Read Lamkang MAK 4 Bible Online

MAK 4 - Lamkang bible

MAK 4

¹Ungta Mma ngi truwn biing ngi kpurchuk pṭhun nowlda. Ungbi kurtuwl mii mluwng pa ngi Mma ava tukhul dok da, ava leiji Mma ava truwn leen arkuwng tunni ku ong da, kurtuwl mii mkheng nga laan tha truwn biing ngi am lamda.

²Ungta Mma ngi paupurtol knempok ki mhin inni purchuk da, mdo purchu slii thu Mma ngi mhin inni hanto theda:

³“Aryaan! Chii kvar miilai khatti chii kvar ra chet da.

⁴Mma ngi chii mvar thungta angṭhea lam thu tla da, ungbi puwa rekki chom chda.

⁵Chii angṭhea lung leen tla da, tnek ma am ma leiji kbei sekki mowng da.

⁶Ungta kniw do satti purvui da, murjung ma am ma leiji tu ṭon ruk ṭong chda.

⁷Angṭhea tirliing rek arlakki tla da, ungbi tirliing kuksunni pardel youda, mthei chui pchaang me.

⁸Ungta chii angṭhea dul dak kṭha thu tla da, ungbi klin ksaang ngi mowng da thei chui da: mvui leen som kdum, som truk, ungu arjaa khatti chui da.”

⁹Ungta Mma ngi theda, “Mdo aryaak nra knaa kthloi mii ava ngi aryaa chaso.”

¹⁰Ungta Mma ngi sangtlaakki ma am mpha thu, karyaa mii rek leh sowmlei knii rekki paupurtol mlei thu khewl chlam da.

¹¹Ungbi Mma ngi mhin inni theda, “Naan hinva Isowr Kruwngpaam ki tuprut pau ado kpiik chaak in, pdainu duwn ki rek tumva do mkheng nga paupurtolli kurthuwk.

¹²Mleija mmaanni dil kinle da kuptlot pik dok mkurthut maanbi, ksuw daatti kdei pchaang kma; karyaa daatti karyaa pindi kma kurthuwk lamra.”

¹³Ungta Mma ngi mhin inni theda, “Naanva hava paupurtolla dei pindi maan timo? Anto mkurthuttu, tak heppi paupurtol mkheng nga dei pindi naan da?

¹⁴Chii kvar rekki pauna varda,

¹⁵Ungta hava lea lam thu ktla rek, mdo var pauna ava mmaanni maryaak inki mpha thu, seitaan ni thleng teng da mmaan thung ngi mdo var pauna ava lou pthii da.

¹⁶Ungta lung leen ktla chii mdo var rek ava hava le hep daat, mmaanni pauna maryaak inki mpha thu kbei sekki kanpa ngi arlaang lamda.

¹⁷Pdainu mmaan thu arjuwng ma am ma leiji mpha mruk tummi amthida, pauna ava leiji suwkthuwk ma am che kbei sekki ktluw chlam.

¹⁸Ungta ang ṭhe rekka tirliing arlakki ktla chii rek hep daat, mmaan ava pauna karyaa rek,

¹⁹pdainu dultipaam tuk sut lamda, suwang thuw ungu ktlok ktlok plung reelli mthu lut da, pauna ava archuw pthii da, thei chui dei me.

²⁰Pdainu dul kṭha tun ktla rek ava pauna aryaa da karlaang kcha, ungu mvui leen som kdum, som truk, ungu arjaa khatti thei kchui ava kurthuwk.

²¹Ungta Mma ngi mhin inni theda, “Meila ava mrina tun kthii kma ra, tomkal ti mdit mana kowm ti ngi mdo thiik ra mdo sin mo?

²²Mleija kandang kma ra kurdowl daat ra ame, ungu mar awng thu kandang kma ra tuprut do khat lee ame.

²³Mdo aryaak nra knaa kthloi mii ava ngi aryaa chaso.

²⁴Ungta Mma ngi mhin inni theda, “Naanni ado aryaak naan thung ngi rip mer chaan; naanni partee da ado piik naan thu akpartee pik raan, ungu kheel setti akpii chraan.

²⁵Mleija kthloi mii ava hin kheel setti kpii chra, ungu kthloi kma mii ava mdo thloi suwn ruk klowng pthii ra.”

²⁶Ungta Mma ngi theda, “Isowr Kruwngpaam ma mii ava ngi dul leen chii mdo var ava hep daat.

²⁷Mma ngi jaan ni iip da suwnni kardel da, ungu chii muh ava tak heppi klin ksaang ngi kmowng tdit mma ngi dei me.

²⁸Dulti thungki mdei ksun da, mbaak jam da, markhei leen knempok ki thei kchui.

²⁹Pdainu mvui mmin thungta, tangkep sin da khao da, mleija bu khao pha ava vei da.”

³⁰Ungta Mma ngi theda, “Isowr Kruwngpaam ma tak purtol che naanda, mdit mana talu paupurtol sinton che naan di?

³¹Ava anruwng muh hep daat, dul leen mvar mpha thu, dulti leen ki chiimuh rek mkheng thungki kdil sii.

³²Anto daat joso chiimuh rek mkheng thungki klin sii ngi mowng da, mbaak rek jam da, marlim ti ngi kjuwng puwa rekki mbuw sada ava hep daat.”

³³Mmaanni mdo aryaak pindit lei inni, paupurtol knempok ki mhin inni pauna the pik lamda.

³⁴Paupurtol kma donle mhin inni Mma ngi pau the kchok me, pdainu Mma siikhu rek hin thang va do khim khaija ktliing ngi mdo the pik kcho lam.

³⁵Ava nitti khuw mjiin rui rui thungta, Mma ngi mhin inni theda, “Nenni raalpha khat tha van arkaan inche.”

³⁶Ungbi kurtuwl mii rek ma lam thida, Mma ava mmaanni ṭhida arkuwng leen mhep heppi vang lamda. Ungu arkuwng murson rek rukka Mma tu kilṭhi lamda.

³⁷Ungu kdung reenni tchangkhuw mraan thungta, dii kurluppi arkuwng deeng da, ava leiji arkuwng plee da.

³⁸Pdainu Mma ava arkuwng ther ri iip dok da, ungbi pardel lam thida Mhin the lamda, “Chukpu kmawng chra nthe inna tuk sut nim ti mo?”

³⁹Ungbi Mma ngi kardel da tchang khuw kraang ava arkowk da, ungu truwn hin ruk va, “Rim kdi am! Edaai dok!” dida theda. Ungbi tchang khuw kraang ngi down dok da, pum daaiji daai chda.

⁴⁰Mma ngi mhin inni theda, “Talu leiji kṭi in pti? Rin chmaan ti mo?”

⁴¹Ungta mmaanna mpiir reen lei inni msingreel inni hanto the lamda, “Tchang khuw leh truwn kpha ngi mpau mdo pṭoi Mma hava ku rang da?”