Read Lamkang MAK 3 Bible Online

MAK 3 - Lamkang bible

MAK 3

¹Ungu Jisu ngi synagog thu mlu nowl thungta mkhut kseek miilai khat am daat da.

²Ungbi sabath nitti Jisu ngi map pdam luwngta tuk kjown raan kdi ngi tup prutti mmaanni sut pṭoi lamda.

³Kseek miilai ava hin Jisu ngi theda, “Hava tha arvang.”

⁴Ava dilli Mma ngi mii rek hin theda, “Sabath nitti nenki Nowlam va tatlot ra nong mdo rot talu ka am da? Kṭha ktlo rang ki mo sul kpurnul rang ki da? Mii rinkhu kek ktlan rang ki mo ke eayou rang ki da?” Pdainu mmaanni rim kdi am lamda.

⁵Ungta Mma ngi plung kthii ngi msut bong lam dilli, muplung in kap pchai reen ava mdee thungta plung pkham psuk lamda, thida mii ava hin theda, “Akhut arjii,” ungu mma ngi mkhut marjit thungta mkhut ava dam chda.

⁶Ava leiji Pharisi rekki thuwk teng lamda, tak heppi Mma ava ti ea kre rang kdingi Herod mii rek tu Mma raal kpii ngi karseel psuk lamda.

⁷Jisu leh msiikhu rekka duwm biing ngi vang kunsun lamda, ungbi Galil paam ki leh Judia paamki mii knem pokki mdil ṭoida.

⁸Ungta Jerusalem paam, Edomia arveel ki, Tyr leh Sidon khuwpii arveel ki, ungu Jordon paam kniw thuwna ktong ki rekki Jisu nong tlot aryaa lamda Mhin thleng lamda.

⁹Ungta mii rek do duwl ma nra msiikhu rekki arkuwng khat mdo purthlon nraan Mma ngi theda,

¹⁰mleija mii knem pok Mma ngi mdo pdam leiji omlai kirvei rek mkheng ngi mdak mdo thown chaak nraan lei Mhin knaira nam kurduwl lamda.

¹¹Ungta pthla ktobor rekki Mma mdee in mpha thu mdu sukki kurthluwn lamda, “Nah Isowr Chapa pti,” kdingi owng lamda.

¹²Ungta ku mii khat lee hin mdo pandan ma nraan Jisu ngi mhin inni kparsa katti pau pṭum da.

¹³Ungta Jisu ngi lown tha hangkal thida mdo ngei rek ava Mhin own lamda. Ungbi mmaanni Mhin hang lamda.

¹⁴Mma doṭhi ra ungu paumin kparyaam mdo sii ra sowmlei knii ava Mma ngi kchol lamda.

¹⁵Tarnam mdo rei pthii pchaan nraan ki rutan ruk pii lamda:

¹⁶Mma ngi Simon dida mmiing mdo thowl Pitor;

¹⁷Jebidi chapa rek Jeems leh mnaopa Johon (mmiing inna Benarji ditta pṭeek kpuwk chapa rek dida Jisu va mdo thowl)

¹⁸Andrija, Philip, Bartholomio, Mathi, Thomas, Alphias chapa Jeems, Thadius, Kenan ki Simon,

¹⁹ungu Mma kip pthlei Iskariot ki Judas hava lim kchol lam da, ava dilli mi inn tha vang da.

²⁰Ungta mii rek thuwk kurtuwl pok nowl da ava leiji kmaal pchaang chlamme.

²¹Mma ava mong kuk kto kcha a dida mii rek ki mdo the mphungka rekki aryaa lamda, mdo pdown nraan Mhin va lamda.

²²Ungta Jerusalem ki kurjung Nowlam chukpu rek angṭhe ngi Mhin the lamda, “Mma ava Belyebul marvee chaakka, ungu tarnam kruwng chapa rutan piikki tarnam rek mrei pthii pchaanna.”

²³Ungbi Mma ngi Mhin own lam thida paupurtolli theda, “Tak heppi seitaan va seitaan krei pthii rang da?

²⁴Kruwngpaam khat ava mthi na ngi mṭhen bi, ava kruwngpaam ma rip chip pchaang nime.

²⁵Ungu inn ava mthi na ngi mkurkhui chaak bi inn ava rip chip pchaang nime.

²⁶Ungu seitaanni mdak saa mthi na ngi kulro msora mkurkhui chaak bi, rip pchaang nime, pdainu mṭut chaak na kurthuwk ra.

²⁷Ungta ku mii khat lee ngi ru ktangpa inn thu lut da mdo thloi ava lowng pchaang nime, ru kri ngi ru ktangpa ava bowl thidonle mi inn thungki klowng pchaang rora.

²⁸“Kinditti, Neiji ahin thaanni kthea, mii chapa rek pnu ton ungu mmaanni Isowr kjowm cha ngi mpau in mkheng ava kup ptlot pik ra.

²⁹Pdainu ku mii khatti pthla kchiir tun kjowm cha ngi mpau bi ava tden thung preva ptlot pik nime, pdainu kṭuw knai kma pnu kirvei chra.”

³⁰“Mleija Mma ava pthla ktobor marvee chaakka,” kdingi mmaanni the lamda.

³¹Ungta Jisu nuh leh mnaopa le arva lamda, duwn tha krip daatti pauvi hai pthla lamda.

³²Ungbi tukhul da kuk ong mii rekki Mhin theda, “Duwn thang ngi anuh leh anaopa le ngi ata thlaam lamma.”

³³Ungbi Jisu ngi arthawng da, “Kule da Nei knuh leh knaopa lea?”

³⁴Ungta Mma tukhul da kukong rek hin suw purkhol thida theda, “Hava lea Nei knuh leh knaopa le!

³⁵Isowr do ngei ktlo mii ava Nei kṭapa, Nei kchernu, ungu knuh.”