Read Lamkang MAK 16 Bible Online

MAK 16 - Lamkang bible

MAK 16

¹Ungu sabath nit mvee dok thungta, Magdaleni Mery leh Jeems nuh Mery ungu Salomi, mmaanni mdo pbul chaak raan reidii mikrim kdi lang lang ren lamda.

²Ungta mmaanni hapta ki mnii khat na thok, jiingsun kpanma ngi, kniw mthuw ser ser leh thlaan tha va lamda.

³Ungu mmaanni khat leh khatti hanto the lamda, “Thlaan thurngot lung nga ku ngi mi kpurlu pik chraan da?”

⁴Ungta mmaanni thlaan mhan sut in thungta, mleija lung ava kpurlup dok da.

⁵Ungu mmaanni thlaan thung ngi mvan luwn thungta, dona kpowl dang ngi kirsim tartlaang nao mchang ktong tha kukong daat dei lamda; ungbi ngak chlam da.

⁶Ungta Mma ngi mhin thaanni theda, “Ngak maan, khros leen mdo pthoi yown Nasareth ki Jisu kthlaam in pti. Mma kardel dok, hava thung ngi Mma ame; mmaan do pi ii na mun ava asuwn.

⁷Pdainu vang inra, msiikhu rek leh Pitor hin Mma ava mdu inni Galil tha kvang nga adi inra athe pik chaan; Mma ngi mdo the dok heppi, ava tha naanni tdee pha chnaan di.”

⁸Ungbi mmaanni thlaan thungki kurlou lamda vang lamda; mleija mmaanna kunchun lamda ngak chlam da; ungta mṭit lei inni ku mii khat lee hin pau khat lee song lamme.

⁹Tunva hapta ki mnii khat na thok jiingsun kpanma ngi mrin kardel mpha thu, tarnam tikheu mdo rei pthii pik, Magdaleni Mery hin ru kri ver ri ktardet da.

¹⁰Ungbi kurnung karbaang da kṭap mma miiṭhi rek hin vang da song chda.

¹¹Pdainu snu mdak katti kring karheel dok, ungu kdee chaak pi dida mthe kpha thu rin chlamme.

¹²Hava dil tha Mma ngi mrungchen kartleiji knii rek hin ktardet da, mleija mmaanna mkhuwpaam thuwnni chet meek lamda.

¹³Ungbi mmaanni mdil in kinle lamda mmiiṭhi rek hin song lamda, pdainu mmaanni rin chlamme.

¹⁴Ava dil tha sowm lei khat rekki tebol be ngi mu kon daat arlaan inni Mma ngi mhin inni ktardet da; muplung ril in kapchai ungu mdo rin de maan leiji Mma ngi rai chlam da, mleija mrin kardel dok dil tha, mmaanni kdei rek pauson ava rin chlamme.

¹⁵Ungta Mma ngi mhin inni theda, “Dultipaam mkheng thu echet inra, dulti mii rek mkheng hin kṭha paumin aparyaam in.

¹⁶Ku mii khatti rin chda baptis mtlot bi, ava kaktlan pik ra, pdainu krin kma mii ava mraal kpii ra.

¹⁷Ungu krin cha mii rek hin va Nei kbii tinna ngi kthlop lamra: Nei kmiing ngi tarnam rek krei pthii lamra; plei ren ni kpau lamra;

¹⁸mmaanni pruwl rek chom da, ungu diyo na doi knee kurthuwk lam joso, sul kurnul lam nime; mmaanni kukoi rek leen mkhut kikhiing lamra, ungta mii rek kapdam lamra.”

¹⁹Ava dilli Mukpu Jisua, mmaan hin pau msaam dok dil thang ngi, parwaan tha hungkal chda, ungu Isowr chang ktong tha ku ong da.

²⁰Ungta mmaanni mmun ktai thu chet lamda paryaam lamda, mmaan thung ngi Mukpu ngi nong mtlot khim khai thu, paumin ava titinna rekki tipnet pik lamda. Amen.