Read Lamkang MAK 5 Bible Online

MAK 5 - Lamkang bible

MAK 5

¹Mmaanni Gerasini paamki truwn raalpha tha arvang lamda.

²Ungu Mma ngi arkuwng thung ki marhan thuw daat le, thlaan rek thungki kthuwk pthla ktobor doṭhi miilai khat ava ngi kurdut ṭhida,

³mma ava thlaan rek thu amda, ku mii khat lee ngi thiir ri rukku bowl bong pchaang me;

⁴mleija maknem thung ngi mkhut mkhu thiir ri ngi ktu lamda, pdainu mri ava mthum mthummi kpot da,mdo ktut in ruk det chda, ungbi ku mii khat lee ngi bowl bong pchaang me.

⁵Mma ngi suwn jaan knai kma thlaan rek leh lown rek tha pveet da, owng da mthi na ngi lung ngi kturthuw da amda.

⁶Ungta mma ngi lam kla ngi Jisu mhai dee thungta; va chen da Mhin luwbuk da.

⁷Ungu mma ngi kdung ngi owngda ṭap da theda, “Kparthaang sii ki Isowr Chapa Jisu, Nangva talu mpirdit chna? Isowr Chapa pti tdit neiji kdea, mhai pja chma!”

⁸Mleija Mma ngi mhin theda, “Pthla ktobor nang, mii ava thungki arvan thuwk dok!”

⁹Ungta Jisu ngi mhin khewl da, “Amiing nga ku?” Mma ngi arthawng da, “Nei kmiing nga mpun pii; mleija knempok in ping.”

¹⁰Ungu Mma ngi paam duwn tha mdo sii pthii ma nlamra kdung ngi Mhin ni ktham chda.

¹¹Tunva vak rek ava mluwngpa ngi lown siir ri maal meek lamda.

¹²Ungbi mmaanni, “Vak rek thu mhai sii chaan, mmaan thung ngi lut chaanni,” kdingi Mhin ktham chlamda.

¹³Ava leiji msun nraan Mma ngi rot pik lamda, ungbi pthla ktobor rek ava thuwk lamda, vak rek thu lut lamda; ungta pun knii arveel vak luwng rek ava; kham kukki jungjaam lamda, truwn thu tla you tir lamda.

¹⁴Vak kseel rekka chen lamda, khuwpii leh mkhuwpaam in thung ngi pau ava mson in thungta, kthuwk dok nong ava ksuw ra mii rek arva lamda.

¹⁵Ungta mmaanni Jisu hin marhai in thungta, ava thung ngi tarnam doṭhi ku kong daat dei lamda, tarnam doṭhi mii ava ngi plung kinditti dona hiil naada kuk ong daat mdee in thungta; mmaanni ṭi chlam da.

¹⁶Ungta tarnam doṭhi mii ava leh vak rek thung ngi kthuwk nong kdei rekki mii rek hin pau song lamda.

¹⁷Ungta mmaanni Jisua mveen rek thaanni mkunsun nra Mhin ktham chlam da.

¹⁸Ungu Mma ngi arkuwng leen mhankal thungta, tarnam doṭhi mii ava ngi mdil kṭoi chrang ki Mhin ktham chda.

¹⁹Pdainu Mma ngi mat da, mhin theda, “Inn tha aplap rek hin vang, ungu Mukpu ngi tija klin nong ata tlot pik, ungu wonsat ata lo, tdit ki pau asong cha.”

²⁰Ungbi mma ngi vangsun da, Jisu ngi tija thu mma ava wonsat mlo tdit ki pau ava Dikapoli thu kparyaam pṭhun da; ungbi mii mkheng nga ngak chda.

²¹Ungta Jisu ngi arkuwng leen raalpha khat ktong tha mvan nowl thungta, Mma ava truwn biing ngi mii knempok kthuwk kurtuwlli klop dok da.

