Read Lamkang MAK 7 Bible Online

MAK 7 - Lamkang bible

MAK 7

¹Tunva Pharisi rek leh Jerusalem ki kthleng Nowlam chukpu rek angṭhe ngi Mhin mthuw kurtuwl in thungta,

²siikhu rek angṭhe ngi mkhut in kbuwr ri, mleija khut kulṭhu kma then mmaal in dei lamda.

³Mleija Pharisi rek leh Jehudia rek va cho du ki kver rek nopa pṭoi lam da, mkhut in kulṭhu kma then cha kchok lamme;

⁴ungu mmaanni bajaar ki mthlun in mpha thu, mdak saa in mkirtleu du khim khai then cha kchok lamme; ungu nopa knem pok mmaanni mdo pṭoi in ruk ka am,tong rek, uwm rek, ungu thleengkam mdo kno kcho lu in.

⁵Ungbi Pharisi rek leh Nowlam chukpu rekki Mhin khewl lamda, “Talu leiji asiikhu rek va kver rek nopa kupṭoi kma, khut kbuwr ri then mdo chaak in da?”

⁶Ungbi Jisu ngi mhin inni theda, “Kṭha a, hava Isaijah ngi ṭha tlot ktlo naan mlei thung ngi mdo kjit ava lulu: ‘Hava mii rekki mner duwn daat inni makjat lamda, pdainu muplung ril inna Nei kihin ki kdung lam karlat kcha a.’

⁷Mmaanni luw mdo tbuk lam ava do sii me, mleija Isowr Nowlam kurthuwk daat joso dulti mii do tlot kupṭoiji purchuk lamda.

⁸Naan ni Isowr paureen ma pthiin tinu mii nopa tlot ava arpom mer in tinu.”

⁹Ungta Jisu ngi mhin inni theda, “Isowr paureen kipthleiji, naanni mo ol nra nopa ava arpom inti nu.

¹⁰Mleija Mousi ngi theda, ‘Apah leh anuh akjat cha;’ ungu mpah leh mnuh hin kṭha kma kpau mii ava kdiyou ra.’

¹¹Pdainu naanva, ‘Ku mii khatti mpah mdit mata mnuh hin, nei kihin ki ado phaak chaak ra ava korban’ (mlei ava Isowr hin kpiik dok) kdi ngi theen tinu.

¹²Ava mkurthut bi naan va mma ngi mpah leh mnuh nong mdo tlot ra prot maan ti.

¹³Naanni ado kjown daat in nopa ava ngi Isowr pauna leek inti, tutlot mara do knem pok tlo in tinu.”

¹⁴Ungu Jisu ngi mii rek Mhin ni own lam thida theda, “Mhai aryaa in, akheng inni,ungu adei pindi chaan.

¹⁵Miilai thung ngi duwn ki jung klut do ava ngi mii ava kchou me; pdainu mii ava thungki arhan kthuwkki miilai ava mdo kchou kre.”

¹⁶Mdo aryaak nra knaa kthloi ku mii khatti aryaa chaso.

¹⁷Ungta Mma ngi mii rek ma thida inn thu mvan lu thungta, msiikhu rekki paupurtol mlei thu Mhin khewl chlam da.

¹⁸Ungbi Mma ngi mhin inni theda, “Ava mkurthuttu naan rukka kdei pindi kma pa in pti mo? Miilai thung ngi duwn ki jung klut ava ngi mii kchou me tdit naanni dei maan ti mo?

¹⁹Jung klut ava plung ki rang pme poi thungki rang kurthuwk ungu karthleng kcha lu pme mo?” (Then mkheng nga kartleu dok dida Mma ngi theda.)

²⁰Ungta Jisu ngi theda, “Mii khat thungki arhan kthuwk ava ngi mii mdo kchou kre.

²¹Mleija miilai plung thung ki arhan kthuwk ava kṭha kma jesang, nala tartlaang kturkui, kupru, mii ke eayou, losang kṭhi,

²²hangmal, ṭhat ma nong ktlo, plei knei, ko ok kma, khei kthe, ku huwng cha, kpohok, mong kokto,

²³ṭha kma hava mkheng nga plung ril thungki arhan kthuwk jesang, ava ngi mii mdo kchou kre.”

²⁴Ungta Mma ngi mun ava thungki kurlou da, Tyr leh Sidon paamkowl tha vang da. Ungta Mma ngi inn khat thu lut da, ku mii khat lee ktardet nuwm me; anto daat joso kurdowl pchaang me.

²⁵Pdainu mchanu kmo suwn pthla ktobor ri ram mdo tparvee snu miilai khat ava ngi aryaa da Mhin thleng teng da, mkhu ther ri luwbuk chda.

²⁶Tunva snu ava Syrophosia thung ngi kṭou Grik mii, mma ngi mchanu thungki tarnam mdo rei pthii pik nra Mhin ktham chda.

²⁷Ungbi Jisu ngi mhin theda, “Ru kri reeppi kmo rek maal dok lam so, mleija kmo rek thenpen lou da ui rek kip pthii pik ava ro me.”

²⁸Pdainu mma ngi arthawng da, “Oji, Mukpu, anto daat joso ui rek ruk va tebol tu n ki kmo rek bu ptlaak mdo chom chaak ma!”

²⁹Ungbi Jisu ngi snu ava hin theda, “Hava ado the pa daat so, a inn tha vang kinle, achanu thungki tarnam ma ksun kcha a.”

³⁰Ungu mma ngi mi inn tha mvan thungta, mchanua ki iip daatti van pha da, mthungki tarnam ruk sun chda.

³¹Ava dilli Jisua Tyr paamkowl ki mdil kinle da, Sidon ki ngi Galil truwn chet thlengda Dikapoli paamkowl tha vang da.

³²Ungta mmaanni knaa kbeeng mpau kaklak miilai khat Mhin ṭhi paphaak lamda, mleen mkhut mdo khiin pik chaak nra Mhin ktham chlam da.

³³Ungbi mii rek arlakki ṭhi ptliing thida, mkhut chelli maknaa thun da, maplei pthot da kmei pik da;

³⁴parwaan hansuw da,tdaal ṭen thida, “Epha phatta,” mlei ava “Kparvang,” dida theda.

³⁵Ungbi maknaa ava kparvang da,miplei kurkol da, mma ngi ktarnaal deekki pau da.

³⁶Ungta ku mii khat lee hin mdo the thut ma nra Jisu ngi mhin pau pṭum da; mhin inni kheel set setti pau mupṭum le kheel sii ngi paryaam lamda.

³⁷Ungu kheel sii ngi mnga chaak in thungta mmaanni the lamda, “Do mkheng kṭha deekki mtlot ta; knaa kbeeng ngi maryaakka, mpau kthuwk kma mpapau pchaanna.!”