabuw ktarnaal dang ngi klum thida, lung kreu da mdo vu thlaan khat ava thung ngi pi iip da; ungta thlaan thurngot ava lung khatti arkam da.

⁴⁷Ungu Magdaleni Mery leh Josi nuh Mery va mdo pi ii naanna dei chlam da.