²²Ava dilli mmiing Jairas mdo dit synagog thungki kpu rek arlakki khat mma ngi Mhin thleng da, Jisu mdee thungta, mkhu ther ri kuwn da,

²³hanto theda, Mhin ktham chda, “Kchanu kmo suwn ava kdiyou ra kirsaan da, Nang ngi arva da mleen akhut atkhaan pik bi, mma ngi kring kdam kpha cha ra!”

²⁴Ungbi Jisu ngi mdil vanṭoi da. Ungta mdil kṭoi mii ava nem reen da, Mma klop dok lam da.

²⁵Ava thu kum sowm lei knii lik thung ngi hii ngi kjaan snu miilai khat amda,

²⁶mma ava kdim rek knempok kurdu ngi jakham da, mdo thloi chaak mkheng pthlang da, pdainu mdam rang kchang nga kheel set setti jul da.

²⁷Jisu mlei thung ngi pau ava mma ngi maryaak thungta, mii mluwngpa arlakki, mtur ngukki arva da mphrik mor thowng chda.

²⁸Mleija mma ngi theda, “Neiji mphrik mor rek rek kthown chaak bi, dam chnik di.”

²⁹Ungu mtun kat daatti mhii kjaan ava kar khaam dok da; mdak thungki omlai ava kdam dokki karja da.

³⁰Ungta Jisu ngi mdaksaa thungki rutan khat kthuwk dokka tdit ki marchawng karja da, mdil kinle teng da mdil kṭoi miiluwng rek hin, “Ku da kiphrik mor kthowng nga?” dida theda.

³¹Ungbi msiikhu rekki Mhin theda, “Asuw, mii mluwngpa ngi nam kurduwl da aju klop dok da,ava Nang va Nei mukthowng nga ku da? diti the tinu.”

³²Ungbi ktlo miilai ava kinle da suw da.

³³Pdainu snu ava ngi mdaksaa thung ngi kthuwk ava deida, mṭit ti kunchun da, arva da Mmaiṭhuwmmi kuwn da, mkindit mkheng Mhin the thuw chda.

³⁴Ungbi Jisu ngi mhin theda, “Kchanu, ado rin chaakki kdam im pti; kdaaiji vang, a omlai thungki dam cha.”

³⁵Jisu ngi mpau slii arlaanni paam kpupa inn thungki miilai khatti theda, “Achanua kdiyou dok cha a, talu leiji Chukpu ning atpumulla?”

³⁶Pdainu Jisu ngi mmaan dothe knaa tipbeen psuk da synagog kpupa hin theda, “ṭi ma, trin he he ngi arin chdaat.”

³⁷Ungta Jisu ngi Pitor leh Jeems ungu Jeems naopa Johon ṭhida ku mii khat lee ngi mdil mdo ṭoi ra rome.

³⁸Mmaanni synagog kpupa inn mvan phaak in thungta, kurnung karbaang da owngda kṭap dei da.

³⁹Ungta Mma ngi mvan lu mpha thu mhin inni theda, “Talu leiji plung kurkholli kṭap in pti? hava naova kdiyou pme, pdainu ki iip chngaal.”

⁴⁰Ungbi mmaanni pni chaak da, pdainu Mma ngi mii mkheng nga duwn tha pthuwk pthii thida, nao ava pah leh mnuh ungta Mma dil kṭoi rek ṭhi da nao ava am na thung ngi vang lut lam da.

⁴¹Mkhut louda kjowngda Mma ngi mhin theda, “Talitha kumi;” ava ki mleija, “Nalanao, Neiji ahin kthea, kardel.”

⁴²Ungbi tun kat daatti nao ava kardel da chet da. (Mleija kum sowm leiknii kpha dok nao) Ungta mmaanna kdung ngi ngak chlam da.

⁴³Hava ava ku mii khat lee ngi mdo dee ma nra Jisu ngi klu katti parseel lamda, ungu nao ava hin then mruk mdo piik chaak nlam ra mhin inni theda.